«Tej txin qine in nok tentoq ntzike tkyaqil qʼij bʼyol te weye ax ikx tukʼil nim nya bʼaʼn yol. Tej in kubʼ mojeʼye ok bʼinchan nim nya bʼaʼn wiʼje tuʼn nlibʼe. Tzaj kyqʼoʼn qe nlibʼe nim waqʼune ik tzeʼnx jun majen ex kubʼ nximane tuʼn tkubʼ nbʼyon wibʼe» (Madhu, a te tnam India).

 Aju Organización Mundial de la Salud in tzaj tqʼamaʼn qa «aju nya bʼaʼn in nok bʼinchaʼn kyiʼj xuʼj in bʼaj twitz tkyaqil Txʼotxʼ». Ax ikx in tzaj tqʼamaʼn qa jun kyxol oxe xuʼj in nok bʼyoʼn moqa in kubʼ violarin.

 Qa in nok bʼinchaʼn nya bʼaʼn tiʼja ik tzeʼn qe xuʼj lu, bʼalo in kubʼ t-ximana qa noq jaxku tumel ata, jaku tzʼok bʼyoʼna, jaku tzaj qʼamaʼn nya bʼaʼn yol teya moqa jaku kubʼ violarina. Tuʼnju in nok bʼinchan nim nya bʼaʼn kyiʼj xuʼj, jakulo kubʼ t-ximana qa miʼx aʼl jun in nok qʼonte kyoklen. Yajtzun te Dios, ¿in nokpe tqʼoʼn kyoklen xuʼj?

 Aju in tzaj tqʼamaʼn Tyol Dios: «Xinaq ex xuʼj e kubʼ tbʼinchaʼn [Dios]» (Génesis 1:27).

 Aju t-xilen: Kubʼ tbʼinchan Dios xinaq ex xuʼj ex nim kyoklen kykabʼil toj twitz. Ax ikx, taj tuʼn tok tkʼujlaʼn chmilbʼaj t-xuʼjil «ik tzaʼn in tkʼujlan» tibʼ, nya tuʼn tok t-obligarin tuʼn t-xi tbʼinchaʼn aju te tajbʼil nix tuʼn tok ten yasil ex bʼyol te (Efesios 5:33; Colosenses 3:19). In nel qnikʼ tiʼj qa oʼkx taj Dios tuʼn kyten xuʼj toj bʼaʼn moqa toj txubʼtxaj.

 «Tej tzmatoq tal txin qine, in kubʼ violarine kyuʼn junjun toj njaye. Tej qʼiʼntoq 17 abʼqʼi wuʼne, tzaj tqʼamaʼn npatrone tuʼn tel tiʼn waqʼune qa mintiʼ ẍin kubʼ koẍeʼye tukʼil. Ex jaʼlo, in kubʼ tyekʼin nchmile, qe nmane ex qe nvecine nya bʼaʼn kymod wukʼile ex qa mintiʼ woklene toj kywitz. Pero ok wojtzqiʼne Jehová, b aju Bʼinchal qe ex o tzʼel nnikʼe tiʼj qa in nok tqʼon kyoklen xuʼj. Tuʼn jlu, qʼuqli nkʼuʼje tiʼj qa kʼujlan qine tuʼn ex qa nim woklene toj twitz» (María, te tnam Argentina).

 Aju in tzaj tqʼamaʼn Tyol Dios: «At junjun tamiw xjal mas mojl kykʼujlalil tukʼil twitz tkʼujlalil jun terman» (Proverbios 18:24).

 Aju t-xilen: Jun axix tok amiw ktzajel tqʼoʼn onbʼil teya. Qa bʼaʼn toj twitza, qʼamanxa te jun xjal qʼuqli tkʼuʼja tiʼj aju in kubʼ tnaʼna.

 «Toj 20 abʼqʼi mintiʼ xi nqʼamaʼne te jun xjal qa otoq chin kubʼ violarine. Mintiʼtoq in chin tzalaje, tzaj bʼajxix nkʼuʼje ex tzaj depresión wiʼje. Pero tej t-xi nqʼamaʼne jlu te jun xjal kʼujlan qine tuʼn, kubʼ nnaʼne qa otoq tzʼel qʼiʼn jun iqtz wibʼaje» (Elif, te tnam Turquía).

 Aju in tzaj tqʼamaʼn Tyol Dios: «Tkyaqilju in bʼaj kykʼuʼje tiʼj, kyqʼonxe tuj tkwent Dios, porke ate Dios kwentil kyeye» (1 Pedro 5:7).

 Aju t-xilen: Aj tnaʼna Dios jaku tzʼok qeʼ tkʼuʼja tiʼj qa ktzajel bʼina tuʼn (Salmo 55:22; 65:2). Nimxix kʼujlaʼna tuʼn Dios ex jaku tzʼonin tiʼja tuʼn tel tnikʼa tiʼj qa at nim toklena toj twitz.

 «Tuʼnju kukx in nok wojtzqiʼne Jehová, a jlu in nonin wiʼje tuʼn miʼn tkubʼ nnane bʼis kyuʼn nya bʼaʼn o tzʼok bʼinchaʼn wiʼje. Ex jaʼlo jaku chin naʼne Dios te tuʼn t-xi nqʼamaʼne tkyaqilju in kubʼ nnaʼne. In nok Dios ik tzeʼn jun wamiwe aju in nel tnikʼ tiʼj tiʼ in kubʼ nnaʼne» (Ana, te tnam Belice).

 Aju in tzaj tqʼamaʼn Tyol Dios: «Bʼinchanxa kyiʼj qe kʼwaʼl mintiʼ kyman ex kytxuʼ ex qe xjal in che bʼaj yajlaʼn, tuʼntzun miʼn kukx kyxobʼtzan xjal» (Salmo 10:18).

 Aju t-xilen: Chʼix tpon kanin ambʼil jatumel kbʼel tnajsaʼn Jehová tkyaqil nya bʼaʼn at, ik tzeʼn bʼiybʼel ex ikʼbʼil kyiʼj xuʼj.

 «O tzʼel nnikʼe tiʼj qa toj chʼintl ambʼil kbʼel tnajsaʼn Jehová tkyaqil nya bʼaʼn in nok bʼinchaʼn kyiʼj xuʼj ex kyiʼj tal txin, tuʼntzun jlu, at nim qʼuqbʼil nkʼuʼje ex in kubʼ nnaʼne bʼaʼn» (Roberta, te tnam México).

 Qa taja tuʼn tel mastl tnikʼa tiʼjju in tzaj tqʼamaʼn Biblia ex tiquʼn jaku tzʼok qeʼ qkʼuʼj tiʼj, yolina kyukʼil testigo de Jehová. Jaku che onin tiʼja tukʼil tyol Dios. Qaninxa teju tuʼn tpon visitaril teya noq kukx.

 Jaku kutz tiʼna xnaqʼ­tzbʼil lu tuʼn tetz t-imprimirina.