Tajbʼil Kʼloj Xjal Qʼil Twitz Aqʼuntl tuʼn tajbʼen pwaq moqa medi te onbʼil toj tumel. Tuʼntzunju, in najbʼen toj tumel kyuʼn aj tjaw kybʼinchaʼn ja aqeju in che onin qiʼj tuʼn qpakbʼan tiʼj Tkawbʼil Dios. Jun techel, toj 2023 kubʼaj mas te 500 millón dólar kyuʼn sucursal tuʼntzun kyjaw bʼinchet Ja te Chmabʼil ex ja te asamblea moqa tuʼn tok bʼinchet chʼintl kyiʼj ex tuʼn kyok xqʼuqit twitz tkyaqil Txʼotxʼ. a Aju pwaq lu, nya tok toj tajlal ju in kubʼaj kyuʼn erman kyojele Ja te Chmabʼil twitz tkyaqil Txʼotxʼ.

 In najbʼen pwaq te onbʼil tuʼn kyjaw bʼinchet moqa tuʼn tok bʼinchet chʼintl kyiʼj ninja qʼil twitz aqʼuntl moqa sucursal. In che ajbʼen ja lu tuʼn tbʼaj nukʼet pakbʼabʼil twitz tkyaqil Txʼotxʼ. O txi jyet junjuntl tumel tuʼn kyjaw bʼinchet sucursal tuʼntzun tok qʼet mas pwaq tiʼj aqʼuntl in nok aj kyjaw bʼinchet moqa aj kybʼaj bʼinchet chʼintl Ja te Chmabʼil ex Ja te Asamblea. In bʼant jlu, pero kukx in kubʼaj nim pwaq aj kybʼaj bʼinchet chʼintl sucursal, aj kyok xqʼuqit moqa aj tchʼixpet jatumel tuʼn kyten. ¿Tiquʼn nim toklen tuʼn kybʼant aqʼuntl lu? ¿Alkyeqe aqʼuntl in che bʼant kyoj sucursal tuʼntzun kyonin tiʼj pakbʼabʼil? Kʼelel qnikʼ tiʼj.

 Ateʼ junjun sucursal toj ambʼil jaʼlo, ma tzikʼ mas te 30 moqa 40 abʼqʼi kykubʼlen bʼinchaʼn. At jun erman Nicholas tbʼi ex in najbʼen toj Kʼloj xjal Ximel Tzeʼn che Jawil bʼinchet Ja twitz tkyaqil Txʼotxʼ, tzaj tqʼamaʼn jlu: «In nok tilil tuʼn kyok xqʼuqit ja, pero aj tbʼet ambʼil, in che bʼaj. Atzun qa ma tzʼok bʼinchet chʼintl kyiʼj, in nonin tuʼn kyten mastl ambʼil».

 Mas il tiʼj tuʼn tbʼaj bʼinchet junjun chʼixpubʼil kyoj sucursal toj ambʼil jaʼlo. Tej kyjaw bʼinchet junjun sucursal twitz tkyaqil Txʼotxʼ, nyaxix nimtoq kybʼet pakbʼal at, pero jaʼlo, mas ma chʼiy kybʼet ex il tiʼj tuʼn kypon mas erman onil kyoj sucursal tuʼn t-xi qʼet onbʼil kye. Noqtzuntuʼnj at maj mintiʼtl lugar tuʼn kypon erman onil.

 Ax ikx in bʼaj ximet tuʼn kyok xqʼuqit erman. In qo anqʼin kyoj bʼajsbʼil tqʼijlalil ex mas in che tzaj xitbʼil tuʼnx twitz Txʼotxʼ toj ambʼil jaʼlo (Lucas 21:11). Pero tuʼnju in che ajbʼen junjun tumel mas akʼaj aj kybʼaj bʼinchet chʼintl sucursal, in nonin tuʼn kyok xqʼuqit erman in che aqʼunan kyoj. Nya oʼkxju, ax ikx mas fácil tuʼn kyajbʼen qe ja kyuʼn erman in che onin aj ttzaj jun xitbʼil tuʼnx twitz Txʼotxʼ, ex aj tbʼaj ajbʼen kyuʼn, jaku che ajbʼen juntl maj kyuʼn erman in che onin tiʼj pakbʼabʼil.

 Tukʼil onbʼil in tzaj tqʼoʼn Kʼloj Xjal Qʼil Twitz Aqʼuntl, e bʼant junjun aqʼuntl kyiʼj 43 sucursal toj abʼqʼi te pakbʼabʼil te 2023. Toj juntl yol, chʼixmi nik’jan Betel twitz tkyaqil Txʼotxʼ at jun tiʼ ok bʼinchet kyiʼj. Qbʼinx junjun techel tiʼj aqʼuntl e bʼant:

 Angola. At jun erman Matt tbʼi in najbʼen toj Kʼloj ansyan toj Ninja qʼil twitz aqʼuntl, tzaj tqʼamaʼn jlu: «Ok qqʼoʼne qwitze tiʼj alkye tten japun twiʼ Ageo 2:7 toj jun tbʼanelxix tten. Noq dies abʼqʼi otoq tzikʼ tej tjax kyajlal pakbʼal te jun 60 tiʼj jun syent pakbʼal. Tiʼjju kybʼet erman ya in che ajbʼentoq toj Betel, iltoq tiʼj tuʼn kypon oxe majtl kybʼet erman ajbʼel tuʼn kyxi onit pakbʼal lu. Pero mintiʼ bʼant tuʼn kytzaj txket mas erman tuʼn kypon ajbʼel tuʼnju mintiʼ lugar jatumel tuʼn kykyaj ten. Ex tuʼn jlu, aqeju junjun erman ya ateʼtoqtl toj Betel, iltoq tiʼj tuʼn kyaqʼunan mas ambʼil ex mas kyuw».

 E pon junjun erman qukʼile tuʼn tbʼaj ximet tiʼ jaku bʼant tuʼntzun tbʼant qtene toj Betel. Tnejelku, kyqʼama qa noq tuʼn t-xi nimset chʼintl sucursal aju ya at, pero tej tbʼaj kyjyoʼn mastl tqanil, el kynikʼ tiʼj qa mlaytoq tzʼajbʼen pwaq toj tumel qa noq sok bʼinchet chʼintl aqʼuntl tiʼjju ja ya at. Kyqʼama qa mas bʼaʼn tuʼn laqʼet jun nintzkuʼ moqa jun matij ja at nqayin jatumel atoʼye ex tuʼn tok bʼinchet chʼintl tiʼj. Tzaj tqʼamaʼntl ermano Matt jlu: «Tnejelku, tzaj chʼin qxime aqoʼye atoʼye toj Kʼloj ansyan toj Ninja qʼil twitz aqʼuntl tej ttzaj qʼamaʼn qeye tuʼn ttzaj laqʼet ja lu ex tuʼn tok bʼinchet chʼintl tiʼj. Kubʼ qximane qa maswitlo bʼaʼn noqwit tzajx tuʼn tjaw bʼinchet jun ja tuʼn tajbʼen quʼne». Pero tqʼamatl erman jlu: «Pero jaʼlo, in nel qnikʼe tiʼj qa mas bʼaʼn aju kyqʼama erman tuʼn tbʼant, tbʼanel te ja lu ex bʼaʼn atoʼye toj. Tzaj tkʼiwlaʼn Jehová aju kubʼ ximet».

 Mintiʼ bʼiʼn quʼn qa toj ambʼil tzul kxel nimsaʼn mastl sucursal at atz Angola. Pero toj ambʼil jaʼlo, bʼaʼn in nela ja toj kywitz erman in che ajbʼen toj sucursal tuʼn kyajbʼen ja te Betel ex qe junjuntl ja in che tzaj qʼoʼn te majen tuʼntzun kyonin kyiʼj erman ma chʼiy kybʼet toj pakbʼabʼil.

 Japón. Otoqlo tzikʼ 40 abʼqʼi tjawlen bʼinchaʼn ja te Sucursal atz Japón ex bʼajxtoq bʼant jun aqʼuntl tiʼj tuʼn tbʼaj bʼinchet chʼintl. Ok tilil tuʼn tok xqʼuqit, pero kukx e ok junjun tiʼchaq ateʼ toj te ttxʼaqin. Tuʼntzunju, in nok nim aqʼuntl tiʼj jaʼlo tuʼn tbʼaj bʼinchet chʼintl.

 In chʼexpaj tten anqʼibʼil toj Betel aj tbʼet ambʼil. Tej naʼmxtoq tbʼaj abʼqʼi 2015, toj junx lugar in kubʼtoq bʼinchaʼn wabʼj kye erman toj Betel. Tuʼnju, nya matij qe lugar tuʼn tbʼinchet wabʼj e kubʼ qʼoʼn tal cocin kyoj kwart. Pero toj ambʼil jaʼlo, chʼixmi tkyaqil erman toj Bethel ayex in kubʼ kybʼinchaʼn kywa. Tuʼntzunju, o chex nimsaʼn chʼintl qe lugar lu toj Betel te Japón ex jaʼlo mas nya kwest tuʼn kybʼinchan erman kywa. Tqʼama jun ermana jlu aju Kumiko tbʼi: «Aj tkubʼ nbʼinchaʼne nwaye tzalu, in nonin wiʼje tuʼn tkubʼ nnaʼne qa atz atine njaye ex in nonin wiʼje tuʼn t-xi nbʼinchaʼne aju in tzaj tqʼamaʼn Betel tuʼn tbʼant».

 Aju aqʼuntl in bʼant toj sucursal te tnam Japon nimxix toklen tuʼnju in nonin tuʼn tbʼant aqʼuntl twitz tkyaqil Txʼotxʼ (Mateo 28:19, 20). Noq kabʼe sucursal in netz ky-imprimirin tkyaqil Biblia, ex a sucursal te Japón jun kyxol jlu. Tuʼntzunju, kubʼ ximet tuʼn tkubʼ qʼet jun kʼuxbʼil qʼiʼn jun tumel tuʼn aju jaku kubʼ tcortarin qe uʼj ex jaku t-xi tkʼuʼn quq i nel chitj tuʼntzun miʼn ttzaj jun nya bʼaʼn kyiʼj qeju in che aqʼunan tiʼj. Xi tiʼn chʼixmi jun millón dólar tuʼn ttzaj laqʼet kʼuxbʼil lu ex tuʼn tkyaj bʼinchaʼn toj lugar, pero kʼonil tuʼn kukx kyetz uʼj toj sucursal aqeju in che onin qiʼj tuʼn tchʼiy qʼuqbʼil qkʼuʼj ex aju uʼj mas nim toklen kyxol jlu, a Biblia.

 Ok tilil tuʼn kukx kyetz Biblia tej tbʼaj bʼinchaʼn chʼintl aju jatumel in che etz imprimirit uʼj toj sucursal. Tzaj tqʼamaʼn Trey jlu jun erman in nonin toj Kʼloj ansyan toj Ninja qʼil twitz aqʼuntl te Japón: «Twitz tkyaqil Txʼotxʼ, mas nim Biblia tzaj qanin ex mas nim i etz imprimirit tej tbʼaj bʼinchaʼn chʼintl lugar lu. E aqʼunan nim departamento ex junjuntl xjal tej kykubʼ qʼet qe akʼaj kʼuxbʼil ex tej kyetz imprimirit uʼj». E ok weʼ erman twitz nim tiʼchaq kwest tej tbʼinchet aju jatumel in che etz imprimirin uʼj, pero kyoj xjaw te marzo tuʼn tpon toj agosto, i etz imprimirit chʼixmi 220 mil Biblia. Ex tkyaqilju aqʼuntl bʼant, mintiʼ xi tiʼn nim pwaq.

 Ax ikx in nok tilil tuʼn miʼn tkubʼaj nim luz aj tbʼaj bʼinchet chʼintl sucursal. Che kbʼel instalarit junjun panel solar tbʼi tuʼntzun miʼn tkubʼaj $120 mil dólar tiʼj luz toj jun abʼqʼi. Ax ikx che okel qʼet ventan aqeju te oxe kol vidrio toj tuʼntzun miʼn tkubʼaj nim luz. Kʼonil jlu tuʼn miʼn tkubʼ gastarit $10 mil dólar toj jun abʼqʼi. Ax tok jaku kubʼ qximen qa maslo nim pwaq kbʼel bʼaj tuʼn kytzaj laqʼet qe panel solar ex qe ventan lu, pero in kubʼ ximet qa ok kʼonil tuʼn miʼn txi qnajsaʼn mas te 3.5 millón dólar toj tkyaqil ambʼil aj kyten qe jlu. Nya oʼkxju, sino ax ikx che onil tuʼn miʼn ttzaj nya bʼaʼn tiʼj Txʼotxʼ.

 Aju nim aqʼuntl in bʼant kyoj kabʼe sucursal lu, in tzaj tyekʼin qa at nim aqʼuntl il tiʼj tuʼn tbʼant toj jun sucursal tuʼntzun tonin kyiʼj erman. Pero atx aqʼuntl tuʼn tbʼant. At jun ermano Aaron tbʼi in nonin toj Kʼloj xjal Ximel Tzeʼn che Jawil bʼinchet Ja twitz tkyaqil Txʼotxʼ, tqʼama jlu: «O bʼant nim aqʼuntl kyuʼn erman, pero atx nim aqʼuntl tuʼn tbʼant». ¿Alkye tten kbʼantel aqʼuntl lu quʼn? Tzaj tqʼamaʼntl ermano Aaron jlu: «In qo tzalaje tiʼjju pwaq te onbʼil o tzaj kyqʼoʼn erman tuʼn kybʼant nim aqʼuntl tiʼj jlu, pero ax ikx in qo tzalaje tuʼnju ateʼ nim erman e ul aqʼunal noq kukx tuʼn kyonin. Ex qo tzalajele kyiʼj qeju in nok tilil kyuʼn jaʼlo tuʼntzun tbʼant kyul onil noq kukx. Aju pwaq te onbʼil ex aju kyqʼij ex kyipumal erman in tzaj kyqʼoʼn in tzaj tyekʼin qa in qo tzaj tkʼiwlaʼn Jehová» (Salmo 110:3).

 Aqeju ja in che jaw qbʼinchaʼn moqa in nok bʼinchet chʼintl kyiʼj twitz tkyaqil Txʼotxʼ, in che bʼant noq tuʼn pwaq te onbʼil in tzaj kyqʼoʼne. Ateʼ nim kyeye in tzaj kyqʼoʼne onbʼil toj donate.pr418.com. Chjontexix kyeye tuʼnju pwaq te onbʼil in tzaj kyqʼoʼne.