¡Tbʼanelxix ok nimaq chmabʼil te oxe qʼij te 2020! Toj abʼqʼi lu, kubʼ grabarin tnejel maj tkyaqil programa ex jax qʼoʼn toj Internet tuʼntzun tok kykeʼyin kykyaqil erman. Noqtzun tuʼnj, chʼixme kykyaqil erman te Malaui ex Mozambique e tzalaj tiʼj nimaq chmabʼil lu ex mintiʼ ajbʼen Internet kyuʼn. ¿Tzeʼn bʼant jlu?

 Kubʼ t-ximen Kʼloj xjal Nukʼul aqʼuntl ex Kʼloj Ximel Xnaqʼtzbʼil te Kʼloj Xjal Qʼil Twitz Aqʼuntl tuʼn tok kybʼiʼn erman te Malaui ex Mozambique programa tiʼj nimaq chmabʼil te oxe qʼij toj radio ex toj televisión. ¿Tiquʼn bʼant jlu? Tuʼnju nim twiʼ Internet toj tnam Malaui. Tuʼntzunju, noq junjun erman jaku tzʼok kyconectarin kyibʼ toj Internet. Tqʼama ermano William Chumbi jlu, aju in najbʼen toj Kʼloj ansyan toj Ninja qʼil twitz aqʼuntl te Malaui: «Oʼkx jakutoq tzʼok kybʼiʼn erman nimaq chmabʼil te oxe qʼij toj radio ex televisión». Ax ikx, tzaj tqʼamaʼn juntl erman in najbʼen toj Kʼloj ansyan toj Ninja qʼil twitz aqʼuntl jlu, aju Luka Sibeko tbʼi: «Mintiʼwtlo ok kybʼiʼn erman te Malaui nimaq chmabʼil te oxe qʼij noqwit mintiʼ radio ex televisión». Chʼixme ax jlu in bʼaj toj tnam Mozambique. Noq junjun erman jaku tzaj kylaqʼoʼn jun celular moqa jun tableta tuʼn tok kykeʼyin nimaq chmabʼil ex chʼixme kykyaqil kwest in nela te kye tuʼn ttzaj kylaqʼoʼn Internet.

 Tej t-xi tzyet yabʼil COVID-19, xi tzyet tuʼn tetz chmabʼil kyoj junjun emisora te radio ex kyoj junjun canal te televisión. a Xi kyqanin erman kye xjal lu tuʼn ttzaj qʼoʼn mas ambʼil kye tuʼntzun tex programa tiʼj nimaq chmabʼil te oxe qʼij.

 Atzun kye erman te Malaui e ok weʼ twitz juntl nya bʼaʼn. Oʼkxtoq in tzaj kyqʼoʼn tajaw radio ex televisión ambʼil kye kycliente tuʼn tetz kyqʼoʼn jun programa te jun or moqa menos tuʼntzun miʼn tbʼaj kygan xjal. Noqtzun tuʼnj, xi chikʼbʼet kye qa in nonin aqʼuntl in bʼant quʼn kyiʼj xjal. Jun techel, xi qʼamet kye qa kukx jaku tzʼok kybʼiʼn xjal Tyol Dios maske mintiʼ in tzaj qʼoʼn ambʼil qe tuʼn qten kyukʼil. Jaku tzʼonin jlu kyiʼj tuʼn kyok te tbʼanel xjal ex tuʼn kytzalaj kyukʼil toj kyja. Tej tok kybʼiʼn tajaw radio ex televisión jlu, xi kyqʼoʼn ambʼil kye erman tuʼn tetz kyqʼoʼn programa tiʼj nimaq chmabʼil.

 Toj tnam Malaui, etz qʼoʼn programa tiʼj nimaq chmabʼil toj jun emisora te radio ex toj jun canal te televisión. Ex chʼixme kykyaqil xjal jakutoq tzʼok kykeʼyin moqa jakutoq tzʼok kybʼiʼn. Atzun toj tnam Mozambique, etz qʼoʼn nimaq chmabʼil toj 85 emisora te radio ex toj jun canal te televisión.

 Tuʼn tetz programa toj televisión toj kykabʼil tnam, bʼaj gastarit 28,227 dólar. b Atzun tuʼn tetz toj radio, bʼaj gastarit chʼixme 20,000 dólar. Qa oʼkxtoq in pon tseñal jun emisora toj jun lugar, xi chjet 15 dólar moqa mas, atzun qa in pontoq tseñal toj tkyaqil tnam xi chjet 2,777 dólar moqa menos.

 Ok tilil kyuʼn erman tuʼn miʼn tbʼaj kynajsaʼn nim pwaq. Jun techel, toj tnam Malaui, e tratin erman kyukʼil kyajaw emisora. Toj jun lugar, kutz tiʼn tajaw emisora jun descuento te 30<u200A> por ciento. Tuʼnju bʼant jlu kyuʼn erman, mintiʼ bʼaj gastarit 1,711 dólar. Atzun junjun emisora te Mozambique, nya nim pwaq tzaj kyqanin tuʼnju ojtzqiʼn kyuʼn qa tbʼanel xjal qe testigo de Jehová ex qa in che chojin.

 Tzaj kyqʼoʼn erman nimxix chjonte tuʼnju ok kybʼiʼn moqa ok kykeʼyin programa toj radio ex televisión. Tzaj tqʼamaʼn Patrick jlu, jun ansyan in najbʼen toj tnam Malaui: «In xi qqʼoʼne chjonte te Kʼloj Xjal Qʼil Twitz Aqʼuntl tuʼn tkyaqilju bʼant kyuʼn tuʼn tok qbʼiʼne programa moqa tuʼn tok qkeʼyine». Tzaj tqʼamaʼn juntl ermano te Malaui jlu, aju Isaac tbʼi: «Mintiʼ juntl tumel tzeʼn tuʼn tok qbʼiʼne programa, tuʼntzunju, in xi qqʼoʼne chjonte tuʼnju ok qbʼiʼne toj radio. Jun tbʼanelxix oyaj tzaj tqʼoʼn ttnam Jehová qeye. Tuʼn jlu, ok qbʼiʼne programa kyukʼil toj njaye. Qʼuqli qkʼuʼje tiʼj qa kʼujlaʼn qe tmajen Jehová tuʼn».

 Toj tnam Mozambique, ten jun pakbʼal tnejel maj toj jun nimaq chmabʼil te oxe qʼij toj abʼqʼi 2020 ex tqʼama jlu: «Tej tok nqʼoʼn nwitze tiʼj nimaq chmabʼil toj televisión, tzaj nnaʼne qa nimxix tipumal Jehová. Mintiʼ el tiʼn pandemia ambʼil te Jehová tuʼn ttzaj tqʼoʼn xnaqʼtzbʼil qe ex atz qja. El nnikʼe tiʼj qa in nok kykʼujlan kyibʼ tmajen Jehová ex qa atzun axix tok okslabʼil jlu».

 Tzaj tqʼamaʼn jun ansyan jlu, aju Wyson tbʼi: «Waje tuʼn t-xi nqʼoʼne chjonte te majen in bʼant taqʼun tuʼnju in xqʼuqin qiʼj akux at pandemia. Nya nim tiʼchaq at qeye ex mintiʼ kypwaq xjal jatumel in qo anqʼine. Pero o tzalaje tuʼnju ok qbʼiʼne programa toj radio moqa ok qkeʼyine toj televisión, ex nimxix onin qiʼje».

 Tzaj tqʼoʼn Kʼloj xjal Nukʼul aqʼuntl ex Kʼloj Ximel Xnaqʼtzbʼil ambʼil tuʼn tex qʼet programa tiʼj nimaq chmabʼil te oxe qʼij te 2021 toj radio ex televisión kyoj junjun lugar. ¿Jatumel in tzaj pwaq tuʼn t-xi chjet kye tajaw radio ex televisión? In xi chjet kye tuʼn onbʼil in tzaj kyqʼoʼne tiʼj aqʼuntl in bʼant twitz tkyaqil Txʼotxʼ toj donate.pr418.com. ¡Chjonte kyeye tuʼnju onbʼil in tzaj kyqʼoʼne!