Tkyaqil abʼqʼi, in cheʼx nim erman in che ajbʼen toj tkyaqil ambʼil toj Xnaqʼtzbʼil te Galaad te Watchtower aju in nok toj Ja te Xnaqʼtzbʼil te Watchtower atz Patterson (Nueva York). a In nonin xnaqʼtzbʼil lu kyiʼj erman tuʼn tel kynikʼ tiʼj alkye tten tuʼn tjapun kyoklen kyuʼn toj ttnam Jehová. Ex in che tzaj xnaqʼtzaʼn tuʼn kyonin kyiʼj erman kyoj kʼloj okslal ex kyoj sucursal twitz tkyaqil Txʼotxʼ tuʼn kychʼiy toj kyokslabʼil ex tuʼn tchʼiy qʼuqbʼil kykʼuʼj.

 Aʼyeju in che xnaqʼtzan toj Galaad in che tzaj toj junxichaq tnam twitz tkyaqil Txʼotxʼ. Jun techel tiʼj jlu, toj xnaqʼtzbʼil 147 aqeju e graduarin toj 2019, e ten 56 erman toj xnaqʼtzbʼil lu ex e tzaj toj 29 tnam. Aqeju in che ten toj xnaqʼtzbʼil lu in che ajbʼen toj tkyaqil ambʼil ik tzeʼn toj Betel, te misionero, te precursor especial moqa te superintendente.

 In nok nim aqʼuntl naʼmxtoq txi tzyet kyxnaqʼtzbʼil erman. Jun techel tiʼj jlu, aju Kʼloj onil tiʼjju aj kyxiʼ erman toj kybʼe te Kytxuylal ninja qʼil twitz Aqʼuntl in che tzaj kylaqʼoʼn kyvoleto erman o che tzaj txkoʼn tuʼn kyxiʼ toj xnaqʼtzbʼil. Ik tzeʼn bʼaj kyiʼj erman e ten toj xnaqʼtzbʼil 147, kubʼaj 1.075 dólar kypasaj teyele junjun tuʼn kypon Patterson ex tuʼn kymeltzʼaj toj kytnam. Ik tzeʼn kye erman e tzaj txkoʼn kyoj isla Salomón, e bʼet toj kyaje avión tuʼn kypon Patterson, ex tej kymeltzʼaj e bʼet toj oxetl avión. Tuʼn tkyaqil e bʼet 35.400 kilómetros. Kubʼaj 2.300 dólar te twiʼ kypasaj teyele junjun erman lu. Tuʼn miʼn tkubʼaj nim pwaq, in najbʼen jun programa kyuʼn erman te Kʼloj onil tiʼjju aj kyxiʼ erman toj kybʼe tuʼn kykanet voleto nya nim kywiʼ. Axpe ikx otoqxi txi qʼamet qa che xeʼl erman toj jun avión, kukx in jyon programa kyiʼj voleto mas barat toj nimku seman ex xjaw. Ax ikx in che ajbʼen tarjeta de créditos de aerolínea moqa millas de viajero kyuʼn erman te Kʼloj onil tiʼjju aj kyxiʼ erman toj kybʼe aju in tzaj kyoyin junjun erman.

 Nim kyxol qeju erman in che ten toj xnaqʼtzbʼil il tiʼj tuʼn tetz jun kyvisa tuʼntzun kyokx toj tnam te Estados Unidos. Tuʼntzunju, aju Kʼloj xjal in nonin tiʼjju at toklen tukʼil Ley te kytxuylal ninja qʼil twitz aqʼuntl in nonin kyiʼj erman lu tuʼn tetz kyvisa. Tuʼn kybʼant qe uʼj lu, in kubʼaj junlo 510 dólar tiʼj teyele junjun erman.

 ¿Alkye tten in nonin qiʼj qkyaqilx aju xnaqʼtzbʼil in xi qʼet kye erman lu? In najbʼen Hendra Gunawan te ansyan toj congregación Sureste Asiático ex at jun mejebʼleʼn e ten toj xnaqʼtzbʼil te Galaad in nok kychmon kyibʼ kyukʼil. Tqʼama Hendra Gunawan jlu kyiʼj: «Ojtxe mintiʼtoq jun precursor qukʼile. Pero tej kyul mejebʼleʼn lu ex in che tzalaj toj kyajbʼebʼil te Jehová, onin kyiʼj txqantl erman tuʼn kyok te precursor. Ex tej tbʼet ambʼil, xiʼ jun ermana te qcongregacione toj Xnaqʼtzbʼil kye Pakbʼal tiʼj Tkawbʼil Dios».

 In naqʼunan ermano Sergio Panjaitan kyukʼil junjun erman o che graduarit toj Xnaqʼtzbʼil te Galaad toj sucursal te Sureste Asiático, tqʼama jlu: «Aju xnaqʼtzbʼil tzaj kykʼamoʼn erman lu nya oʼkx o tzʼok te jun kʼiwlabʼil kye, sino ax ikx qeye. ¡At nim xnaqʼtzbʼil tzaj yekʼin kye! Pero mintiʼ in jaw kynimsan kyibʼ tiʼjju tzaj kykʼamoʼn, sino ax ikx in tzaj kyyekʼin qeye. In nonin jlu qiʼje ex ax ikx qeye in najbʼen jlu quʼne tuʼn qonine kyiʼj txqantl».

 ¿Jatumel in tzaj pwaq tuʼn kyok xnaqʼtzbʼil lu? Atz tiʼj pwaq te onbʼil in tzaj kyqʼoʼne te aqʼuntl in bʼant twitz tkyaqil Txʼotxʼ. Nim kyxol onbʼil lu atz in tzaj kyqʼoʼne toj donate.pr418.com. Chjontexix kyeye tuʼn kyoyaje. In najbʼen onbʼil lu tuʼn kyok Xnaqʼtzbʼil te Galaad aju in nonin kyiʼj erman twitz tkyaqil Txʼotxʼ.