«¡Kʼujlan Ja te Chmabʼil wuʼne!» chi Nicole, jun ermana txin te Colombia. «Atzun jun lugar jatumel jaku chin tene kyukʼil qe erman.» ¿Axpe jlu in kubʼ tnaʼna?

 Qe testigo de Jehová in nok kychmon kyibʼ toj junlo 63.mil Ja te Chmabʼil twitz tkyaqil txʼotxʼ. Qe nimaq ja lu in tzaj kyqʼon ambʼil qe tuʼn qkʼulin te Dios toj tumel. Ax ikx in che ajbʼen toj junjuntl tten. Jun kuʼxun precursor David tbʼi,te Colombia, in tqʼamaʼn: «Aju Qja te Chmabʼil in jaw tnimsan qe xnaqʼtzbʼil. Nim qe visitantes in che jaw labʼin tiʼj tzeʼn xqʼuqin ate qe nimaq ja lu.» Nya noq minabʼen jlu. In qo aqʼunan kyuwxix wen tuʼn tbʼaj saqin ex tuʼn kyok xqʼuqit qe Qja te Chmabʼil. ¿Tzeʼn in bʼant aqʼuntl lu?

 Qe kʼloj okslabʼil in najbʼen jun Ja te Chmabʼil kyuʼn, aʼyex in che xqʼuqin tiʼj.Tuʼntzunju, qe erman in najbʼen Ja te Chmabʼil kyuʼn in bʼaj kysaqin tkyaqilku maj. Ax ikx in bʼaj kybʼinchan qe tiʼchaq nyaxix bʼaʼn ate.

 Tuʼn kyxi onit qe kʼloj okslal tuʼn tok kyxqʼuqin qe Ja te Chmabʼil, aju Departamento Local de Diseño ex Construcción (LDC kyuʼn qe siglas toj inglés) in che jaw tjyon junjun erman tuʼn txi t-xnaqʼtzan kye erman te congregación tzeʼn tuʼn kyok xqʼuqet qe Ja te Chmabʼil. Junjun erman at tnabʼil, in xqʼuqin tiʼj qaq moqa laj Ja te Chmabʼil. In xi visitaril ex in xi t-xnaqʼtzan qe pakbʼal te kʼloj okslal tzeʼn tuʼn tbʼaj kyxqʼuqin Kyja te Chmabʼil. Aj tikʼ oxe abʼqʼi, in nok tkeʼyin tzeʼn ate qe nimaq ja lu ex in nel tnikʼ kyiʼj junjun tiʼchaq qa nya bʼaʼn ate moqa tuʼn kyxi bʼinchet chʼintl.

 Nimxix in xi kyqʼon erman chjonte tuʼnju e tzaj xnaqʼtzan tzeʼn tuʼn kyok xqʼuqit qe Ja te Chmabʼil. Indhumathi, Jun ermana te la India, in tzaj tqʼamaʼn: «Aju xnaqʼtzbʼil in tzaj qʼon qe puro tbʼanel. Jun tbʼanel oklenj aju tuʼn tel qnikʼ tij tzeʼn tuʼn tbʼaj qxqʼuqin aju Qja te Chmabʼil.» Evans, jun ermano te tnam Kenia, in tzaj tqʼamaʼn: «El qnikʼe tiʼj tzeʼn tuʼn miʼn txi najset nimku pwaq, mas bʼaʼn qa ma chex bʼinchan naj junjun tiʼchaq chʼin, naʼmxtoq kyok te matij.»

 In bʼaj gastarin nim cien pwaq moqa miles te dolares tiʼj junjun Ja te Chmabʼil junjun abʼqʼi, anoq toj alkye tembʼil ate Ja te Chmabʼil, jteʼ abʼqʼi qʼin tuʼn, ex aju tajlal qe kʼloj okslal in nok kychmon kyibʼ toj. ¿Jatumel in kanet pwaq in bʼaj gastarin kyiʼj?

 Aju pwaq in najbʼen tuʼn tok xqʼuqet Ja te Chmabʼil atz in jatz kyiʼj donaciones. Tqʼama jun ermano Alexander tbʼi, te tnam Kazajistán: «In najbʼen chʼin donacion tuʼn t-xi chjet internet, aʼ ex luz. Ex aju chʼintl in najbʼen tuʼn kytzaj laqʼet qe uʼj ex qe guantes ex junjuntl tiʼchaq in che ajbʼen tuʼn tsaqset Ja te Chmabʼil ex aju pintura.» Qa atx pwaq in kyaj in xi qʼet te Obra Mundial tuʼntzun tbʼant mas aqʼuntl ex aju in xi tiʼn nimku pwaq tuʼn kyok xqʼuqet Ja te Chmabʼil twitz tkyaqil txʼotxʼ.

 Qa at jun Ja te Chmabʼil il tiʼj tuʼn t-xi bʼinchet chʼintl in xi tiʼn kabʼe moqa oxe xjaw ex aju pwaq kʼajbʼel tiʼj, aʼyeqe ansyan il tiʼj tuʼn t-xi kyqʼamaʼn kye erman at kynabʼil te Departamento Local de Diseño ex Construcción. Aju LDC qa bʼaʼn toj kywitz ,in najbʼen aju donacion te Obra Mundial kyuʼn. Te abʼqʼi 2023 e bʼant, 8 mil 793 qe proyectos lu ex ajbʼen $76.6 millones te dólares moqa Q593 millones 650 mil quetzales . Qo yolin kyiʼj qe kabʼe proyecto lu.

 Toj Angola, at jun Ja te Chmabʼil otoq bʼant 15-abʼqʼi tbʼant len iltoq tiʼj tuʼn tbʼant nim aqʼuntl tiʼj.Ya otoq naj luz, otoq cheʼx pax qe paredes,ex kyqʼama qe vesin qa in netztoq aʼ toj Ja te Chmabʼil ex in nokxtoq toj kyja. Aju Departamento Local de Diseño ex Construcción xi tnukʼun aqʼuntl tuʼntzun tbʼant kyiʼj nya bʼaʼn jlu. Tuʼn tbʼant aqʼuntl lu xi tiʼn $9 mil 285 dólares moqa mas chʼintl te Q72 mil quetzales . Nim e jaw labʼin qe vecin ex tzaj kyqʼon chjonte tuʼn alkye tten bʼant aqʼuntl jlu.

 Toj Polania, in kutztoq aʼ twi jun Ja te Chmabʼil, in nokxtoq toj ex in bʼaj tʼoqet alfombra tuʼn jlu, iltoq tiʼj tuʼn tkyaj bʼant tiʼj kyuʼn Departamento Local de Diseño ex Construcción tuʼn txi kybʼinchan twiʼ Ja te Chmabʼil jlu ex tuʼn tjaw chʼixpet alfombra. Tuʼn tbʼant aqʼuntl lu xi tiʼn $9 mil 757 dólares, moqa chʼixme Q74 mil quetzales. Tuʼntzun jlu ya nya il tiʼj tuʼn t-xi bʼinchet jun aqʼuntl matij tiʼj Ja te Chmabʼil kyoj junjun abʼqʼi yajxitl.

 Tuʼn tok xqʼuqet nya a t-xilen jlu tuʼn t-xi qʼet nim donacion mas bien in onin tuʼn tjaw nimset tbʼi Jehová. In tqʼama ermano Shaun te tnam Tonga jlu,: «Chjonte tuʼnju in qo xqʼuqine ex in qo aqʼunane jaku qo kʼulina te Jehová toj jun Ja te Chmabʼil jatumel nukʼun kyten qe tiʼchaq ex saqin taʼ tuʼn jlu in neʼl kynikʼ qe xjal tiʼj qa jun Dios te mujbʼabʼil ex in che bʼant qe tiʼchaq tuʼn toj ttxolil . Nimxix tzalajbʼil in kubʼ qnaʼne aj in chex invitarine qe xjal tuʼn kypon toj Ja te Qchmabʼil.»

 Qkyaqil jaku qo onin tuʼn tbʼaj saqin ex tuʼn tbʼaj xqʼuqet aju Ja te Chmabʼil . Marino, jun ermano aj xnaqʼtzal te Australia in tqʼama: «Qkyaqil jaku qo onin tuʼn tok xqʼuqet aju Ja te Chmabʼil aj in bʼant quʼn in kubʼ qyekʼin qa in qo onin tuʼn miʼn t-xe najset nimku pwaq aju kʼuʼn tuʼn tajbʼen jatumel atxix tajbʼen.»

 Aju ermano Joel, te tnam India , tgan tuʼn t-xqʼuqin tij Ja te Chmabʼil . In tzaj tqʼamaʼn: «Aj in chin aqʼunane kyukʼil erman in chin ok tene ximel te tzeʼn kʼokel aju akʼaj twitz txʼotxʼ.» Nicole, aju xqo yolin tij nej, in tqʼama: «Aqe erman in che bʼinchen tij jun tubo otoq laqj toj baño, atzun we in chin trapiarine tij piso . Maske mintiʼ in onine tuʼn tbʼaj bʼinchan tubo pero in onine tuʼn tbʼaj saqset piso tuʼn miʼn tzaj jun accident».

 Qa taja tuʼn tonina noq kukx tuʼn tok xqʼuqet Ja te Chmabʼil, yolina kyukʼil ansyan jatumel in nok tchmon tibʼa. Ax ikx aju donacion in xi tqʼoʼna nya okx in najbʼen te Ja te Chmabʼil jatumel in nok tchmon tibʼa ax ikx in najbʼen te junjuntl Ja te Chmabʼil twitz tkyaqil txʼotxʼ. Jaku bʼant tuʼn tkux tqʼoʼna tdonaciona toj kaj in kubʼ qʼon toj Ja te Chmabʼil moqa jaku bʼant tuʼn tokxa toj qtembʼile te internet donate.pr418.com. Nimxix in xi qqʼone chjonte tij donaciona in tzaj tqʼoʼna.