In tzaj nya bʼaʼn aj tel tpan tibʼ jun xjal kyiʼj txqantl | ¿Tiʼ in tzaj tqʼamaʼn Biblia tiʼj jlu?
At jun tqanil kʼitzqeku tzʼetz twitz tkyaqil Txʼotxʼ, tzaj tyekʼin qa jun kyxol kyaje xjal in kubʼ tnaʼn qa tjunalx at. a
«Noq te jteʼxku qabʼqʼi ex noq alkyexku qtnam jaku tzʼel qpan qibʼ kyiʼj txqantl» (chi Chido Mpemba, aju tkabʼ nejenel te Comisión te Organización Mundial de la Salud sobre Conexión Social).
Ateʼ nim xjal in kubʼ kyximen qa oʼkx qeju xjal ma che tijen moqa in nel kypan kyibʼ kyiʼj txqantl jaku kubʼ kynaʼn qa kyjunalx ateʼ. Pero ax ikx qeju kuʼxun, qeju nya yabʼ qe, qeju mintiʼ jun nya bʼaʼn toj kyanqʼibʼil ex qeju o che kubʼ mojeʼ jaku kubʼ kynaʼn jlu. Jaku tzaj yabʼil tiʼj t-xmilal ex tiʼj t-ximbʼetz jun xjal qa in kubʼ tnaʼn qa tjunalx at.
«At nim nya bʼaʼn jaku tzaj qa ma kubʼ qnaʼn qa qjunalx atoʼ», chi doctor Vivek Murthy. Ex tqʼamatl jlu: «Aju nya bʼaʼn in tzaj tuʼnju in nel tpaʼn tibʼ jun xjal kyiʼj txqantl, in nok ik tzeʼn jun xjal in xiʼ 15 sichʼ tuʼn toj jun qʼij».
¿Tiʼ in tzaj tqʼamaʼn Biblia tiʼj jlu?
Nya tajbʼil Dios tuʼn tel qpan qibʼ kyiʼj txqantl xjal. Taj tuʼn qten junx ex toj txubʼtxaj kyukʼil txqantl.
Aju texto nim toklen: «Tmatzun Qman Dios kyjaʼ: Mya bʼaʼn tuʼn tten xinaq tjunal» (Génesis 2:18).
Tajbʼil Dios tuʼn tten jun tbʼanel qamiwbʼil tukʼil. In tzaj ttziyen Dios qa ktzajel laqʼeʼ qukʼil qa ma qox laqʼeʼ ttxlaj (Santiago 4:8).
Aju texto nim toklen: «At tzalajbʼil kye qeju nneʼl kynikʼ tiʼj qa at tajbʼen Dios kye, tuʼnju at kyoklen tiʼj ju kawbʼil in tzaj tuj kyaʼj» (Mateo 5:3).
Taj Dios tuʼn qkʼulin te junx kyukʼil txqantl xjal. Aj tbʼant jlu quʼn, in kubʼ qnaʼn tzalajbʼil.
Aju texto nim toklen: «Qo ximan tiʼj tuʼn qkyuwsante qibʼ qxolx tuʼn qkʼujlante qibʼ ex tuʼn qbʼinchante bʼaʼn. Ex miʼn txi qkolin tuʼn tok qbʼuyin qibʼ, [...] ex qqʼom qnabʼl qxolx» (Hebreos 10:24, 25).
Qa taja tuʼn tel chʼintl tnikʼa tiʼj tiquʼn nim toklen tuʼn miʼn tel qpan qibʼ kyiʼj txqantl, jyonxa xnaqʼtzbʼil «Soledad en la era de la comunicación».
a The Global State of Social Connections, aju tqanil etz tuʼn Meta ex Gallup, 2023.