Tkyaqil abʼqʼi, in che tzaj nim terremoto. Chʼixme tkyaqil maj noq chʼin qe terremoto in che tzaj, pero ateʼ junjuntl kyuw in che tzaj jatumel in che kyim nim xjal ex in kubʼ xitj tkyaqil kyuʼn. At maj, in che tzaj tsunami kyuʼn terremoto, ex tuʼn jlu in naj kytxʼotxʼ xjal ex ateʼ nim in che kyim. ¿Kyajpe qʼamaʼn toj Tyol Dios kyiʼj terremoto lu?

Kxel qbʼiʼn tzaqʼwebʼil kyiʼj junjun xjel toj xnaqʼtzbʼil lu:

•  ¿Kyajpe qʼamaʼn toj Tyol Dios qa tuʼn kytzaj terremoto?

•  ¿Jakupe txi qqʼamaʼn qa in japun twi jun profecía tuʼnju in che tzaj terremoto toj ambʼil jaʼlo?

•  ¿Tiʼ kyoklen profecía lu qukʼil?

•  Aju kyximbʼetz xjal nya toj tumel at kyiʼj profecía ex kyiʼj terremoto

 Yolin Jesús kyiʼj terremoto toj jun profecía tkuʼx toj Biblia. Jaku jaw quʼjin kyoj oxe libro tkuʼx toj Tyol Dios:

 «Qe xjal tuj jun nasyon che qʼojlel tiʼj juntl nasyon, ex che qʼojlel qe tnam kyiʼj txqantl tnam; ex noq jachaq tzul txʼuʼj yabʼil ex weʼyaj ex kyaqnajnabʼ» moqa terremoto (Mateo 24:7).

 «Ok che okel ten nasyon qʼojlel kyiʼj txqantl nasyon, ex qe tnam che okel ten qʼojlel kyiʼj txqantl tnam; ex noq jachaq tzul kyaqnajnabʼ, tzul weʼyaj, ex che jawil tilj xjal» (Marcos 13:8).

 «Ktzajel kyaqnajnabʼ kyuwxix ex weʼyaj ex txʼuʼj yabʼil noq jachaq» (Lucas 21:11).

 Kyaj tqʼamaʼn Jesús qa jaxku tumel tzul «kyaqnajnabʼ kyuwxix», ex toj ax ambʼil ktel qʼoj, weʼyaj ex yabʼil. Tuʼnju junx in che bʼaj qe tiʼchaq lu, in nel qnikʼ tiʼj qa chʼix «tjapun bʼaj tqʼijlalil». Ex in nok qʼoʼn tbʼi ambʼil te «mankbʼil tqʼijlalil» (Mateo 24:3; 2 Timoteo 3:1). Aj t-xi qajlaʼn tajlal ambʼil ik tzeʼn in tzaj tqʼamaʼn Tyol Dios, in nel qnikʼ tiʼj qa tzaj tzyet «mankbʼil tqʼijlalil» toj abʼqʼi 1914 ex naʼmx tjapun bʼaj.

 Ikju. At toklen profecía tqʼama Jesús tukʼilju in bʼaj toj ambʼil jaʼlo, ik tzeʼn tej tyolin tiʼj terremoto. Atxix toj 1914, o tzikʼ mas te 1,950 terremoto ex o che kyim mas te kabʼe millón xjal tuʼn. a Qo yolin kyiʼj junjun techel kyiʼj junjun terremoto o che ikʼ kyoj qeju mankbʼil 20 abʼqʼi.

 Océano Índico (2004). Tej ttzaj jun terremoto te 9.1 tmagnitud, ax ikx tzaj jun tsunami ex pon kyoj nimku tnam. Tuʼn terremoto lu, e kyim junlo 225,000 xjal.

 China (2008). Tej ttzaj jun terremoto te 7.9 tmagnitud, e kubʼ xitj tnam tuʼn. In kubʼ kyximen xjal qa e kyim 90,000 xjal ex e kʼixbʼi junlo 375,000. Ax ikx kubʼ xitj kyja nim millón xjal.

 Haití (2010). Tzaj jun terremoto te 7 tmagnitud ex e tzaj junjuntl yajxitl, e kyim mas te 300,000 xjal ex mas te jun millón kubʼ xitj kyja.

 Japón (2011). Tej ttzaj jun terremoto te 9 tmagnitud ex junjun tsunami, chʼixme 18,500 xjal e kyim ex ateʼ nim mil kyaj kytzaqpiʼn kyja. Ax ikx tzaj tiʼn nim nya bʼaʼn jatumel taʼ central nuclear atz Fukushima. Tzaj tiʼn jlu jun accidente nuclear. Tej tikʼ lajaj abʼqʼi, bʼalo 40 mil xjal naʼmxtoq kymeltzʼaj anqʼil kyja tuʼnju attoq nim kyaq ex atztoq in che anqʼin nqayin tiʼj planta.

 Aju in tzaj tqʼamaʼn Tyol Dios kyiʼj terremoto, in tzaj tyekʼin qe tiʼ kbʼajel toj chʼintl ambʼil. Tqʼama Jesús jlu: «Ok kylonteye ok tjapun tkyaqil jlu, tzʼelx kynikʼe tiʼj in laqʼex ttzaj tkawbʼil Dios» (Lucas 21:31).

 In tzaj tchikʼbʼaʼn Biblia qa atz taʼ Tkawbʼil Dios toj kyaʼj ex qa o txi qʼoʼn toklen Jesucristo te Rey. Xi t-xnaqʼtzaʼn Jesús kye tdiscípulo tuʼn kynaʼn Dios tiʼj Kawbʼil lu (Mateo 6:10).

 Aj tkawin Tkawbʼil Dios kyibʼaj xjal twitz Txʼotxʼ, mlay txi tqʼoʼn Dios ambʼil tuʼn ttzaj nya bʼaʼn kyiʼj xjal tuʼn xitbʼil, ik tzeʼn aju in bʼaj kyuʼn terremoto (Isaías 32:18). Nya oʼkxju, ax ikx kʼonil kyiʼj xjal o che kʼixbʼi tuʼn jun terremoto ex in che xobʼ toj ambʼil jaʼlo (Isaías 65:17; Apocalipsis 21:3, 4). Qa taja tuʼn tel mas tnikʼa tiʼj xnaqʼtzbʼil lu, jaku jaw tuʼjina xnaqʼtzbʼil tok tbʼi «¿Qué cosas logrará el Reino de Dios?».