Ma tzikʼ mas te 10 abʼqʼi in che ajbʼen qe yekʼbʼil uʼj moqa carrito kyuʼn testigo de Jehová toj kypakbʼabʼil. Ojtzqiʼnxix qe carrito lu kyuʼn xjal Twitz tkyaqil Txʼotxʼ. Bʼinchaʼn qe yekʼbʼil uʼj lu ik tzeʼn tqʼama ermana Asenata te Polonia tej tqʼama: «Nya nimaq qe carrito, pero tbʼanel qe, nya kwest tuʼn kykubʼ bʼinchet ex fácil tuʼn kyxi qiʼn jaxku tumel».

 ¿O tzʼok tbʼiʼna alkye tten e kubʼ ximet ex e kubʼ bʼinchet qe carrito?

 Tukʼil ambʼil tzaj tqʼoʼn Kʼloj xjal Qʼil Twitz Aqʼuntl, e ajbʼen nimku tiʼchaq ik tzeʼn qe carrito kyuʼn erman te Francia tuʼn kypakbʼan jatumel ateʼ nim xjal toj 2001. Ajbʼen nimku tiʼchaq kyuʼn, jun techel, e ajbʼen maletín ex qe kar aʼyeju in che ajbʼen tuʼn kyxiʼ laqʼol kyoj supermercado tuʼn kypakbʼan ex tuʼn t-xi kyiʼn uʼj. Pero te tibʼajxi, tzaj tqʼamaʼn sucursal te Francia alkye jun jaku tzʼajbʼen kyuʼn erman toj pakbʼabʼil jatumel ateʼ nim xjal. Ex atzun jlu ajbʼen kyuʼn pakbʼal toj nimku abʼqʼi.

 Tbʼanelxix oka kypakbʼabʼil erman te Francia jatumel ateʼ nim xjal ex e tzalajxix tuʼn jlu. Tuʼntzunju, toj 2011 tzaj tqʼoʼn Kʼloj Xjal Qʼil Twitz Aqʼuntl ambʼil kye erman tuʼn tkubʼ kyprobarin carrito ex qe mes atz Nueva York te Estados Unidos. Aʼyeju tnejel precursor e eʼx toj tten pakbʼabʼil lu, tbʼanel e ela qe carrito ex qe mesa toj kywitz tuʼnju nyatoq kwest tuʼn t-xi kyiʼn jaxku tumel. Pero tzaj kyqʼamaʼn erman lu tiʼ junjuntl tiʼchaq jaku che ok bʼinchet kyiʼj carrito, ik tzeʼn tuʼnju bʼinchaʼn qetoq carrito lu te tzeʼ, at nimtoq kyalel ex kwesttoq tuʼn kykuʼx ex tuʼn kyjax kyoj qe grada. Tuʼntzunju, e kubʼ bʼinchaʼn junjuntl aju mintiʼxix kyalal pero ax ikx mlaytoq che ikʼ tzʼaq tuʼn kyqʼiqʼ. Tej kykubʼ bʼinchaʼn qe txqantl carrito, e ok qe t-rueda mas nimaq ex tuʼn jlu, e bʼet mas jun rat jatumel nyatoq bʼaʼn qexix bʼe. Ax ikx ok qʼoʼn junjun qe kaj tiʼj jatumel jaku chex kykʼuʼn pakbʼal uʼj toj.

 Tbʼanel ela tten pakbʼabʼil lu, tuʼntzunju, toj 2012 tzaj tqʼoʼn Kʼloj Xjal Qʼil Twitz Aqʼuntl ambʼil tuʼn kyajbʼen carrito twitz tkyaqil Txʼotxʼ. Xi qʼamet te jun xjal tuʼn kykubʼ bʼinchet nim carrito ex tuʼn tajbʼen material tuʼn aju nya jun rat in naj.

 Ax ikx, o che ok bʼinchet junjuntl chʼixpubʼil kyiʼj qe carrito kyoj qe abʼqʼi tzma in che ikʼ. Jun techel, toj 2015 ok qʼet jun nailo plástico twitz te jbʼal. Tbʼanel in nel plástico lu toj twitz Dina aju jun ermana in nanqʼin toj tnam Georgia. Tqʼama jlu: «O che ok bʼinchet qe nailo kyiʼj carrito tuʼn miʼn tok jbʼal kyiʼj uʼj». E kubʼ bʼinchaʼn junjun cartel tok imán kyiʼj kyoj junjun yol toj 2017. Tqʼama ermano Tomasz jlu aju jun ermano te tnam Polonia: «Kwesttoq tuʼn kyel iqʼet qe cartel tok pegament tiʼj, pero jaʼlo mas tbʼanel qe cartel tok imán kyiʼj». Ax ikx toj 2019 e bʼant junjuntl chʼixpubʼil tiʼj alkye tten bʼinchabʼin qe kye carrito ex tuʼn miʼn kybʼaj naj.

 Junx xjal in kubʼ bʼinchaʼn kye kykyaqil carrito in chex samet twitz tkyaqil Txʼotxʼ. Toj ambʼil jaʼlo, in kubʼaj 43 dólar te Estados Unidos tiʼj jun carrito, mas aju pwaq in najbʼen tuʼn kyxi samet ex junjuntl. Ex o kubʼaj mas te 16 millión dólar kyiʼj carrito ex o chex samet 420 mil carrito kyoj congregación twitz tkyaqil Txʼotxʼ.

 Aj t-xi qʼamet tuʼn kykubʼ bʼinchaʼn mastl carrito, in xi qʼamet tuʼn kykubʼ bʼinchaʼn nim tuʼntzun tajbʼen pwaq te onbʼil toj tumel. Nya oʼkxju, ax ikx toj ambʼil jaʼlo, qa at jun pieza ma naj tiʼj jun carrito, nya il tiʼj tuʼn t-xi kyqanin congregación juntl, sino jaku txi kyqanin oʼkx aju pieza tuʼn tkubʼ chʼixpet aju ma naj.

 In che tzalaj pakbʼal twitz tkyaqil Txʼotxʼ aj kyajbʼen carrito kyuʼn. Ik tzeʼn te ermana Martina aju te tnam Ghana, tqʼama jlu: «Toj chʼixmi tkyaqil tten qpakbʼabʼil, aqoʼ in qoʼx jyol kye xjal. Pero aj kyajbʼen carrito quʼn, aqe xjal in che tzaj jatumel atoʼ. Axpe ikx qeju xjal noq in che bʼet, in nel kynikʼ tiʼj qa in qo pakbʼan».

 Toj jun lugar te tnam África, ikʼ jun xjal qʼil tuʼj toj tyol kyukʼil erman ateʼtoq tiʼj carrito. Tej tikʼ jun seman, meltzʼaj xjal lu ex tqʼama: «Kubʼ wuʼjine tkyaqil uʼj xi wiʼne. Nim toklen tqanil tkuʼx kyoj uʼj lu, tuʼntzunju, wajbʼile tuʼn t-xi nqʼamaʼne kye toj njaye». Nya nqayin taʼtoq tlugar xjal lu, in xi tiʼntoq junlo 500 kilómetro tuʼn qpon toj. Tej tikʼ kabʼetl xjaw, meltzʼaj xjal lu ex tqʼama: «Tkyaqil uʼj xi wiʼne, jaw kyuʼjin xjal te ntname ex tbʼanel ela toj kywitz. Kyajbʼil tuʼn kyok te testigo de Jehová, pero at junjun kyxjel. Jun techel, in nel kynikʼ tiʼj qa il tiʼj tuʼn kykuʼx toj aʼ tuʼn kybautisarin, pero mintiʼ jun aʼ nqayin jatumel in qo anqʼine, ¿sera que il tiʼj tuʼn qule tzalu tuʼn qbautisarine?». Xi kyqʼamaʼn pakbʼal te jun precursor aju in yolin toj tyol xjal lu tuʼn kukx tonin tiʼj. Ex atxix toj ambʼil aju, in che xnaqʼtzan tij Biblia.

 In qo tzalajxix tuʼnju in che ajbʼen qe yekʼbʼil uʼj moqa carrito tuʼn t-xi qqʼamaʼn Tyol Dios kyoj «kykyaqil nasyon» (Mateo 24:14). Pero ¿jatumel in tzaj pwaq tuʼn kybʼinchet qe jlu? Atz tiʼj pwaq te onbʼil in xi qʼet tiʼj aqʼuntl in bʼant twitz tkyaqil Txʼotxʼ, aju in xi qʼet toj donate.pr418.com. Chjontexix tuʼn pwaq te onbʼil in tzaj kyqʼoʼne.