Aʼyeju huracán, qe tifón, qe ciclón ex qe tornado in tzaj kyiʼn nim nya bʼaʼn ik tzeʼn a tjaw chʼiy aʼ ex mar. Aj tzaj nim jbʼal in tzaj qotxʼ tuʼn ex aj ttzaj qʼankyoq in che tzʼeʼy nim tzeʼ tuʼn. Nya oʼkx jlu, sino ax ikx qa mintiʼ jbʼal, qa at nim kyaq ex qa in kubʼ nim nieve, in tzaj nim xitbʼil kyuʼn. Nim millón xjal o tzaj nimxix nya bʼaʼn kyiʼj kyuʼn xitbʼil lu. ¿O bʼaj jlu tiʼja jun maj?

 Toj nimku tnam, kukx in che tzaj xitbʼil tuʼnx twitz txʼotxʼ ex mas in tzaj nya bʼaʼn kyiʼj xjal tuʼn. Tzaj qʼoʼn tqanil lu tuʼn Federación Internacional de Sociedades de la Cruz Roja ex tuʼn Media Luna Roja: «Kukx in chʼiy kyajlal xjal in tzaj nya bʼaʼn kyiʼj tuʼn jbʼal, tuʼnju in chʼiy aʼ moqa aj ttzaj qʼijel. Ax ikx, in tzaj nya bʼaʼn tiʼj tkyaqilju at tajbʼen qe tuʼn qanqʼin ex in kyaj kykolin xjal kyja tuʼn kyxiʼ anqʼil toj juntl tnam tkyaqil abʼqʼi».

 Aʼyeju in che ok weʼ kywitz tiʼchaq lu in tzaj nya bʼaʼn tiʼj kyxmilal ex in tzaj kybʼis. Nim kye in naj kyja, qe tiʼchaq kye, axpe ikx in kyim jun toj kyja.

 ¿Ope bʼaj jlu tiʼja jun maj? Jaku tzʼonin Biblia tiʼja. O tzʼonin kyiʼj nim millón xjal. ¿Tzeʼn o bʼant jlu tuʼn? O txi tqʼoʼn qʼuqbʼil kykʼuʼj ex qe consej nim kyoklen (Romanos 15:4). Nya oʼkxju, ax ikx in tzaj tqʼoʼn Biblia tzaqʼwebʼil kyiʼj xjel ik tzeʼn jlu: ¿tiquʼn in tzaj tqʼoʼn Dios ambʼil tuʼn kybʼaj tiʼchaq lu?, ¿junpe kastiw jlu tuʼn Dios?

 Nya tuʼn Dios in tzaj yajbʼil kyiʼj xjal. In tzaj tqʼamaʼn Biblia jlu: «Mlay bʼant tuʼn tok Dios tuj joybʼil tiʼj tuʼn tbʼinchante aju mya bʼaʼn, ex mi jun nnoʼk tuj joybʼil tiʼj tuʼn Dios» (Santiago 1:13). A jlu in tzaj tyekʼin qe qa nya a Dios at tpaj tiʼj yajbʼil in tzaj kyiʼj xjal tuʼn xitbʼil tuʼnx twitz txʼotxʼ.

 In tzaj tqʼamaʼn Biblia qa ajbʼen tipumal tbʼinchbʼen Dios tuʼn tuʼn tkubʼ tqʼoʼn kykastiw xjal mintiʼ e nimen te. ¿Tiquʼn junxitl nya bʼaʼn tzaj ojtxe aju in yolin Biblia tiʼj twitzju nya bʼaʼn in tzaj toj ambʼil jaʼlo? Tuʼnju toj ambʼil jaʼlo noq minabʼen in che tzaj xitbʼil tuʼnx twitz txʼotxʼ kyiʼj xjal bʼaʼn ex nya bʼaʼn. Atzun toj ambʼil ojtxe, ya otoq tzaj tqʼamaʼn Dios tiʼ kbʼajel, tzaj tqʼamaʼn tiquʼn ex kolin kyiʼj qeju tbʼanel xjal. Jun techel, tej ttzaj tiʼn Jehová diluvio toj tqʼijlalil Noé, bʼant oxe tiʼ tuʼn: tnejel, naʼmxtoq tbʼaj jlu ya otoq txi tqʼamaʼn Dios tiʼ kbʼajel, tkabʼin, xi tqʼamaʼn tiquʼn ex toxin, kolin tiʼj Noé ex kyiʼj toj tja (Génesis 6:13; 2 Pedro 2:5).

 Tuʼn tel mas tnikʼa tiʼj xnaqʼtzbʼil lu, qʼonka twitza tiʼj «¿Tiʼ in tzaj tqʼamaʼn Tyol Dios kyiʼj xitbʼil in che tzaj?».

 In tzaj tqʼamaʼn Biblia qa kʼujlaʼn qoʼ tuʼn Jehová a ex qa in tzaj tbʼis aj ttzaj yajbʼil qiʼj. Qʼonka twitza tiʼj kabʼe techel lu.

•   Isaías 63:9: «Tuj tkyaqil yajbʼil tzaj kyiʼj, ax ikx te [Dios] o yajlanjtz».

   Aju t-xilen: In tzaj tbʼis Jehová aj ttzaj yajbʼil qiʼj.

•   1 Pedro 5:7: «Porke ate Dios kwentil kyeye».

   Aju t-xilen: Taj Jehová tuʼn qten toj bʼaʼn.

 Tuʼnju kʼujlaʼn qe xjal tuʼn Jehová taj tuʼn tonin kyiʼj. ¿Alkye tten in che tzaj tonin? Tukʼil Biblia. Toj Tyol Dios in che kanet tbʼanel consej quʼn ex qʼuqbʼil qkʼuʼj tiʼj ambʼil tzul, jatumel ya mlay che tzaj xitbʼil tuʼnx twitz txʼotxʼ (2 Corintios 1:3, 4).

 In tzaj ttziyen Jehová jlu toj Tyol Dios: «In xi nmaʼne jlu tuʼntzun tqeʼ kykʼuʼje tiʼj oybʼil, ex mas bʼaʼn che tele te yajxitl» (Jeremías 29:11). Nya taj tuʼn ttzaj nya bʼaʼn qiʼj tuʼn clima. Sino taj tuʼn qtzalaj toj jun tbʼanel najbʼil tzalu twitz Txʼotxʼ (Génesis 1:28; 2:15; Isaías 32:18).

 Kbʼantel jlu noq oʼkx tuʼn Tkawbʼil Dios. ¿Tiʼtzun Kawbʼil lu? Jun gobierno ktel toj kyaʼj ex a Jesús kkawil toj (Mateo 6:10). At tnabʼil Jesús ex tipumal tuʼn miʼn ttzaj xitbʼil tuʼnx twitz txʼotxʼ. Tej tten tzalu twitz Txʼotxʼ kubʼ tyekʼin tipumal (Marcos 4:37-41). Ex toj ambʼil tzul qo tzajel t-xnaqʼtzaʼn tzeʼn tuʼn tok qxqʼuqin Txʼotxʼ ex tzeʼn tuʼn qanqʼin toj tbʼanel twitz, tuʼn jlu tzul tyekʼin qa at-xix nim tnabʼil (Isaías 11:2). Tuʼnju a Jesús kkawil tibʼaj Txʼotxʼ, kʼokel tilil tuʼn tuʼn miʼn ttzaj jun nya bʼaʼn kyiʼj xjal tuʼn clima.

 Bʼalo in kubʼ t-ximana jtoj kbʼantel tkyaqil jlu. Tuʼn tel mas tnikʼa tiʼj, uʼjinktza xnaqʼtzbʼil «¿Jtoj kkawil Tkawbʼil Dios tibʼaj Txʼotxʼ?».

 Jaku che onin consej in tzaj tqʼoʼn Biblia tiʼja naʼmxtoq ttzaj jun xitbʼil tuʼnx twitz txʼotxʼ, aj ttzaj ex aj tikʼ.

•   Naʼmxtoq ttzaj: Bʼinchama ttena tuʼntzun texa jun rat naj.

   Aju in tzaj tqʼamaʼn Tyol Dios: «Aju xjal at tnabʼl, ok t-xi tkeʼyin qa kyjaʼ ttzaj xobʼajil tibʼaj, in jyon naj tumel tuʼn tex twitz; atzunju xjal mintiʼ tnabʼl, kukx in xi laqʼeʼ tuj tbʼe ex in kʼixbʼi tuʼnju mya bʼaʼn» (Proverbios 22:3).

   Aju t-xilen: Ximana tiʼj alkye junjun xitbʼil jaku che tzaj jatumel in nanqʼina. Iktzun tten otoq bʼant ttena tuʼntzun texa jun rat naj ex tuʼn tok t-xqʼuqina qe toj tjaya.

   Jun tiʼ o bʼaj: «Bʼaj tzʼeʼy tnam jatumel in qo anqʼine ex o etz oqe toj tnam. E tzaj xobʼ xjal ex mintiʼ el kynikʼ tiʼj tiʼ tuʼn tbʼant kyuʼn. Pero atzun qeye ya otoq bʼant qtene. Otoq bʼant tten mochila de emergencia quʼne, tkuʼx qʼanbʼil toj ex qxbʼalune at tajbʼen. ¡Tbʼanelxix tuʼnju otoq bʼaj qbʼinchaʼne qtene!» (Tamara, California, Estados Unidos).

•   Aj ttzaj: Ximana tiʼjju mas nim toklen.

   Aju in tzaj tqʼamaʼn Tyol Dios: «Porke mya tok tchwinqlal jun xjal tiʼj nimku at te» (Lucas 12:15).

   Aju t-xilen: Mas nim toklen qchwinqlal kywitz tiʼchaq.

   Jun tiʼ o bʼaj: «Tej tkubʼ xitj qjaye tuʼn tifón Lawin, b mintiʼ el nnikʼe tiʼ tuʼn tbʼant wuʼne ex kwest tuʼn nximane. Pero in naʼne Dios te Jehová ex xi nqʼamaʼne te tiʼ kubʼ nnaʼne. El nnikʼe tiʼj qa maske otoq naj qjaye, kukx o qo kyaj anqʼine» (Leslie, Filipinas).

•   Aj tikʼ: Ximana tiʼjju kbʼajel toj qʼij jaʼlo ex nya tiʼjju kbʼajel te nchiʼj.

   Aju in tzaj tqʼamaʼn Tyol Dios: «Miʼn bʼaj kykʼuʼje tiʼj ju te nchiʼj, porke aju te nchiʼj texte tbʼis ktzajel» (Mateo 6:34).

   Aju t-xilen: Miʼn tzaj bʼajxix tkʼuʼja tiʼjju kbʼajel te nchiʼj.

   Jun tiʼ o bʼaj: «Tzaj bʼajxix nkʼuʼje tej tkyaj njaye tjaqʼ aʼ tuʼn huracán Irma. Iltoq tiʼj tuʼn nximane kyiʼj nim tiʼchaq ex mintiʼ el nnikʼe tiʼj tiʼ tuʼn tbʼant wuʼne. Tzaj nnaʼne qe consej in tzaj tqʼamaʼn Tyol Dios tuʼn miʼn ttzaj bʼaj qkʼuʼj tiʼjju te nchiʼj. Nim in jaw labʼine tiʼj tzeʼn onin Jehová wiʼje tuʼn tkubʼ nnaʼne bʼaʼn» (Sally, Florida, Estados Unidos).

 Tuʼn tel mas tnikʼa kyiʼj junjuntl tqanil, qʼonka twitza tiʼj xnaqʼtzbʼil «Cuando golpea un desastre. Qué hacer para sobrevivir».