Toj 24 te mayo te 2022, tzaj jun nya bʼaʼn toj tal tnam Uvalde atz Texas, Estados Unidos. Ik tzeʼn in tzaj tqʼamaʼn periódico The New York Times, «okx jun xjal qʼiʼn t-arma toj escuela primaria Robb ex e kubʼ tbʼyoʼn 19 kʼwal ex kabʼe maestra».

 Bʼisbʼajil tuʼnju in bʼaj jlu nimku maj toj ambʼil jaʼlo. Tzaj tqʼamaʼn periódico USA Today qa oʼkx toj tnam Estados Unidos, «bʼaj 249 tiroteo kyoj escuela toj abʼqʼi ma kyaj. Mas nim tajlal jlu twitzju o bʼaj kyoj junjuntl abʼqʼi o che ikʼ atxix toj 1970».

 ¿Tiquʼn in bʼaj junjun nya bʼaʼn ik tzeʼn jlu? ¿Tzeʼn jaku qo ex kywitz? ¿Jakupe tzʼok qeʼ qkʼuʼj tiʼj qa kpol ambʼil tuʼn tel qʼiʼn bʼiybʼil? In tzaj tqʼoʼn Biblia tzaqʼwebʼil kyiʼj xjel lu.

•    In qo anqʼin toj jun ambʼil aju in nok tqʼoʼn Tyol Dios tbʼi te «mankbʼil tqʼijlalil». Toj ambʼil lu, mintiʼ in kubʼ kyyekʼin xjal kykʼujlabʼil ex «mintiʼ chʼin kylastmi kyiʼj xjal», ex ktel kymod ik tzeʼn kymod txkup. Aqeju xjal lu, mas «kyjaʼ kyxi laqʼeʼ [...] tuj mya bʼaʼn» (2 Timoteo 3:1-5, 13). Qa taja tuʼn tel mas tnikʼa tiʼj jlu, jaku jaw tuʼjina xnaqʼtzbʼil tok tbʼi «¿Predijo la Biblia cómo sería la gente en nuestros días?».

 In kubʼ kyxjelin nim xjal jlu: «¿Tiquʼn mintiʼ in bʼant jun tiʼ tuʼn Dios tuʼn miʼn kytzaj nya bʼaʼn ik tzeʼn qe tiroteo toj escuela?». Tuʼn tel tnikʼa tiʼjju in tzaj tqʼamaʼn Biblia, jaku jaw tuʼjina xnaqʼtzbʼil «¿Tiquʼn in tzaj nya bʼaʼn kyiʼj tbʼanel xjal?».

•    «Aju o tzʼibʼanjtz tuj Tuʼjil ojtxi, o tzʼibʼanjtz te xnaqʼtzbʼil qe, [...] tuʼn tqeʼ qkʼuʼj tuʼnju yol tzʼibʼan tuj Tuʼjil, tuʼntzun tqeʼxix qkʼuʼj tiʼj Dios» (Romanos 15:4).

 Jaku che onin consej tkuʼx toj Biblia qiʼj tuʼn qex kywitz nya bʼaʼn ik tzeʼn jlu. Tuʼn tel mas tnikʼa tiʼj xnaqʼtzbʼil lu, jaku jaw tuʼjina ¡Despertad! tok tbʼi «¿Acabará algún día la violencia?».

 At maj in che tzaj xobʼ kʼwal aj tok kybʼiʼn moqa aj tok kykeʼyin noticia. Qa mambʼaj teya ex taja tuʼn tonina kyiʼj tkʼwala tuʼn miʼn kytzaj xobʼxix, jaku jaw tuʼjina xnaqʼtzbʼil «El efecto de las noticias en los niños».

•    «Che kletel tuʼn tuj kyqʼabʼ qeju in che yajlan kye ex tuj kyqʼabʼ qe bʼyol xjal» (Salmo 72:14).

•    «Kbʼajel kybʼinchaʼn qe kyspad tuʼn kyok te kypunt ex qe kylans tuʼn kyok te jobʼl triw. Mi jun tnam tuʼn ttzaj tiʼn juntl maj qe t-spad tuʼn tqʼojin tiʼj juntl, ex mlay kykʼam mastl xnaqʼtzbʼil tuʼn kyqʼojin» (Miqueas 4:3).

 Kbʼantel tuʼn Dios aju mlayx bʼant kyuʼn xjal. O kubʼ tqʼoʼn Dios Tkawbʼil toj kyaʼj ex kʼajbʼel tuʼn tuʼn tel bʼiybʼil ex tkyaqilju in najbʼen kyuʼn xjal tuʼn kyqʼojin. Qa taja tuʼn tel mas tnikʼa tiʼjju kbʼantel tuʼn Kawbʼil lu, jaku jaw tuʼjina xnaqʼtzbʼil «Ktel axix tok mujbʼabʼil tuʼn Tkawbʼil Dios».