Aj tok qqʼoʼn qwitz kyiʼj noticia, in netz yekʼin nim tqanil te ikʼbʼil kyoj tuʼnju junxitl kyximbʼetz jun kʼloj xjal kywitz juntl kʼloj. Ex in kubʼ kyyekʼin jlu tukʼil kyyol, tukʼil kybʼinchbʼen ex tukʼil qʼoj.

•    «Toj ambʼil jaʼlo, mas in che yolin xjal tukʼil ikʼbʼil kyoj redes sociales tuʼnju in nok qʼoj kyxol Israel tukʼil Gaza ex tuʼnju in nok tilil kyuʼn junjun xjal tuʼn tten ikʼbʼil ex bʼiybʼil toj kyanmi txqantl xjal» (Chi The New York Times, 15 te noviembre te 2023).

•    «Atxix toj 7 te octubre, mas ma chʼiy ikʼbʼil toj kyanmi xjal, ex in nel qnikʼ tiʼj jlu tuʼnju alkye tten in che yolin xjal ex tuʼnju at nim bʼiybʼil» (Chi Dennis Francis, presidente de la Asamblea General de las Naciones Unidas, 3 te noviembre te 2023).

 Atxix toj ambʼil ojtxe in che yolin xjal tukʼil ikʼbʼil, in che bʼiyen ex in nok qʼoj kyuʼn. In yolin Biblia kyiʼj junjun xjal aqeju xi kyqʼamaʼn «kyyol in che kʼixbʼi xjal kyuʼn mer ik tzaʼn plech in tzaj xoʼn kyiʼj xjal», ex ok tilil kyuʼn tuʼn tten bʼiybʼil ex qʼoj kyxolx (Salmo 64:3; 120:7; 140:1). Pero in tzaj tqʼamaʼn Tyol Dios qa aju ikʼbʼil in nok qqʼoʼn qwitz tiʼj toj ambʼil jaʼlo, at jun t-xilen nim toklen..

 In tzaj tyekʼin Tyol Dios kabʼe tiquʼn at nim ikʼbʼil toj ambʼil jaʼlo.

1.  1. Kyaj tqʼamaʼn qa ktel jun ambʼil jatumel «nimku xjal miʼn tentl kykʼujlalil kyxolx» (Mateo 24:12). Ex kyaj tqʼamaʼn Biblia qa ktel kymod xjal aju tzul tiʼn mas ikʼbʼil (2 Timoteo 3:1-5).

2.  2. Aju nimxix ikʼbʼil in kubʼ kyyekʼin xjal toj ambʼil jaʼlo, in tzaj tyekʼin qa ateʼkx tjaqʼ tkawbʼil Satanás aju Tajaw il. In tzaj tqʼamaʼn Tyol Dios qa «kykyaqil xjal twitz txʼotxʼ ateʼ tjaqʼ tipumal tajaw il» (1 Juan 5:19; Apocalipsis 12:9, 12).

 Pero ax ikx in tzaj tqʼamaʼn Biblia qa chʼix tpon ambʼil tuʼn tel tiʼn Dios tkyaqilju in tzaj tiʼn ikʼbʼil. Nya oʼkxju, ax ikx kʼelel tiʼn Dios kʼixkʼoj o tzaj tuʼn ikʼbʼil. In tzaj tqʼamaʼn Biblia jlu:

•    «Kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj; porke aqeju at tnejel ma che naj» (Apocalipsis 21:4).