¿Tiʼ kyaj tqʼamaʼn Tyol Dios tiʼj clima ex tiʼj ambʼil tzul?
«Ya ma chʼexpaj clima toj ambʼil jaʼlo. Ya kwest tuʼn tten kyanqʼibʼil xjal twitz Txʼotxʼ» (The Guardian).
In che ok weʼ xjal twitz jun nya bʼaʼn ex aʼyex at kypaj tiʼj. In tzaj kyqʼamaʼn científico qa tuʼnju in bʼant kyuʼn xjal, in jaw kyaq twitz txʼotxʼ. Ex tuʼn jlu, o chʼexpaj clima ex in tzaj tiʼn nim nya bʼaʼn. Qo xnaqʼtzan kyiʼj junjun.
Mas at kyaq toj ambʼil jaʼlo, at maj mintiʼxix in kubʼ jbʼal moqa in tzaj nimxix jbʼal ex junjuntl nya bʼaʼn. Ex tuʼn jlu in tzaj qotxʼ moqa in xiʼ qʼaqʼ tjaqʼ tzeʼ.
In nok hielo te aʼ atz Ártico.
In jaw chʼiy mar.
O chʼexpaj clima twitz tkyaqil Txʼotxʼ. Etz tqʼamaʼn periódico The New York Times aju in bʼaj toj 193 tnam ex tqʼama qa in tzaj tqanin Txʼotxʼ onbʼil. Tuʼnju o chʼexpaj clima, o che kyim nim xjal ex in tzaj nim yajbʼil kyiʼj, axpe ikx, in tzaj tqʼamaʼn Organización Mundial de la Salud qa «atzun jlu jaku tzaj qʼinte mas nya bʼaʼn kyiʼj kykyaqil xjal».
Maske ikju, at nim tiquʼn tuʼn tten tbʼanel qximbʼetz ex jaku ten jun qʼuqbʼil qkʼuʼj tiʼj ambʼil tzul. Kyaj tqʼamaʼn Tyol Dios tkyaqilju in bʼaj toj ambʼil jaʼlo. Ax ikx in tzaj tqʼamaʼn tiquʼn jaku tzʼok qeʼ qkʼuʼj tiʼj qa kxel tbʼinchaʼn Dios tiʼj tkyaqilju in bʼaj jaʼlo ex qa kxqʼuqil qiʼj toj ambʼil tzul.
Tuʼnju o chʼexpaj clima, ¿atpe jun profecía in japun twiʼ tuʼn jlu?
Ikju. Tuʼnju in jaw kyaqax twitz Txʼotxʼ, in tzaj nim nya bʼaʼn ex atzun jlu kyaj tqʼamaʼn Tyol Dios tuʼn tbʼaj toj ambʼil jaʼlo.
Aju profecía kyaj qʼamaʼn: Kpol «tqʼijlalil tuʼn kynaj qeju ma naj twitz txʼotxʼ kyuʼn» (Apocalipsis 11:18).
Kyaj tqʼamaʼn Tyol Dios qa kpol jun ambʼil jatumel kʼokel tilil kyuʼn xjal tuʼn tnaj twitz Txʼotxʼ. Ax tok in bʼaj jlu. Tuʼnju in jaw kyaqax Txʼotxʼ, mas in tzaj nya bʼaʼn toj ambʼil jaʼlo.
In nonin profecía lu qiʼj tuʼn tel qnikʼ tiʼj qa mlay klet Txʼotxʼ kyuʼn xjal. In tzaj tqʼamaʼn Biblia qa tzul Dios kolil tiʼj Txʼotxʼ akux in naj kyuʼn xjal. Ateʼ junjun xjal in nok tilil kyuʼn tuʼn tten jun tbʼanel clima, pero mlayx bʼant jun tiʼ kyuʼn tuʼn tel kyiʼn ambʼil kye xjal in bʼaj kyyajin twitz Txʼotxʼ.
Aju profecía kyaj qʼamaʼn: «Tzul sekʼpubʼl» (Lucas 21:11).
Kyaj tqʼamaʼn Tyol Dios qa «tzul sekʼpubʼl», toj juntl yol, kʼokel qqʼoʼn qwitz kyiʼj junjun tiʼchaq ex jaku qo tzaj xobʼ kyuʼn. Tuʼnju o chʼexpaj clima, o tzaj nim xitbʼil tuʼnx twitz txʼotxʼ jaxku tumel. Tuʼn jlu, ateʼ nim xjal in che xobʼ toj tkyaqil ambʼil tuʼnju in kubʼ kyximen qa jaku tzaj xitbʼil tuʼnx twitz txʼotxʼ toj alkyexku ambʼil.
Aju profecía kyaj qʼamaʼn: «Tuj mankbʼil tqʼijlalil tzul nim yajbʼil. Ok che ul xjal oʼkx tok kykʼuʼj kyiʼjx, ex oʼkx tok kykʼuʼj tiʼj pwaq, [...] mibʼan che niman te Dios, [...] ex mintiʼ in chewix kykʼuʼj, [...] ax in che ok meltzʼaj kyiʼj kyukʼil, txʼuʼj kywiʼ» (2 Timoteo 3:1-4).
Kyaj tqʼamaʼn Biblia tzeʼn kymod ex kybʼinchbʼen xjal tuʼn tten ex tuʼn jlu o tzaj nya bʼaʼn tiʼj clima. Mas in che ximen gobierno ex empresa tiʼj pwaq ex nya kyiʼj xjal. Mintiʼ in che ximen tiʼj tzeʼn kyanqʼibʼil xjal jaku ten toj ambʼil tzul. Axpe ikx aj in che aqʼunan junx, mintiʼ in mojeʼ twi kyyol tiʼjju jaku bʼant kyuʼn tuʼn miʼn tjaw kyaqax twitz Txʼotxʼ.
In tzaj tyekʼin profecía lu qa mlay chʼexpaj kymod xjal ex mlay tzʼok tilil kyuʼn tuʼn kyxqʼuqin tiʼj Txʼotxʼ. Axpe ikx in tzaj tqʼamaʼn Biblia qa mas che xeʼl qeju oʼkx in che ximen kyiʼjx toj il (2 Timoteo 3:13).
¿Tiquʼn jaku tzʼok qeʼ qkʼuʼj tiʼj qa kxel tbʼinchaʼn Dios tiʼj nya bʼaʼn lu?
In tzaj tqʼamaʼn Biblia qa a Jehová Bʼinchal qe a ex in tzaj ttziyen qa mlay naj Txʼotxʼ tuʼnju in ximen kyiʼj qeju in che anqʼin twitz. Qo xnaqʼtzan kyiʼj oxe versículo tkuʼx toj Biblia jatumel in tzaj tyekʼin qa kxel tbʼinchaʼn Dios tiʼj nya bʼaʼn in nok bʼinchaʼn tiʼj Txʼotxʼ.
1. Kubʼ tbʼinchaʼn Dios Txʼotxʼ «ex mya o bʼant tuʼn tuʼn tten noq kukx, noq oʼkx o tbʼincha tuʼn kyten xjal twitz» (Isaías 45:18).
Kjapunel twi t-ximbʼetz Dios at tiʼj Txʼotxʼ (Isaías 55:11). Taj Jehová tuʼn kukx kyanqʼin xjal twitz Txʼotxʼ, tuʼntzunju, mlay txi tqʼoʼn ambʼil te jun xjal tuʼn tkubʼ t-xiten.
2. «Atzun qe xjal mans che okel etzal teju txʼotxʼ, ex puro tuj txubʼtxaj che tel. [...] Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmos 37:11, 29).
In tzaj ttziyen Dios tuʼn kyanqʼin xjal twitz Txʼotxʼ te jumajx toj mujbʼabʼil.
3. «Atzun qeju bʼinchal mya bʼaʼn ex qe aj il, bʼiʼx che elex lajoʼn tuj [Txʼotxʼ] ex mintiʼ kyoklen tiʼj» (Proverbios 2:22).
In tzaj tqʼamaʼn Dios qa che kbʼel tnajsaʼn qe xjal in che bʼinchaʼn nya bʼaʼn, axpe ikx qeju in kubʼ kyxiten Txʼotxʼ.
Aju kbʼantel tuʼn Dios toj ambʼil tzul
¿Tzeʼntzun kbʼantel tuʼn Dios aju o tzaj ttziyen tiʼj Txʼotxʼ? Kbʼantel jlu tuʼn aj tajbʼen jun gobierno twitz tkyaqil Txʼotxʼ aju tok tbʼi Tkawbʼil Dios (Mateo 6:10). Aju Gobierno lu kkawil tzmax toj kyaʼj. Mlay txi tqanin permis te kykawbʼil xjal tuʼn t-xi tbʼinchaʼn tiʼj nya bʼaʼn in tzaj tiʼj Txʼotxʼ. Axpe ikx a Tkawbʼil Dios kʼokel te kyxel kykawbʼil xjal at jaʼlo (Daniel 2:44).
¡Tbʼanelxix tqanil kye kykyaqil xjal ex te tkyaqilju at twitz Txʼotxʼ! (Salmo 96:10-13). Qʼonka twitza tiʼjju kbʼantel tuʼn Jehová aj tajbʼen Tkawbʼil tuʼn:
Kbʼajel tbʼinchaʼn Dios chʼintl tkyaqilju at twitz Txʼotxʼ
Aju in tzaj tqʼamaʼn Tyol Dios: «Ktzalajel aju lugar mintiʼ kynajbʼil xjal tuj, ex aju tzqij txʼotxʼ ktzalajel nimxix ex che jawil poqʼl nim bʼech twitz» (Isaías 35:1).
¿Tzeʼntzun kʼonil jlu qiʼj toj ambʼil tzul? Kʼelel tiʼn Jehová nya bʼaʼn o tzʼok bʼinchaʼn tiʼj Txʼotxʼ, axpe ikx kʼokel te tbʼanel qeju lugar jatumel o bʼaj kyyajin xjal.
Ktel tipumal tibʼaj clima tuʼn miʼn ttzaj nya bʼaʼn tuʼn
Aju in tzaj tqʼamaʼn Tyol Dios: «Bʼiʼx takeʼ kyqʼiqʼ tuʼn Qman [Jehová] ex mintiʼ jaw pulwintl mar» (Salmos 107:29).
¿Tzeʼntzun kʼonil jlu qiʼj toj ambʼil tzul? At tipumal Jehová tibʼaj tkyaqilju at twitz txʼotxʼ. Ya mlay tzaj mas yajbʼil kyiʼj xjal tuʼn clima.
Qo tzajel t-xnaqʼtzaʼn tuʼn tok qxqʼuqin Txʼotxʼ
Aju in tzaj tqʼamaʼn Tyol Dios: «Kxel nqʼoʼne xnaqʼtzbʼil teya, kxel nqʼoʼne consej bʼaʼn teya, kxel nyekʼune teya alkye bʼe tuʼn t-xi tiʼna» (Salmos 32:8).
¿Tzeʼntzun kʼonil jlu qiʼj toj ambʼil tzul? Xi tqʼoʼn Jehová kyoklen xjal tuʼn kyxqʼuqin tiʼj Txʼotxʼ (Génesis 1:28; 2:15). Tzul tqʼoʼn Jehová xnaqʼtzbʼil qe tuʼntzun tbʼant aqʼuntl lu quʼn toj tumel. Kʼelel qnikʼ tiʼj tzeʼn jaku tzʼok qxqʼuqin tkyaqilju o kubʼ tbʼinchaʼn Jehová ex tuʼn miʼn tok qbʼinchaʼn nya bʼaʼn tiʼj.
a Jehová tbʼi Dios (Salmo 83:18, TNM). Qʼonka twitza tiʼj xnaqʼtzbʼil «¿Alkye Jehová?».
Bʼalo ax ikx tgana jlu
AJU XQʼUQIL
¿Okpe kbʼel kyxiten xjal Txʼotxʼ?
Nya oʼkx kyaj tqʼamaʼn Tyol Dios qa kʼokel bʼinchaʼn nya bʼaʼn tiʼj Txʼotxʼ, ax ikx tzaj tqʼamaʼn tiʼ kbʼajel tiʼj Txʼotxʼ toj ambʼil jaʼlo.
JUNJUNTL XNAQʼTZBʼIL
¿Alkye kkolil tiʼj Txʼotxʼ?
In tzaj kyqʼamaʼn junjun xjal at kyojtzqibʼil tiʼjju in bʼaj tiʼj Txʼotxʼ, qa in nok kybʼinchaʼn xjal nya bʼaʼn tiʼj ex tuʼn jlu jaku che kubʼ naj junjun clase txkup, tzeʼ ex junjuntl tiʼchaq.
¡KUKX QO XQʼUQIN!
Mintiʼxix in kubʼ jbʼal | ¿Tiʼ in tzaj tqʼamaʼn Biblia tiʼj jlu?
¿Jakupe txi bʼinchet tiʼj? ¿Tiʼ kbʼajel toj ambʼil tzul?
JUNJUNTL XNAQʼTZBʼIL
Aj ttzaj xitbʼil tuʼnx twitz txʼotxʼ: ¿jakupe tzʼonin Biblia kyiʼj qeju otoq tzaj nya bʼaʼn kyiʼj?
Jaku che onin consej in tzaj tqʼoʼn Biblia tiʼja naʼmxtoq ttzaj jun xitbʼil tuʼnx twitz txʼotxʼ, aj ttzaj ex aj tikʼ.
QE XNAQʼTZBʼIL NIM KYOKLEN TOJ TYOL DIOS
¿Tiʼ aju Tkawbʼil Dios?
Tej tten Jesús twitz Txʼotxʼ, mas yolin tiʼj Tkawbʼil Dios toj tpakbʼabʼil. Toj nimku ambʼil, o txi kyqanin xjal toj kynaʼj Dios tuʼn tul Tkawbʼil Dios.
AJU XQʼUQIL
¿Tiʼ kbʼantel tuʼn Tkawbʼil Dios?
Ojtzqiʼntoq tuʼn Jesús qa oʼkx Tkawbʼil Dios kxel bʼinchante tiʼj tkyaqil nya bʼaʼn at twitz Txʼotxʼ. ¿Tiʼ o bʼant tuʼn Kawbʼil lu tuʼntzun tok qeʼ qkʼuʼj tiʼj?
