In che pakbʼan testigos de Jehová ex in che onin kyiʼj xjal kyoj mas te 200 tnam ex tembʼil te pakbʼabʼil. Pero oʼkx toj 35 tnam in kanin pwaq tuʼn kylaqʼet tiʼchaq at tajbʼen kye. Qa ikju, ¿jatumel in tzaj pwaq kye qeju noq chʼin at kye?

 In nok tkeʼyin Kʼloj Xjal Qʼil Twitz Aqʼuntl kye testigo de Jehová aju aqʼuntl in bʼant twitz tkyaqil Txʼotxʼ. Toj tumel in najbʼen tkyaqil pwaq in tzaj qʼoʼn te oyaj. Qa mintiʼ ma tzʼajbʼen tkyaqil pwaq toj jun sucursal, in xi tsamaʼn toj juntl jatumel at tajbʼen. Axju in bʼant kyuʼn ik tzeʼn bʼant kyuʼn okslal toj ambʼil ojtxe. Tkyaqil pwaq mintiʼ ajbʼen kyuʼn, xi kyqʼoʼn kye okslal mintiʼxix at kye. Bʼant jlu kyuʼn «tuʼntzun tel junx», toj juntl yol, tuʼn tten tiʼchaq at tajbʼen kye kykyaqil (2 Corintios 8:14).

 ¿Tiʼ in kubʼ kynaʼn erman aj t-xi qʼoʼn onbʼil kye kyuʼn junjuntl sucursal? Jun techel, toj tnam Tanzania, chʼixme kykyaqil xjal in che anqʼin tukʼil menos te kabʼe dólar junjun qʼij. Aju pwaq pon samaʼn kye erman, ajbʼen tuʼn tbʼaj bʼinchet chʼintl Ja te Chmabʼil te kʼloj okslal Mafinga. Kyqʼama erman jlu: «Atxix tej tbʼaj bʼinchet chʼintl Ja te Chmabʼil, o tzʼok kychmon kyibʼ mas xjal qukʼile. In xi qqʼoʼne nimxix chjonte te ttnam Jehová ex kye erman tuʼnju tzaj kyqʼoʼn onbʼil qeye. Jaʼlo, jaku tzʼok qchmon qibʼe toj jun tbʼanel lugar tuʼntzun qkʼulune te Jehová».

 Ateʼ junjun erman te Sri Lanka, mintiʼ o kanin kywa tuʼn tpaj txʼuʼj yabʼil COVID-19. Kyxol qe erman lu at ermana Imara Fernando ex Enosh aju tal. Xi qʼet onbʼil te ermana lu noq tuʼn onbʼil tzaj kyqʼoʼn erman te junjuntl tnam. Yajxitl kubʼ tbʼinchaʼn ermana tukʼil tal jun tarjeta ex kubʼ ttzʼibʼin jlu: «In xi qqʼoʼne nim chjonte kye erman kubʼ kyyekʼin kykʼujlabʼil qiʼje tej qok weʼye twitz nya bʼaʼn. In qo tzalaje tuʼnju atoʼye toj ttnam Jehová ex kukx in xi qqanine te tuʼn tonin kyiʼj erman kyoj bʼajsbʼil tqʼijlalil».

 Noq jaxku tumel in che anqʼin erman, in che tzalaj aj t-xi kyqʼoʼn chʼin kye txqantl. Jun techel, kubʼ tbʼinchaʼn Enosh jun tal caja tuʼn tkuʼx tqʼoʼn oyaj toj tuʼntzun tonin kyiʼj mas erman at tajbʼen kye. Ax ikx te ermana Guadalupe Álvarez in kubʼ tyekʼin tbʼanel tmod. In nanqʼin ermana lu toj jun lugar te México, jatumel kwest tuʼn tkanet kyaqʼun xjal ex noq chʼin kypwaq in kambʼet. Maske ikju, in nok tilil tuʼn ermana tuʼn tonin. In tzaj tqʼamaʼn jlu: «In xi nqʼoʼne chjonte te Jehová tuʼnju kʼujlaʼn qine tuʼn ex tuʼnju in kubʼ tyekʼin tbʼanel tmod wiʼje. In nel nnikʼe tiʼj qa aju pwaq in xi nqʼoʼne te oyaj ex aju in xi kyqʼoʼn txqantl erman, jaku tzʼonin kyiʼj qeju in tzaj nya bʼaʼn kyiʼj».

 In che tzalaj sucursal aj t-xi kysamaʼn pwaq te onbʼil kye junjuntl. In tzaj tqʼamaʼn Anthony Carvalho jlu, aju at toj Kʼloj ansyan toj Ninja qʼil twitz aqʼuntl te Brasil: «Nim abʼqʼi e onin junjuntl ninja qʼil twitz aqʼuntl qiʼje tukʼil pwaq. Tuʼnju tzaj kyqʼoʼn onbʼil qeye, kukx o chʼiy aqʼuntl tiʼj pakbʼabʼil. Toj ambʼil jaʼlo, in kanin pwaq in tzaj kyqʼoʼn erman te oyaj ex jaku qo onine kyiʼj txqantl. In nel kynikʼ erman tiʼj qa in pakbʼet tbʼanel tqanil twitz tkyaqil Txʼotxʼ ex qa jaku che onin tiʼj. Iktzun tten in kubʼ kyyekʼin qa in che ok te tbʼanel t-xnaqʼtzbʼen Jesús».

 ¿Tzeʼn jaku qo onin kyiʼj erman in che ok weʼ twitz nya bʼaʼn? Jaku qo onin kyiʼj aj t-xi qqʼoʼn pwaq te oyaj tiʼj aqʼuntl in bʼant twitz tkyaqil Txʼotxʼ ex nya tuʼn t-xi qsamaʼn kyoj junjuntl sucursal. Jaku kux qqʼoʼn pwaq te oyaj toj caja tok tbʼi «Onbʼil tiʼj aqʼuntl twitz tkyaqil Txʼotxʼ» moqa jaku txi qsamaʼn toj donate.pr418.com. In xi qqʼoʼne nimxix chjonte kyeye tuʼn onbʼil in tzaj kyqʼoʼne.