Twitz tkyaqil Txʼotxʼ ex toj nimku tnam in kubʼ kypan kyibʼ xjal tuʼn política. Xi qanin junjun xjel kye xjal te 19 tnam toj 2022 tuʼn centro de investigación Pew Research Center, «ex tzaj kyqʼamaʼn 65 tiʼj 100 xjal qa o tzaj nim nya bʼaʼn kyxol xjal tuʼnju in che onin kyiʼj junxichaq partido político».

 Yajtzun te jatumel in nanqʼina, ¿atpe pabʼil kyxol xjal tuʼn política moqa mintiʼ? ¿Tiquʼn in bʼaj jlu? ¿Atpe jun tiʼ jaku bʼant tuʼn miʼn tbʼaj jlu? Qo ximen tiʼjju in tzaj tqʼamaʼn Tyol Dios tiʼj jlu.

 Kyaj tqʼamaʼn Biblia qa «tuj mankbʼil tqʼijlalil», toj juntl yol toj ambʼil jaʼlo, kbʼeltoq kyyekʼin nim xjal nya bʼaʼn kymod ex tuʼntzunju mlaytoq ten mujbʼabʼil kyxol.

•   «Tuj mankbʼil tqʼijlalil tzul nim yajbʼil. Ok che ul xjal oʼkx tok kykʼuʼj kyiʼjx, ex [...] mintiʼ in chewix kykʼuʼj» (2 Timoteo 3:1-3).

 Kwest tuʼn tel bʼaʼn aju in bʼant kyuʼn gobierno maske in nok tilil kyuʼn xjal tuʼn tjapun twi kyximbʼetz. Nya junx kyximbʼetz xjal at, tuʼntzunju kwest in nela toj kywitz tuʼn kyaqʼunan junx ex tuʼn tkyaj jun nya bʼaʼn toj ttxolil kyuʼn. Tkyaqil jlu in japun twiʼ ik tzeʼn kyaj qʼamaʼn toj Biblia.

•   «Aju tipumal xjal at tuʼn tbʼinchante mya bʼaʼn tiʼj juntl» (Eclesiastés 8:9).

 Pero in tzaj tqʼamaʼn Biblia jun tbʼanel tqanil tuʼnju in tzaj ttziyen qa ktel jun gobierno ex jun nejenel aju kʼelel tiʼn tkyaqil nya bʼaʼn in tzaj kyiʼj xjal toj ambʼil jaʼlo.

 In yolin Biblia tiʼj jun nejenel aju mintiʼ juntl ik tzeʼn te tuʼnju jaku bʼant tkyaqil tuʼn. A Jesucristo nejenel lu. At tipumal, at toklen ex tajbʼil tuʼn ttzaj tiʼn mujbʼabʼil, moqa nakʼbʼil, kyxol kykyaqil xjal.

•   «Che tel xjal tuj txubʼtxaj ex che bʼetel tuj tumelxix tuj tqʼijlalil tkawbʼil» (Salmo 72:7).

•   «Kykyaqil xjal kyuj qe nasyon che ajbʼel te» (Salmo 72:11).

 Jun tbʼanel nejenel te Jesús tuʼnju ax tok in ximen kyiʼj xjal ex taj tuʼn tonin kyiʼj, ex mas kyiʼj qeju o tzaj nya bʼaʼn kyiʼj.

•   «A kkolol kyiʼj qe mebʼa in che kubʼsan twitz ex kyiʼj qeju in che yajlanjtz ex mintiʼ jun onil kye. Ktzajel tzʼeʼy tkʼuʼj kyiʼj qe xjal mans, ex che kletel qe xjal mebʼa tuʼn. Che kletel tuʼn tuj kyqʼabʼ qeju in che yajlan kye ex tuj kyqʼabʼ qe bʼyol xjal» (Salmo 72:12-14).

 O txi qʼoʼn toklen Jesús tuʼn tkawin toj Tgobierno Dios at toj kyaʼj, bʼaʼn tuʼn tel mas tnikʼa tiʼj. Ax ikx bʼaʼn tuʼn tel tnikʼa tiʼj tzeʼn jaku tzʼonin gobierno lu tiʼja ex tzeʼn jaku kubʼ tyekʼina qa taja tuʼn tkawin.

•   Qʼonka twitza tiʼj video ¿Tiʼ aju Tkawbʼil Dios?

•   Uʼjinktza xnaqʼtzbʼil «Aju Tkawbʼil Dios Jun kawbʼil mintiʼ sbʼubʼil toj»