At nim nya bʼaʼn twitz tkyaqil Txʼotxʼ toj ambʼil jaʼlo, mas mintiʼ in kanet wabʼj kyuʼn xjal tuʼnju kukx in nok qʼoj toj tnam Ucrania ex tuʼnju at nimxix kyaq. Mas mintiʼ in kanin wabʼj kyuʼn xjal kyoj tnam aqeju tzma in che chʼiy.

•   «Ya mintiʼxix in netz bʼinchaʼn wabʼj ex mas ma kubʼaj aju otoq tzʼetz bʼinchaʼn tuʼnju in nok qʼoj, tuʼnju at nimxix kyaq, tuʼnju ma jax twiʼ luz ex tuʼn junjuntl tiʼchaq» (chi António Guterres, secretario general de las Naciones Unidas, 17 te julio te 2023).

•   «In tzaj kyqʼamaʼn xjal at kynabʼil tiʼj jlu qa tuʼnju ya mintiʼ xi tqʼoʼn tnam Rusia ambʼil te tnam Ucrania tuʼn tetz wabʼj tuʼn, mas mlay kanin wabʼj ex mas kjawix twiʼ kyoj tnam mintiʼxix at kye, ik tzeʼn qe tnam te jawni te África ex kyoj tnam te Oriente Medio» (chi Atalayar.com, 23 te julio te 2023).

 Bʼaʼn tuʼn tel tnikʼa tiʼjju in tzaj tqʼamaʼn Tyol Dios tiʼj tiquʼn mintiʼ in kanin wabʼj ex tiʼ kbʼajel toj ambʼil tzul.

•   Kyaj tqʼamaʼn Jesús: «Qe xjal tuj jun nasyon che qʼojlel tiʼj juntl nasyon, ex che qʼojlel qe tnam kyiʼj txqantl tnam; ex noq jachaq tzul [...] weʼyaj» (Mateo 24:7).

•   In yolin uʼj te Apocalipsis tiʼj kyaje xjal ateʼkx tibʼaj chej ex noq in che kubʼ qʼoʼn te techel junjun tiʼchaq. Jun kyxol jlu in nok te techel qʼoj ex atzun juntl in nok techel weʼyaj. Kyaj qʼamaʼn toj Tyol Dios qa tzultoq jun ambʼil jatumel noq ktzajel maloʼn wabʼj ex qa kjawix nimxix twiʼ. In tzaj tqʼamaʼn jlu: «Xi nkaʼyiʼn jun chej qʼaq kaʼyin. Ex atzin nchejin tibʼaj qʼintaq jun malbʼil toj tqʼobʼ. Ex [...] nbʼiy jun tqʼajqʼojil yol ntqʼmaʼn: Manyor wiʼyil tkyaqil kywaʼy jaʼlin. Quʼn jun tal malbʼil triy, mo oxe tal malbʼil nmaq triy, te twiʼ kykʼuʼja te jun qʼij» (Apocalipsis 6:5, 6, Akʼaj Tuʼjil Tyol qMan).

 In japun kywiʼ profecía lu toj ambʼil jaʼlo ex in nok tqʼoʼn Tyol Dios tbʼi te: «Mankbʼil tqʼijlalil» (2 Timoteo 3:1). Qa taja tuʼn tel chʼintl tnikʼa tiʼj «mankbʼil tqʼijlalil», jaku tzʼok tqʼoʼna twitza tiʼj video Chʼexpaj tkyaqil toj abʼqʼi 1914 ex jaku t-xi tjyoʼna xnaqʼtzbʼil «¿Alkyeqe kyaje xjal in che chejin?».

•   In tzaj tqʼoʼn Tyol Dios junjun consej qe ex in che onin aj qok weʼ twitz ambʼil kwest ik tzeʼn qa mintiʼ in kanin qwa moqa ik tzeʼn aj tjax twiʼ wabʼj. Jaku tzʼok tqʼoʼna twitza kyiʼj junjun consej lu toj xnaqʼtzbʼil «¿Tzeʼn jaku qo anqʼin tukʼil nya nim tiʼchaq?».

•   Ax ikx in tzaj tqʼuqbʼaʼn Tyol Dios qkʼuʼj aj ttzaj tqʼamaʼn qa kxel bʼinchaʼn tiʼj nya bʼaʼn toj ambʼil tzul. In tzaj ttziyen qa «kchmetel nim twitz triw tuj txʼotxʼ lu» ex mi jun ktel weʼyaj tiʼj (Salmo 72:16). Qa taja tuʼn tel chʼintl tnikʼa tiʼj tbʼanel ambʼil in ttzaj ttziyen Dios qe ex tiʼj tiquʼn jaku tzʼok qeʼ tkʼuʼja tiʼj, jyonxa xnaqʼtzbʼil «¿Atpe jun tbʼanel ambʼil tzul?».