Aju tilbʼilal mintiʼxix qʼanchaʼl te 8 metro twaʼlil, at junjun letra tkubʼ twitz ex atz tkubʼ ttzi jun templo te dios Amón atz Karnak te Egipto. In tzaj kyqʼamaʼn junjun xjal at kyojtzqibʼil, qa toj tilbʼilal lu in tzaj qʼamaʼn aju qʼoj ok tuʼn faraón Sisaq nqayin te tjawitz qʼij te Egipto, atz jatumel taʼ kykawbʼil Judá ex Israel.

 Toj tilbʼilal lu qʼanchaʼl tilbʼilal dios Amón ex in xi tyekʼin qa ateʼ 150 xjal kʼaloʼn twitz faraón Sisaq, ax ikx tok tbʼi te Sesonq. a Teyele junjun xjal lu in kubʼ kyechlaʼn jun tnam otoq kubʼ kyiʼj. Tzʼibʼin kybʼi tnam lu tibʼaj kyxmilal. Toj ambʼil jaʼlo, ax ikx jaku che jaw uʼjit qe bʼibʼaj lu. In nel kynikʼ qeju in che uʼjin tiʼj Tyol Dios tiʼj kybʼi lugar lu; ik tzeʼn Bet-seán, Gabaón, Meguidó ex Sunem.

 In tzaj qʼamaʼn toj Biblia aju ambʼil tej tkubʼ tiʼj tnam Judá (1 Reyes 14:25, 26). Nya oʼkx jlu, ax ikx in tzaj tqʼamaʼn Biblia aju bʼant tuʼn Sisaq. In tzaj tqʼamaʼn jlu: «Kyjaʼtzun tuj tjweʼyin abʼqʼi ttzyetlen tkawin rey Roboam ok tzoqpaj Sisac aju rey te Egipto tiʼj Jerusalén, pon tukʼil jun mil tukʼil kabʼ syent carwaj in che ajbʼen tuj qʼoj, tukʼix 60 mil soldad kyjax kyibʼaj chej ex kyukʼix txqantl soldad nimxix kyajlal tzaj kyukʼin kyibʼ tuj Egipto [...]. Qe tnam tok muro kyiʼj tuj Judá kubʼ kyiʼj tuʼn ex pon max niqayin ttxlaj Jerusalén» (2 Crónicas 12:2-4).

 Nya oʼkx aju tilbʼilal tok tiʼj Karnak in tzaj tyekʼin qa kubʼ tiʼj kytxʼotxʼ aj Israel tuʼn Sisaq. Ax ikx aju bʼibʼaj Sensonq tkubʼ tibʼaj jun abʼj aju kanet toj Meguidó ex a jlu jun tbʼi tnam in yolin Tyol Dios tiʼj.

 Tkyaqil aju in tzaj tqʼamaʼn Tyol Dios tiʼjju tej tkubʼ tiʼj Judá tuʼn Sisaq, a jlu jun techel qa axix tok aju kux tzʼibʼin toj Biblia kyuʼn aj tzʼibʼil. Aʼyeju aj tzʼibʼil nya oʼkx kux kytzʼibʼin ambʼil tej kykambʼan, sino ax ikx kux kytzʼibʼin tej tkubʼ tiʼj kytnam kyuʼn aj qʼoj. Atzun junjuntl aj tzʼibʼil mintiʼxix bʼant jlu kyuʼn toj ambʼil ojtxe.