«Toj ambʼil jaʼlo nim nya bʼaʼn in tzaj tiʼj kyximbʼetz kuʼxun ex aju in tzaj qʼinte nim nya bʼaʼn kyiʼj, aju redes sociales» (Vivek Murthy, director general de Salud Pública de Estados Unidos. New York Times, 17 de junio de 2024).

 ¿Alkye tten jaku che xqʼuqin mambʼaj kyiʼj kykʼwal tiʼj nya b’an jaku tzaj kyiʼj qa ma tzʼajbʼen redes sociales kyuʼn? Qʼonka twitza kyiʼj nabʼil in tzaj tqʼon Tyol Dios tiʼj jlu.

 Keʼyinxa aju in tzaj tqʼamaʼn Biblia.

 «Atzunju xjal at tnabʼl tok tkwent tiʼj jatum in bʼet» (Proverbios 14:15).

 Tuʼnju jaku tzaj tiʼn redes sociales nya bʼaʼn kyiʼj kykʼwale, nya il tiʼj tuʼn t-xi kyqʼoʼne ambʼil kye tuʼn tajbʼen kyuʼn. Naʼmxtoq t-xi kyqʼoʼne ambʼil kye tuʼn tajbʼen redes sociales kyuʼn, il tiʼj tuʼn tkubʼ kyyekʼin qa kxeʼl kynimen jteʼ ambʼil kxeʼl tqʼoʼna kye tuʼn tajbʼen kyuʼn. Ax ikx, il tiʼj tuʼn tkubʼ kyyekʼin qa bʼanin kyten tuʼn miʼn tok kymojbʼan kyibʼ kyukʼil kyamiw nya bʼaʼn ex tuʼn miʼn tok kyqʼon kywitz kyiʼj nya bʼaʼn tkuʼx toj redes sociales.

 «Tzʼajbʼenxwit tkyaqil qʼij kyuʼne tuʼn kybʼinchanteye bʼaʼn» (Efesios 5:16).

 Qa ma txi kyqʼoʼne ambʼil kye kykʼwale tuʼn tajbʼen redes sociales kyuʼn, yekʼinxa junjun kawbʼil kye ex qʼamanxa alkye tten jaku xqʼuqin kyiʼj.

 In tzaj tqʼamaʼn Biblia jlu: «Tuj mankbʼil tqʼijlalil tzul nim yajbʼil» (2 Timoteo 3:1-5). Pero ax ikx in che kanet consej quʼn aʼyeju kukx jaku che onin qiʼj toj ambʼil kwest jaʼlo. Toj xnaq’tzb’il lu «Mas ma tzaj yabʼil toj kyximbʼetz kuʼxun» jaku kanet 20 artículo ex qe video in che jatz toj Tyol Dios te onil kye mambʼaj ex kye kʼwalbʼaj.