Nimku mil xjal in che bautisarin tkyaqil abʼqʼi. Ex tuʼn jlu, il tiʼj tuʼn kyjaw bʼinchet mas ja tuʼn qkʼulin te Jehová. Tuʼntzunju, aqeju erman in che ajbʼen toj Kʼloj xjal Ximel Tzeʼn che Jawil bʼinchet Ja kubʼ kyximen tuʼn kyjaw bʼinchet mas te 2.700 ja toj abʼqʼi te pakbʼabʼil toj abʼqʼi 2020. a

 Noqtzun tuʼnj, mintiʼ japun twiʼ kyxim erman lu tuʼnju tzaj COVID-19. Tuʼn kyok xqʼuqit erman ex tuʼn kyjapun ley kye aj kawil, kubʼ kyximen erman te Kʼloj xjal Keʼyil uʼj te Kʼloj Xjal Qʼil Twitz Aqʼuntl tuʼn tweʼ chʼixmi tkyaqil aqʼuntl. Pero e jaw bʼinchet moqa e bʼaj bʼinchet chʼintl 1.700 ja te kʼulbʼil toj abʼqʼi te pakbʼabʼil te 2020 tej naʼmxtoq ttzaj txʼuʼj yabʼil. Ax ikx e kubʼaj mas te 100 aqʼuntl nim kyoklen kyoj junjun sucursal. Qo yolil kyiʼj kabʼe kyxol qe aqʼuntl lu ex alkye tten o tzʼonin kyiʼj erman.

 Toj sucursal te Camerún. Toj ojtxe sucursal te Camerún aju attoq toj tnam Duala tbʼi, iltoq tiʼj tuʼn tbʼaj bʼinchet chʼintl tuʼnju nya nimtoq toj. Kubʼ t-ximen Kʼloj xjal Keʼyil uʼj tuʼn tbʼaj bʼinchet chʼintl sucursal, pero mas nimtoq pwaq kxel tiʼn twitzju twiʼxix ja. Ax ikx e ximen tiʼj tuʼn tjaw kybʼinchaʼn juntl akʼaj ja toj juntl lugar moqa tuʼn ttzaj kylaqʼoʼn jun ja ex tuʼn tok kybʼinchaʼn chʼintl tiʼj. Pero mijun kyxol qe jlu e bʼant.

 Toj ax ambʼil aju, ok kybʼiʼn erman qa oktoq kbʼel kybʼinchaʼn aj kawil bʼe jawni te Duala, aju in nikʼ ttxlaj jun ja te Nimaq Chmabʼil. Kʼoniltoq bʼe lu tiʼj sucursal tuʼnju ya nyatoq kwest tuʼn kylaqʼet qe tiʼchaq at tajbʼen. Atzun jlu tajtoq sucursal. Tuʼntzunju, tzaj tqʼoʼn Kʼloj Xjal Qʼil Twitz Aqʼuntl ambʼil tuʼn tjaw bʼinchet jun akʼaj sucursal toj txʼotxʼ jatumel taʼ Ja te Nimaq Chmabʼil.

 Xi kychjoʼn erman te jun empresa tuʼn tbʼinchet junjun aqʼuntl tuʼntzun miʼn txi najset nim ambʼil ex pwaq. Axpe ikx mintiʼ kubʼaj tkyaqil pwaq otoq bʼaj ximet, atx kabʼe millón dólar mintiʼ kubʼaj. Bʼant tuʼn kyxiʼ erman te Betel anqʼil toj akʼaj sucursal tej atxtoq chʼintl ambʼil tuʼn ttzaj txʼuʼj yabʼil COVID-19.

 Jaʼlo, mas tbʼanel qe lugar jatumel in che anqʼin ex jatumel in che aqʼunan erman te Betel ex in kyqʼamaʼn qa jun oyaj jlu tuʼn Jehová. Tqʼama jun mejebʼleʼn jlu: «Qaje tuʼn tok mastl tilil quʼne tuʼn qaqʼunane ex tuʼn tkubʼ qyekʼine qa nim toklen oyaj lu qeye».

 Ja jatumel in kubʼ qʼoʼn Uʼj toj Yol tojolabal atz México. Toj nim ambʼil atz aqʼunan jun equipo te traducción in che yolin toj yol tojolabal toj sucursal te Centroamérica aju at nqayin ttxlaj tnam te México. Noqtzun tuʼnj, atz kyoj tnam Altamirano ex Las Margaritas mas ateʼ xjal in che yolin toj yol tojolabal ex atlo jun mil kilómetro kyxol tukʼil sucursal. Tuʼntzunju, kwesttoq in nela toj kywitz traductor tuʼn tok kybʼiʼn kyyol. Nya oʼkxju, ax ikx kwesttoq tuʼn kykanet erman tuʼn kyonin toj traducción ex toj grabación.

 Tuʼntzunju, tzaj kyqʼamaʼn erman at kyoklen toj Kʼloj xjal Tzʼibʼil uʼj te Kʼloj Xjal Qʼil Twitz Aqʼuntl tuʼn kyxiʼ traductor anqʼil atz jatumel in che yolin xjal toj yol tojolabal. Tuʼn tbʼant jlu, tzaj tlaqʼoʼn sucursal jun ja ex bʼaj tbʼinchaʼn chʼintl. Mas barat ela jlu twitzju tuʼn tjaw bʼinchet jun akʼaj ja moqa tuʼn ttzaj majenet jun ja.

 Tqʼama jun traductor jlu: «Kyoj qeju 10 abʼqʼi in naqʼunane toj sucursal, mintiʼ jun familia kanet wuʼne aju in yolin toj nyole. Atzun jaʼlo atz taʼ oficina jatumel in che yolin kykyaqil xjal toj yol tojolabal. Jaku chin yoline kyukʼil xjal lu tkyaqil qʼij. Jaʼlo mas in bʼant nyoline toj yol lu ex in nonin tiʼj aqʼuntl in bʼant wuʼne».

 Qa ma bʼant, in bʼaj ximet tuʼn kyjaw bʼinchet 75 oficina te traducción ex qe ja jatumel in che ok Qe xnaqʼtzbʼil in tzaj tqʼoʼn ttnam Jehová toj abʼqʼi te pakbʼabʼil te 2021. Ax ikx kukx che xel bʼinchet aqʼuntl o chex tzyet kyiʼj 8 sucursal ik tzeʼn in xi bʼinchet tiʼj Rámapo (Nueva York) ex ik tzeʼn qe chʼixpubʼil che xel bʼinchet kyiʼj sucursal ateʼ toj tnam Argentina ex Italia. Ax ikx il tiʼj tuʼn kyjaw bʼinchet mas te jun mil akʼaj Ja te Chmabʼil. Nya oʼkxju, ax ikx nyaxix bʼaʼn ateʼ mas te 6 mil lugar jatumel in che ok chmabʼil aju il tiʼj tuʼn kybʼaj chʼixpet, ex il tiʼj tuʼn kybʼaj bʼinchet chʼintl 4 mil Ja te Chmabʼil.

 ¿Jatumel in tzaj pwaq tuʼn kybʼant tkyaqil aqʼuntl lu? In tzaj tzaqʼweʼn xjel lu tuʼn ermano Lázaro González aju in najbʼen toj Kʼloj ansyan toj Ninja qʼil twitz aqʼuntl te Centroamérica. Tej tyolin tiʼj Ja jatumel in kubʼ qʼoʼn Uʼj toj Yol tojolabal, tqʼama jlu: «Aqeju erman ateʼ tjaqʼ tkawbʼil sucursal, nya nim kypwaq at. Mintiʼwtlo e bʼant qe ja te traducción kyoj yol lu noqwit nya tuʼn onbʼil te pwaq in tzaj kyqʼoʼn erman twitz tkyaqil Txʼotxʼ. Tuʼnju onbʼil in tzaj kyqʼoʼne, jaku cheʼx traductor anqʼil jatumel in che yolin xjal toj kyyol». A jlu in tzaj tyekʼin qa jaku che jaw bʼinchet ja lu tuʼnju in tzaj kyqʼoʼne pwaq te onbʼil tiʼj aqʼuntl in bʼant twitz tkyaqil Txʼotxʼ. Nim kyxol onbʼil lu in tzaj kyqʼoʼne toj donate.pr418.com.