¡KUKX QO XQʼUQIN!
Aju tej kykubʼ bʼyoʼn aj Judiy ex qe testigo de Jehová | ¿Tiʼ in tzaj tqʼamaʼn Biblia tiʼj jlu?
Nim xjal kbʼel kyikʼsaʼn Día Internacional en Memoria del Holocausto toj 27 te enero te 2023, toj juntl yol, kbʼel kyikʼsaʼn aju tej kykubʼ bʼyoʼn nim xjal judiy. Tuʼn tkyaqilju nya bʼaʼn bʼaj toj Holocausto aju ma tzikʼ mas te 75 abʼqʼi tikʼlen, jakulo kubʼ t-xjelina tiquʼn tzaj tqʼoʼn Dios ambʼil tuʼn tbʼaj jlu.
Tuʼn tel tnikʼa tiʼjju in tzaj tqʼamaʼn Biblia tiʼj jlu, uʼjinktza xnaqʼtzbʼil: «¿Tiquʼn e kubʼ bʼyoʼn nim aj Judiy? ¿Tiquʼn xi tqʼoʼn Dios ambʼil tuʼn tbʼaj jlu?».
Ok bʼinchaʼn nim nya bʼaʼn kyiʼj xjal Judiy ex e kubʼ bʼyoʼn nim millón. Nya oʼkx ok bʼinchaʼn nya bʼaʼn kyiʼj aj Judiy, ax ikx ok bʼinchaʼn tiʼj junjuntl kyyajil xjal. Ik tzeʼn qe testigo de Jehová ax ikx kye ok bʼinchaʼn nim nya bʼaʼn kyiʼj tuʼnju in che okslan tiʼjju in tzaj tqʼamaʼn Biblia.
Tuʼn tel mas tnikʼa tiʼj jlu, uʼjinktza xnaqʼtzbʼil «¿Tiʼ bʼaj kyiʼj testigo de Jehová tej kykubʼ bʼyoʼn xjal kyuʼn nazi?».
«Tuʼntzun tqeʼ kykʼuʼje tiʼj oybʼil, ex mas bʼaʼn che tele te yajxitl»
Ateʼ nim xjal in che tzaj xobʼ tuʼnju in kubʼ kyximen qa jaku bʼaj juntl maj aju ik tzeʼn bʼaj toj Holocausto. Pero tbʼanelxix tuʼnju in tzaj tqʼamaʼn Biblia qa ya mlay tzʼaj juntl maj nya bʼaʼn lu toj ambʼil tzul.
«Porke bʼaʼn wuʼne alkye nximbʼetze kyiʼje; ximan wuʼne tuʼn nbʼinchanteye bʼaʼn kyiʼje ex mya tuʼn nbʼinchanteye mya bʼaʼn. In xi nmaʼne jlu tuʼntzun tqeʼ kykʼuʼje tiʼj oybʼil, ex mas bʼaʼn che tele te yajxitl. Aqine Dios in chin qʼmante jlu» (Jeremías 29:11).
Ok kjapunel twiʼ jlu tuʼn Qman Jehová aj tkubʼ tnajsaʼn nya bʼaʼn ex aj tkyaj toj ttxolil tuʼn. a Chʼix tpon ambʼil tuʼn t-xi tbʼinchaʼn Dios jlu:
Ok che kbʼel tnajsaʼn xjal in nok kybʼinchaʼn nya bʼaʼn kyiʼj txqantl (Proverbios 2:22).
Che okel tqʼanin Dios qe xjal o tzaj nya bʼaʼn kyiʼj ex che tzalajel tuʼn (Apocalipsis 21:4).
Ex aqeju o che kyim, ok kxel tqʼoʼn juntl maj kychwinqlal tzalu twitz Txʼotxʼ (Juan 5:28, 29).
Jaku tzʼok qeʼ tkʼuʼja tiʼjju tbʼanel qʼuqbʼil qkʼuʼj in tzaj tqʼamaʼn Biblia. Qa tajbʼila tuʼn tel tnikʼa tiquʼn, in qo txokine tiʼja tuʼn t-xi tkʼamoʼna xnaqʼtzbʼil in xi qqʼoʼne teyele junjun xjal tiʼj Biblia.
a Jehová tbʼi Dios (Salmo 83:18, La Biblia. Traducción del Nuevo Mundo).