¿Tiʼ in nul toj t-ximbʼetza aj t-ximana tiʼj jun xjal in tzaj bʼaj tkʼuʼj? a Bʼalo in nok tena ximel tiʼj jun xjal in tzaj xobʼ, tiʼj jun xjal kwest tuʼn tjaw weʼ te prim moqa tiʼj jun xjal oʼkx in yolin tiʼj tkyaqilju in tzaj bʼaj tkʼuʼj tiʼj.

 At maj in bʼant jlu kyuʼn xjal aj ttzaj bʼaj kykʼuʼj. Pero o tzʼel kynikʼ xjal in che xnaqʼtzan tiʼj qa ateʼ junjuntl xjal in kubʼ kyyekʼin junxitl kymod aj ttzaj bʼaj kykʼuʼj, mas qeju xinaq. In tzaj tqʼamaʼn jun xnaqʼtzbʼil qa «mas in najbʼen qʼeʼn, qe pastilla moqa droga kyuʼn [xinaq] tuʼn miʼn ttzaj bʼaj kykʼuʼj. Tuʼntzunju, qa at jun xjal in kʼan qʼeʼn, bʼalo in bʼant jlu tuʼn tuʼnju in bʼaj juntl tiʼ tiʼj. Ex chʼixmi tkyaqil maj mas in tzaj kyqʼoj xinaq qa in bʼaj kykʼuʼj kyiʼj junjun tiʼchaq».

 Nya kykyaqil xinaq in kubʼ kyyekʼin ax kymod. Noqtzun tuʼnj, chʼixmi kykyaqil xjal in tzaj bʼaj kykʼuʼj tuʼnju in qo anqʼin kyoj «mankbʼil tqʼijlalil» (2 Timoteo 3:1). Qa in tzaj bʼaj teya tkʼuʼj, ¿jakupe tzʼonin Tyol Dios tiʼja?

 Ateʼ nim consej toj Biblia ex jaku che onin qiʼj tuʼn miʼn ttzaj bʼaj qkʼuʼj. Qo yolin tiʼj oxe consej:

1.  1. «Miʼn bʼaj kykʼuʼje tiʼj ju te nchiʼj, porke aju te nchiʼj texte tbʼis ktzajel. Aju nnikʼx quʼn tuj jun qʼij, akuxju» (Mateo 6:34).

    ¿Tiʼ t-xilen?: Mas bʼaʼn tuʼn miʼn ttzaj bʼaj qkʼuʼj kyiʼj tiʼchaq jaku che tzaj. Nim maj in tzaj bʼaj qkʼuʼj kyiʼj junjun tiʼchaq ex mintiʼ in che bʼaj. Axpe ikx, at maj in qo jaw labʼin kyiʼj junjun tiʼchaq tuʼnju mas tbʼanel in che ok.

    ¿Jakupe bʼant jlu tuʼna?: Ximana tiʼj jun ambʼil jatumel kubʼ tnaʼna qa tuʼn ttzaj jun nya bʼaʼn tiʼja, pero ya mintiʼ bʼaj. Tibʼajxi jlu, ximana tiʼjju in tzaj bʼaj tkʼuʼja tiʼj toj ambʼil jaʼlo. Tenx t-ximbʼetza toj tumel ex bʼaʼn tuʼn tkubʼ t-xjelina jlu: «¿Tiquʼn in kubʼ nximane qa jaku tzaj mas nya bʼaʼn tuʼn jlu?».

2.  2. «Aju kʼuxbʼil, in japun ttziʼ tuʼn juntl kʼuxbʼil, ex aju xjal nnoʼk tnabʼl tuʼn t-xnaqʼtzbʼil juntl xjal» (Proverbios 27:17).

    ¿Tiʼ t-xilen?: Jaku che onin toj qja ex qamiw qiʼj tuʼn miʼn ttzaj bʼaj qkʼuʼj..., pero oʼkx jaku bʼant jlu kyuʼn qa ma txi qqʼoʼn ambʼil kye. Bʼalo o che ok weʼ twitz jun ambʼil ik tzeʼn qe ex jaku tzaj kyqʼoʼn junjun qconsej. Jaku tzʼok qeʼ qkʼuʼj tiʼj qa jaku che onin qiʼj tuʼn tten qximbʼetz toj tumel tiʼjju in bʼaj qiʼj.

    ¿Jakupe bʼant jlu tuʼna?: Ximana tiʼj jun xjal jaku tzaj tqʼoʼn jun tbʼanel consej teya. Jun techel, bʼalo at jun tamiwa o tzʼok weʼ twitz jun ambʼil ik tzeʼn teya. Qaninxa te alkyeqe tiʼchaq onin tiʼj ex alkyeqe mintiʼ.

3.  3. «Tkyaqilju in bʼaj kykʼuʼje tiʼj, kyqʼonxe tuj tkwent Dios, porke ate Dios kwentil kyeye» (1 Pedro 5:7).

    ¿Tiʼ t-xilen?: In ximen Dios kyiʼj kykyaqil qeju in che ok weʼ twitz nya bʼaʼn. In tzaj tqʼamaʼn qe tuʼn t-xi qqʼamaʼn tkyaqilju tkuʼx toj qanmi te ex tkyaqilju in tzaj bʼaj qkʼuʼj tiʼj.

    ¿Jakupe bʼant jlu tuʼna?: Bʼinchama jun lista kyiʼj tiʼchaq in tzaj bʼaj tkʼuʼja kyuʼn. Tibʼajxi jlu, qʼamanxa tkyaqil te Dios ex qaninxa te tiʼ jaku bʼant tuʼna tiʼjju in nok weʼya twitz.

 Nya oʼkx in tzaj tqʼoʼn Biblia tbʼanel consej qe tuʼn miʼn ttzaj bʼaj qkʼuʼj, sino ax ikx in tzaj tqʼamaʼn qa toj chʼintl ambʼil kʼelel tiʼn Dios tkyaqil nya bʼaʼn tuʼntzun miʼn ttzaj bʼaj qkʼuʼj. Pero, ¿tzeʼn kbʼantel jlu tuʼn?

 Kʼelel tiʼn tkawbʼil Dios tkyaqil nya bʼaʼn in tzaj bʼaj qkʼuʼj tuʼn (Apocalipsis 21:4). Nya oʼkxju, aj qanqʼin tjaqʼ tkawbʼil Dios mlay tzaj qbʼis aj ttzaj qnaʼn qe tiʼchaq in tzaj bʼaj qkʼuʼj tuʼn toj ambʼil jaʼlo (Isaías 65:17).

 Atzun jlu in tzaj ttziyen «Dios [teya] aju qʼolte qmojbʼabʼl qibʼ» (Romanos 16:20). Bʼintza qe yol lu in tzaj tqʼamaʼn qe: «Bʼaʼn wuʼne alkye nximbʼetze kyiʼje; ximan wuʼne tuʼn nbʼinchanteye bʼaʼn kyiʼje ex mya tuʼn nbʼinchanteye mya bʼaʼn. In xi nmaʼne jlu tuʼntzun tqeʼ kykʼuʼje tiʼj oybʼil, ex mas bʼaʼn che tele te yajxitl» (Jeremías 29:11).