Kyoj nimku tnam, o tzaj kyqʼamaʼn aj kawil kye xjal tuʼn miʼn tok kybʼuyin kyibʼ. In xi kybʼiʼn testigos de Jehová aju in tzaj kyqʼamaʼn aj kawil, noqtzun tuʼnj, kukx in nok kychmabʼil. In najbʼen aplicación Zoom kyuʼn tuʼntzun tok kychmon kyibʼ toj videoconferencia.

 Tuʼn kukx kyok qchmabʼile, tzaj tqʼoʼn K’loj Xjal Q’il Twitz Aq’untl ambʼil tuʼn tel chʼin pwaq tiʼjju in tzaj qʼoʼn te onbʼil tuʼntzun kyxi chjet cuenta te Zoom ex tuʼn tajbʼen kyuʼn kʼloj okslal. Nim o tzʼonin jlu kyiʼj kʼloj okslal jatumel mlaytoq bʼant tuʼn t-xi kychjoʼn 15 moqa 20 dólar tiʼj jun cuenta, axpe ikx at junjun mas nim twiʼ. Tnejel, in najbʼentoq junjun aplicación kyuʼn erman jatumel nya nim kybʼet xjal jaku che okx toj moqa jakutoq tzʼokx alkyexku xjal toj. Kykyaqil qeju kʼloj okslal in najbʼen jun cuenta kyuʼn aju in xi tchjoʼn ttnam Jehová, jaku tzʼok kyxqʼuqin alkye jaku tzʼokx toj chmabʼil ex jaku tzʼok kyconectarin kyibʼ nim xjal toj ax ambʼil. Toj ambʼil jaʼlo, o txi qʼoʼn ambʼil kye mas te 65 mil kʼloj okslal tuʼn tajbʼen jun cuenta kyuʼn ex in bʼant jlu kyoj mas te 170 tnam.

 In najbʼentoq jun cuenta noq kukx te Zoom tuʼn kʼloj okslal te Kairagi, te tnam Manado toj provincia te Célebes Septentrional atz Indonesia. Noqtzun tuʼnj, xi qʼoʼn jun cuenta kye aju in xi tchjoʼn ttnam Jehová. In tzaj tqʼamaʼn ermano Hadi Santoso jlu: «Kykyaqilx erman in che tzalaj kyiʼj chmabʼil, axpe ikx qeju mintiʼxix kyojtzqibʼil tiʼj tecnología, tuʼnju nya il tiʼj tuʼn kyokx nim maj».

 Tqʼama Léster Jijón hijo jlu, aju in najbʼen te ansyan te kʼloj okslal te Guayacanes Oeste te Guayaquil (Ecuador): «Tuʼnju nya nim kypwaq erman at, mlaytoq bʼant tuʼn t-xi kychjoʼn jun cuenta te Zoom jatumel jaku tzʼok kyconectarin kyibʼ nim erman toj ax ambʼil. Atzun jaʼlo jaku tzʼok qconectarin qibʼe toj Zoom maske nim qbʼete noq tuʼnju tzaj tqʼoʼn ttnam Jehová jun cuenta qeye. Jaku txi qqʼoʼne txokbʼil kyiʼj nim xjal».

 Kubʼ ttzʼibʼin ermano Johnson Mwanza te kʼloj okslal Norte Ngwerere, te tnam Lusaka atz Zambia jlu: «Nimku maj o tzaj kyqʼamaʼn erman jlu qeye: ‹Nya oʼkx in kubʼ qnaʼne qa mas nqayin atoʼye kyiʼj erman tuʼnju in xi tchjoʼn ttnam Jehová cuenta tiʼj Zoom. Sino ax ikx, in kubʼ qnaʼne tkʼujlabʼil Jehová at qiʼje›».

 Aju pwaq in najbʼen tuʼn kyxi chjet cuenta te Zoom, atz o tzʼel tiʼj pwaq kʼuʼn kyuʼn erman tuʼn t-xi qʼet te onbʼil aj ttzaj xitbʼil. O chmet pwaq lu noq tuʼnju onbʼil in tzaj qʼoʼn twitz tkyaqil Txʼotxʼ. Chʼixme tkyaqil maj atz in tzaj samaʼn onbʼil lu toj donate.pr418.com. Chjonte kyeye tuʼnju in tzaj kyqʼoʼne onbʼil. Ax ikx in najbʼen pwaq lu tuʼn t-xi qʼet onbʼil kye erman twitz tkyaqil Txʼotxʼ aj ttzaj jun xitbʼil (2 Corintios 8:14).