Toj tnejel maj te 2020, ok kyqʼoʼn testigos de Jehová kywitz tiʼj nimaq chmabʼil te oxe qʼij toj ax ambʼil twitz tkyaqil Txʼotxʼ: toj xjaw te julio ex agosto. Tuʼntzunju, kubʼ traducirin ex kubʼ grabarin nimaq chmabʼil toj mas te 500 yol. Tuʼn tbʼant jun aqʼuntl ik tzeʼn jlu, chʼixmi toj tkyaqil maj in xi tiʼn jun abʼqʼi moqa mas. Pero tuʼnju tzaj yabʼil COVID-19, noq kyaje xjaw xi tiʼn tuʼn tbʼant nimaq chmabʼil te oxe qʼij «¡Kukx che tzalaje!» te 2020 kyuʼn traductor.

 Onin Kʼloj xjal loqʼil twitz tkyaqil Txʼotxʼ ex Kʼloj Onil tuʼn kykubʼ Qʼet uʼj kyoj txqantl yol tuʼn tbʼant aqʼuntl lu. El tnikʼ Kʼloj Onil tuʼn kykubʼ Qʼet uʼj kyoj txqantl yol qa iltoq tiʼj tuʼn kytzaj laqʼet tbʼanel micrófono tuʼn t-xi qʼet kye nimku equipo te traducción tuʼntzun tbʼant aqʼuntl kyuʼn. Tzaj tlaqʼoʼn Kʼloj xjal loqʼil twitz tkyaqil Txʼotxʼ 1,000 micrófono ex xi tsamaʼn kyoj chʼixmi 200 lugar.

 Nim micrófono e tzaj laqʼet tuʼn kyel barat. E kanin toj junx ja tuʼntzun kybʼaj bʼinchet paquete ex tuʼn kyxi samet toj junxichaq lugar twitz tkyaqil Txʼotxʼ. Tuʼnju e tzaj laqʼet nim micrófono, xi chjet 170 dólar tiʼj teyele junjun micrófono tukʼix aju tuʼn t-xi samet. Tuʼn jlu mintiʼ bʼaj najset mas te 20 por ciento pwaq tiʼj.

 E tzaj tlaqʼoʼn Kʼloj xjal loqʼil twitz tkyaqil Txʼotxʼ qe tiʼchaq lu toj xjaw te abril ex mayo te 2020. Toj ambʼil lu mintiʼxix kʼaẍjel tuʼnju otoq tzaj txʼuʼj yabʼil. Noqtzun tuʼnj, tej chʼixtoq tbʼaj t-xjawil mayo ya otoq che pon qe tiʼchaq tuʼn tajbʼen kyuʼn erman kyoj oficinas remotas de traducción, qe sucursal ex kyoj junjuntl lugar jatumel in che traducirin erman.

 In tzaj tqʼamaʼn Jay Swinney aju qʼil twitz aqʼuntl kyxol Kʼloj xjal loqʼil twitz tkyaqil Txʼotxʼ qa «atxix tej ttzaj tzyet aqʼuntl lu, nim o che onin qe erman toj Betel ex qeju kʼayil. Oʼkx tipumal Jehová jaku tzʼonin tuʼn tkanet naj aju at tajbʼen kye erman ex nya nim twiʼ».

 Atzunte Nicholas Ahladis, aju in naq’unan toj Kʼloj Onil tuʼn kykubʼ Qʼet uʼj kyoj txqantl yol, tzaj tqʼama jlu: «Jupuʼn qe traductor, pero nimxix e jaw tzalaj tej kypon qe tiʼchaq kye tuʼn tajbʼen kyuʼn. Maske mintiʼtoq in nok kychmon kyibʼ traductor kyukʼil txqantl kyukʼil, pero bʼant tuʼn kytraducirin ex tuʼn kygrabarin kyiʼj chikʼbʼabʼil, kyiʼj video ex kyiʼj bʼitz kyoj mas te 500 yol».

 Aju aqʼuntl lu noq jun kyxol qeju e bʼant tuʼn tok kybʼiʼn erman nimaq chmabʼil te oxe qʼij te 2020 «¡Kukx che tzalaje!». E tzaj laqʼet qe tiʼchaq lu tuʼnju in tzaj kyqʼoʼne pwaq te onbʼil toj donate.pr418.com ex toj junjuntl tten.