Qa ma tzʼel qʼiʼn taqʼun jun xjal, nya okx in kubʼ tnaʼn qa mintiʼ tpwaq, sino ax ikx in tzaj nya bʼaʼn tiʼj, kyiʼj toj tja ex in tzaj tbʼis. Qa a jlu in bʼaj tiʼja, xnaqʼtzana kyiʼj junjun consej in che tzaj qʼamaʼn toj xnaqʼtzbʼil lu ex jaku che onin tiʼja.

•   Qʼamanxa kye txqantl tiʼ in kubʼ tnaʼna.

   Aju in tzaj tqʼamaʼn Tyol Dios: «Aju tamiw jun xjal kukx in ten tkʼujlalil tiʼj» (Proverbios 17:17).

   Aj tel qʼiʼn taqʼun jun xjal, jaku tzaj tqʼoj, jaku tzaj tbʼis ex jaku kubʼ tnaʼn qa mintiʼ toklen. Tuʼntzunju qa ma tzʼel qʼiʼn taqʼuna, qʼamanxa kye toj tjaya ex kye tamiwa tiʼ in kubʼ tnaʼna, jaku tzʼonin jlu tiʼja tuʼn miʼn ttzaj tbʼisa. Ax ikx jaku che onin tiʼja tuʼn tkanet juntl taqʼuna.

•   Miʼn txi tqʼoʼna ambʼil tuʼn ttzaj nim tbʼisa.

   Aju in tzaj tqʼamaʼn Tyol Dios: «Miʼn bʼaj kykʼuʼje tiʼj ju te nchiʼj, porke aju te nchiʼj texte tbʼis ktzajel» (Mateo 6:34).

   In tzaj tqʼamaʼn Tyol Dios qe tuʼn qximen tnejel tiʼjju kbʼantel quʼn (Proverbios 21:5). Ax ikx in tzaj tqʼamaʼn qe tuʼn miʼn ttzaj bʼaj qkʼuʼj tiʼj ambʼil tzul. At maj in tzaj bʼaj qkʼuʼj kyiʼj tiʼchaq mintiʼ in che bʼaj qiʼj. Tuʼntzunju, mas bʼaʼn tuʼn qximen tiʼjju kbʼantel quʼn toj junjun qʼij.

   In tzaj tqʼoʼn Biblia junjun consej qe tuʼn miʼn ttzaj estrés qiʼj. Tuʼn tel mas tnikʼa tiʼj jlu, jaku jaw tuʼjina xnaqʼtzbʼil «¿Tiʼ jaku bʼant quʼn tuʼn miʼn ttzaj bʼaj qkʼuʼj?».

•   Bʼinchama junjun chʼixpubʼil.

   Aju in tzaj tqʼamaʼn Tyol Dios: «Tuj tkyaqil xnaqʼtzaʼmaj qine, [...] qa tuʼn ntene nim at weye, ex qa tuʼn ntene mintiʼ at weye» (Filipenses 4:12).

   Bʼaʼn tuʼn tbʼant junjun chʼixpubʼil tuʼna jaʼlo. A t-xilen jlu qa knaqʼetela tuʼn miʼn ttzaj tlaqʼoʼna junjun tiʼchaq ex tuʼn tanqʼina tukʼilju at teya, tzʼok tilil tuʼna tuʼn miʼn tkyaja tjaqʼ kʼas (Proverbios 22:7).

   Tuʼn tel mas tnikʼa tiʼj tzeʼn tuʼn tnaqʼeta tiʼj akʼaj tanqʼibʼila, jaku jaw tuʼjina xnaqʼtzbʼil «¿Tzeʼn jaku qo anqʼin tukʼil nya nim tiʼchaq?».

•   Tzʼajbʼenx ambʼil tuʼna toj tumel.

   Aju in tzaj tqʼamaʼn Tyol Dios: «Tenx kynabʼle [...]; tzʼajbʼenxwit tkyaqil qʼij kyuʼne tuʼn kybʼinchanteye ju bʼaʼn» (Colosenses 4:5).

   Maske ya mintiʼ jun taqʼuna, tzʼok tilil tuʼna tuʼn t-ximana tiʼj tzeʼn in najbʼen ambʼil tuʼna. Qa ma bʼant jlu tuʼna, ktel ttxolil tanqʼibʼila ex kbʼel tnaʼna bʼaʼn.

•   Bʼaʼn tuʼn tnaqʼeta tiʼj alkyexku aqʼuntl.

   Aju in tzaj tqʼamaʼn Tyol Dios: «Aju xjal in aqʼnan, at tkambʼabʼl tiʼj jlu» (Proverbios 14:23).

   Bʼaʼn tuʼn t-xi t-xnaqʼtzan tibʼa tuʼn tnaqʼeta tiʼj junxitl aqʼuntl. Bʼalo jaku kanet jun taqʼuna jatumel nya nim twi tkʼuʼja ktzajel chjoʼn moqa nyaxix tbʼanel aqʼuntl.

•   Miʼn kubʼ numja.

   Aju in tzaj tqʼamaʼn Tyol Dios: «Awan kuʼxa tiyaja te prim, ax ikx te qale, porke mintiʼ bʼaʼn tuʼna alkye jaku tzʼel mas bʼaʼn» (Eclesiastés 11:6).

   Kukx jyona tiʼj taqʼuna ex qʼamanxa kye txqantl qa in jyona tiʼj jun aqʼuntl. Yolina kyukʼil tfamiliara, kyukʼil tvecina, kyukʼil xjal ojtzqiʼn kywitz tuʼna ex kyukʼil qeju o tzʼaqʼunana junx kyukʼil. Ax ikx, jaku txiʼya kyoj agencia ex jaku tzʼok tbʼiʼna qe anuncio tiʼj aqʼuntl toj Internet moqa toj periódico. Bʼaʼn tuʼn ttzaj tnaʼna qa jaku tzaj qanin junjun solicitud teya ex jaku txiʼya toj junjun entrevista.