Jaku kubʼ qximen qa kjawil kyjyoʼn científico opción A, atzun qeju xjal at jun kyokslabʼil aju opción B.

 Pero nya tkyaqil maj in bʼaj jlu.

 Ateʼ nim xjal o tzʼetz kyxnaqʼtzbʼil, axpe ikx junjun científico, mintiʼ in nok qeʼ kykʼuʼj tiʼj evolución.

 Qo ximen tiʼj Gerard Hertel jun profesor te Entomología. Tej t-xnaqʼtzan toj universidad tzaj yekʼin xnaqʼtzbʼil tiʼj evolución te. Tqʼama jlu: «Tej t-xi nqʼoʼne tzaqʼwebʼil kyiʼj xjel toj examen, kubʼ ntzʼibʼine aju otoq tzaj kyxnaqʼtzaʼn profesor weye pero mintiʼtoq in nok qeʼ nkʼuʼje tiʼj».

 ¿Tiquʼn mintiʼ in nok qeʼ kykʼuʼj junjun científico tiʼj evolución? Tuʼn tkanet tzaqʼwebʼil quʼn tiʼj xjel lu, qo xnaqʼtzan tiʼj kabʼe xjel naʼmx tkanet tzaqʼwebʼil kyiʼj kyuʼn científico. Tnejel, ¿tzeʼn tzaj tzyet qanqʼibʼil? ex tkabʼin, ¿jatumel o che tzaj tiʼchaq at kychwinqlal?

 AJU IN TZAJ KYQʼAMAʼN JUNJUN XJAL: Noq minabʼen tzaj tzyet anqʼibʼil kyiʼj tiʼchaq mintiʼ kychwinqlal.

 ¿TIQUʼN MINTIʼ IN NOK QEʼ KYKʼUʼJ TXQANTL TIʼJ XIMBʼETZ LU? Toj ambʼil jaʼlo, mas o tzʼel kynikʼ científico kyiʼj tiʼchaq at kychwinqlal. Pero, naʼmx tkanet tzaqʼwebʼil kyuʼn tiʼj xjel lu: ¿Tiʼtzun aju chwinqlal? Junxitl jun célula kywitz tiʼchaq mintiʼ kychwinqlal.

 Oʼkx jaku tzaj kyqʼamaʼn científico jun kyximbʼetz tiʼj tzeʼn keʼyin Txʼotxʼ atxix ma bʼaj nim millón abʼqʼi. At junxichaq kyximbʼetz tiʼj tzeʼn tzaj tzyet anqʼibʼil. Ateʼ junjun in tzaj kyqʼamaʼn qa tzaj tzyet anqʼibʼil toj jun volcán, atzun junjuntl in tzaj kyqʼamaʼn qa tzaj tzyet toj mar. Ax ikx in tzaj kyqʼamaʼn junjuntl qa atz tzaj tzyet anqʼibʼil toj juntl lugar ex qa yajxitl e ul kyoj meteorito tzalu twitz Txʼotxʼ. Mintiʼ ttxolil mankbʼil xnaqʼtzbʼil lu, tuʼnju oʼkx in tzaj tqʼamaʼn qa tzaj tzyet anqʼibʼil toj juntl lugar, pero mintiʼ in tzaj tqʼamaʼn tzeʼn tzaj tzyet.

 In tzaj kyqʼamaʼn junjun científico qa atz tzaj tzyet ADN kyiʼj junjun molécula. Qa ikju, maslo nya kwest tuʼn kyel molécula kyiʼj tiʼchaq mintiʼ kychwinqlal ex maslo nya kwest tuʼn tchmet kybʼaj kyunx kyibʼ. Noqtzun tuʼnj, mintiʼ o kanet tqanil kyuʼn científico kyiʼj molécula lu ex mintiʼ o bʼant tbʼinchet kyuʼn.

 Junxitl qe tiʼchaq at kychwinqlal tuʼnju in xi kykʼuʼn junjun tqanil ex in najbʼen kyuʼn. Tuʼn tonbʼil ADN in xi kyqʼoʼn célula junjun tqanil kyxolx, in nel kynikʼ tiʼj ex in xi kybʼinchaʼn. Axpe ikx in tzaj kyqʼamaʼn científico qa in nok célula ik tzeʼn jun computadora ex qa in nok ADN ik tzeʼn jun programa in najbʼen computadora tuʼn. Noqtzun tuʼnj, mintiʼ in tzaj tqʼamaʼn xnaqʼtzbʼil tiʼj evolución jatumel tzaj tqanil tokx toj ADN.

 Nimxix kyoklen proteína tuʼn kyaqʼunan célula. Toj jun proteína at nim syent aminoácido ex nukʼuʼn kyten. Nya oʼkxju, ax ikx il tiʼj tuʼn tchʼexpaj proteína tuʼntzun taqʼunan toj tumel. In tzaj kyqʼamaʼn junjun xjal at kyojtzqibʼil qa kwest tuʼn tok qeʼ qkʼuʼj tiʼj qa tjunalx jun proteína tzaj tzyet tuʼn tanqʼin. In tzaj tqʼamaʼn físico Paul Davies jlu: «At nim mil proteína tokx toj jun célula, tuʼntzunju, kwest tuʼn tkubʼ qximen qa noq minabʼen tzaj tzyet tuʼn kyanqʼin».

 TOJ CHʼIN YOL: Atxix ojtxe o che xnaqʼtzan científico kyiʼj junjun tiʼchaq ex o tzʼel kynikʼ tiʼj qa oʼkx jaku tzʼel jun chwinqlal tiʼj juntl chwinqlal.

 AJU IN TZAJ KYQʼAMAʼN JUNJUN XJAL: Chebʼe chʼexpaj tnejel tiʼ at tchwinqlal ex ok te junxichaq txkup, axpe ikx ok te jun xjal. Bʼaj tkyaqil jlu tuʼn evolución.

 ¿TIQUʼN MINTIʼ IN NOK QEʼ KYKʼUʼJ TXQANTL TIʼJ XIMBʼETZ LU? Ateʼ junjun célula mas kwest tuʼn tel qnikʼ kyiʼj kywitz junjuntl. In tzaj tqʼamaʼn xnaqʼtzbʼil tiʼj evolución qa in che ok célula nya kwest tuʼn tel qnikʼ kyiʼj te célula kwest tuʼn tel qnikʼ tiʼj. In tzaj tqʼamaʼn Britannica Online Encyclopedia, qa «atzun tkabʼin xnaqʼtzbʼil lu mas kwest tuʼn tel qnikʼ tiʼj toj evolución. Atzun tnejel xnaqʼtzbʼil kwest tuʼn tel qnikʼ tiʼj, aju tzeʼn tzaj tzyet anqʼibʼil».

 O tzʼel kynikʼ científico tiʼj qa in che aqʼunan junjun molécula toj jun célula ik tzeʼn jun máquina. Aqe molécula lu, bʼinchaʼn maj qe kyuʼn proteína ex in che aqʼunan junx. Jun techel, in xi kyiʼn nutriente toj célula, in nok kyqʼoʼn te ipumalj, in bʼaj kyqʼanin junjun plaj célula ex in xi kyiʼn junjun tqanil toj. ¿Jakupe kubʼ qximen qa tuʼn evolución e bʼant molécula ex tkyaqilju in bʼant kyuʼn? Nim xjal mintiʼ in nok qeʼ kykʼuʼj tiʼj jlu.

 In xi tzyet tchwinqlal jun txkup ex jun xjal aj tokx jun espermatozoide toj jun óvulo. Aj tbʼaj jlu, in chmet kybʼaj célula ex in bʼaj kybʼinchaʼn kyten tuʼn kyok te junjun plaj t-xmilal jun xjal moqa te jun txkup. Atzunte xnaqʼtzbʼil tiʼj evolución, mintiʼ in tzaj tqʼamaʼn tzeʼn «ojtzqiʼn» tuʼn jun célula tiʼ kbʼantel tuʼn ex jatumel ktel toj t-xmilal jun xjal.

 Ya o tzʼel kynikʼ científico tiʼj qa il tiʼj tuʼn tbʼant junjun chʼixpubʼil kyoj célula tuʼntzun tok jun txkup te juntl txkup. Pero mintiʼ o tzaj kyqʼamaʼn científico qa o bʼant jun célula tuʼn evolución. Qa ikju, ¿bʼaʼnpe tuʼn tok qeʼ qkʼuʼj tiʼj qa e bʼant txkup tuʼn evolución? Tej tyolin profesor te Biología Michael Behe tiʼj kyxmilal txkup, tqʼama jlu: «O tzʼel kynikʼ xjal tiʼj qa tbʼanel kyxmilal txkup ex qa kwest tuʼn tel qnikʼ tiʼj tzeʼn o bʼaj bʼinchaʼn. Noqtzun tuʼnj, naʼmx tel kynikʼ tiʼj tzeʼn e bʼant txkup lu qa mintiʼ jun Bʼinchal kye».

 Jaku tzʼel kynikʼ xjal tiʼjju in bʼaj kytxlaj ex tiʼjju in bʼaj kyiʼj. Ax ikx, jaku che ximen ex jaku ten tbʼanel kymod ik tzeʼn tuʼn kybʼinchan xtalbʼil, tuʼn kyonin kyiʼj txqantl ex tuʼn tel kynikʼ tiʼj bʼaʼn ex tiʼj nya bʼaʼn. Mintiʼ in tzaj tchikʼbʼaʼn xnaqʼtzbʼil tiʼj evolución tiquʼn junxitl qe xjal.

 TOJ CHʼIN YOL: Ateʼ nim xjal in nok qeʼ kykʼuʼj tiʼj evolución. Atzun junjuntl, mintiʼ in nok qeʼ kykʼuʼj tiʼjju in tzaj tqʼamaʼn evolución tiʼj tzeʼn tzaj tzyet qanqʼibʼil moqa tiʼj tzeʼn o qo bʼant.

 Tej otoqxi tzʼel kynikʼ junjun xjal kyiʼj yekʼbʼil, o tzʼok qeʼ kykʼuʼj tiʼj qa at jun Bʼinchal qe ex at nimxix tnabʼil. Jun kyxol qe xjal lu at Antony Flew, jun profesor te Filosofía, tnejel ok qeʼ tkʼuʼj tiʼj qa mintiʼ Dios at. Pero tej tok tkeʼyin qa kwest tuʼn tel qnikʼ kyiʼj txkup ex kyiʼj ley tiʼj universo, chʼexpaj t-ximbʼetz. Tej tyolin tiʼjju tqʼama jun filósofo, kubʼ ttzʼibʼin jlu: «Bʼaʼn tuʼn tok qeʼ qkʼuʼj tiʼj tqanil otoq tzʼel qnikʼ tiʼj noq jaxku tumel in qox tiʼn». Kyuʼn yekʼbʼil el tnikʼ Antony Flew tiʼj, ok qeʼ tkʼuʼj tiʼj qa at jun Bʼinchal qe.

 Chʼixmi ax jlu el tnikʼ Gerard Hertel tiʼj, aju ma qo yolin tiʼj tej saj tzyet xnaqʼtzbʼil. Maske etz nim t-xnaqʼtzbʼil ex otoq tzʼok te profesor te Entomología, tqʼama jlu: «Mintiʼ e kanet yekʼbʼil wuʼne qa atz tzaj tzyet anqʼibʼil tiʼj jun tiʼ mintiʼ tchwinqlal. Tej tel nnikʼe tiʼj qa tbʼanel bʼinchaʼn qe txkup ex qa kwest tuʼn tel qnikʼ kyiʼj, ok qeʼ nkʼuʼje tiʼj qa at jun Bʼinchal qe».

 Jaku tzʼel qnikʼ tiʼj jun artista qa ma qo xnaqʼtzan tiʼjju in bʼant tuʼn. Atzun jlu bʼant tuʼn Gerard, el tnikʼ kyiʼj tbʼanel tmod Bʼinchal qe tuʼnju xnaqʼtzan kyiʼj tbʼinchbʼen. Nya oʼkxju, ax ikx xnaqʼtzan tiʼj Biblia, jun uʼj tzajni tukʼil Bʼinchal qe (2 Timoteo 3:16). Toj uʼj lu, el tnikʼ tiʼj jatumel tzaj tzyet qanqʼibʼil ex tzeʼn jaku qo ex kywitz nya bʼaʼn toj ambʼil jaʼlo. Tuʼn jlu, ok qeʼ tkʼuʼj tiʼj qa kubʼ bʼinchaʼn Biblia tuʼn jun xjal at nim tnabʼil.

 Ik tzeʼn el tnikʼ Gerard tiʼj, bʼaʼn tuʼn tok qqʼoʼn qwiʼ kyiʼj tzaqʼwebʼil in tzaj tqʼoʼn Tyol Dios. Tuʼntzunju, in xi qqʼoʼne txokbʼil tiʼja tuʼn tbʼant jlu tuʼna.