Xi tqʼamaʼn Jesús jlu kye tdiscípulo: «Che okele testiw wiʼje [...] tuj tkyaqil twitz txʼotxʼ» (Hechos 1:8). In che tzalaj testigo de Jehová aj kyonin tuʼn tjapun kawbʼil lu. Noqtzun tuʼnj, naʼmx tpon tbʼanel tqanil kyoj junjun lugar, tuʼnju matij qe ex nim xjal in che anqʼin atz. Ax ikx, nya nim kybʼet testigo de Jehová at toj junjun tnam (Mateo 9:37, 38). ¿Tiʼ in bʼant quʼne tuʼntzun qpakbʼane kye mas xjal?

 Tuʼn tjapun kawbʼil kyaj tqʼamaʼn Jesús, in bʼant jun tiʼ tuʼn Comité de Servicio del Cuerpo Gobernante de los Testigos de Jehová. In chex tsamaʼn qe misionero kyoj lugar jatumel kyaj erman onbʼil. Toj ambʼil jaʼlo, at 3,090 misionero in che pakbʼan twitz tkyaqil Txʼotxʼ. a Chʼixme kykyaqil misionero lu o che ten toj jun xnaqʼtzbʼil tuʼn tel mas kynikʼ tiʼj Tyol Dios, ik tzeʼn aju tok tbʼi, Xnaqʼtzbʼil kye Pakbʼal tiʼj Tkawbʼil Dios. O kyaj kytzaqpiʼn misionero kyja ex o cheʼx anqʼil toj juntl tnam. Tuʼnju o chʼiy kyojtzqibʼil tiʼj Tyol Dios, in che pakbʼan ex in che onin kyiʼj junjuntl xjal tuʼn kyok lepeʼ tiʼj Jesús.

 Toj junjun sucursal, in naqʼunan Sección de Ministros en el Campo te Departamento de Servicio tukʼil Kʼloj ansyan toj Ninja qʼil twitz aqʼuntl tuʼntzun kyxi onit misionero. In xi qʼoʼn jun kyja, in che ok xqʼuqit aj ttzaj yabʼil kyiʼj ex in xi qʼoʼn chʼin kypwaq tuʼntzun tten aju at tajbʼen kye. Toj abʼqʼi te pakbʼabʼil te 2020, xi kynajsaʼn testigo de Jehová chʼixme 27 millón dólar kyiʼj misionero. Tuʼn onbʼil lu, in nok kyqʼoʼn misionero kywiʼ tiʼj pakbʼabʼil ex in che onin kyiʼj okslal jatumel in nok kychmon kyibʼ.

 ¿Tzeʼn in che onin misionero tiʼj pakbʼabʼil? In tzaj tqʼamaʼn Frank Madsen jlu, jun kyxol Kʼloj ansyan toj Ninja qʼil twitz aqʼuntl te Malaui: «Tuʼnju mintiʼ in che tzaj xobʼ misionero ex at kyojtzqibʼil tiʼj junjun tiʼchaq, o che onin kyiʼj erman tuʼn kypakbʼan jatumel kwest tuʼn tbʼant jlu, ik tzeʼn kyoj lugar jatumel mintiʼ in che okx tzaqpiʼn xjal ex jatumel in che yolin xjal toj juntl yol. Ax ikx, in kubʼ kyqʼoʼn jun tbʼanel techel kywitz txqantl tuʼnju in nok tilil kyuʼn tuʼn kynaqʼet tiʼj kykostumbr xjal ex tuʼn tbʼant juntl yol kyuʼn. Nya oʼkxju, ax ikx in che onin kyiʼj kuʼxun tuʼn kyajbʼen te Dios toj tkyaqil ambʼil. Nim toklen tuʼn t-xi qqʼoʼn chjonte te Jehová tiʼj aqʼuntl in bʼant kyuʼn misionero».

 Tqʼama jun ermano at toj Kʼloj ansyan toj Ninja qʼil twitz aqʼuntl te juntl tnam jlu: «In che ok misionero te jun yekʼbʼil tiʼj qa ateʼ testigo de Jehová twitz tkyaqil Txʼotxʼ ex qa at mujbʼabʼil kyxol. Axpe ikx o tzʼel kynikʼ xjal tiʼj qa at mujbʼabʼil qxol maske junxitl qkostumbr. O tzʼonin Tyol Dios qiʼj tuʼn tten ax qximbʼetz».

 ¿Tzeʼn in che onin misionero kyiʼj pakbʼal jatumel in nok kychmon kyibʼ? In nanqʼin Paulo toj tnam Timor Oriental ex in xi tqʼoʼn chjonte tiʼj aqʼuntl in bʼant kyuʼn misionero. Tqʼama jlu: «At nim kyaq jatumel in qo anqʼine. Tzajni qe misionero toj jun lugar jatumel at nim cheʼw, atzun tzalu, at nim kyaq, pero kukx in che pakbʼan. Tkyaqil prim in che pon kyoj chmabʼil te pakbʼabʼil ex in che kyaj bʼinchal kyrevisita ajxi tpon tmij qʼij. Ax ikx, in che pakbʼan te qale. O che onin kyiʼj nim xjal tuʼn tel kynikʼ tiʼj axix tok ex aʼyine jun kyxol jlu. In najbʼen kyipumal kyuʼn tuʼn kyajbʼen te Jehová tukʼil tzalajbʼil ex in nonin jlu kyiʼj erman tuʼn kyajbʼen te Jehová tukʼil tkyaqil kyanmi».

 In nanqʼin Ketti atz Malaui ex in najbʼen te precursora regular. Tqʼama jlu tej tyolin tiʼj qa onin jun mejebʼleʼn in che ajbʼen te misionero kyiʼj toj tja. Chi: «Tej kypon samaʼn ajbʼel jatumel in nok nchmon wibʼe, oʼkxtoq qine testigo de Jehová kyxol toj njaye. Nim e onin wiʼje ex e ok te jun tbʼanel amiw kyukʼil kykyaqil toj njaye. Tuʼnju ok tilil kyuʼn tuʼn kyaqʼunan, onin kyiʼj wale tuʼn tel kynikʼ tiʼj qa oʼkx jaku qo tzalaj aj qajbʼen te Jehová. Tuʼn tbʼanel techel kubʼ kyqʼoʼn, jaʼlo in che ajbʼen oxe ntxine te precursora regular ex atzun nchmile ya in pon kyoj chmabʼil».

 ¿Jatumel in tzaj pwaq tuʼn kyxi onit misionero? Atz in nel tiʼj onbʼil in xi qʼoʼn tiʼj aqʼuntl in bʼant twitz tkyaqil Txʼotxʼ. Nim jlu in xi qʼoʼn toj donate.pr418.com. Chjonte kyeye tuʼn onbʼil in tzaj kyqʼoʼne.