Kykyaqil xjaw in qo ayon kyiʼj tbʼanel programa ex video in che jax qʼoʼn toj JW Broadcasting. Noqtzun tuʼnj, ateʼ nim erman te África mintiʼ in bʼant tuʼn tok kyqʼoʼn kywitz tiʼj toj Internet. ¿Tiquʼn?

 Tuʼnju mintiʼ in pon Internet kyoj nimku tnam te África. Qatzun qa at Internet, mintiʼxix señal ex nim twiʼ in xi chjoʼn. Jun techel, jun maj kutz tiʼn jun ansyan in bʼet kyojele Ja te Chmabʼil te Madagascar jun programa te JW Broadcasting toj jun lugar jatumel at Internet, ex xi tchjoʼn 16 dólares. a Mas nim pwaq lu twitzju in kambʼan jun xjal tiʼj toj jun seman.

 Maske in che ok weʼ twitz nya bʼaʼn lu, ateʼ nim millón xjal te África in nok kyqʼoʼn kywitz tiʼj JW Broadcasting ex mintiʼ in najbʼen Internet kyuʼn. ¿Tzeʼn in bʼant jlu?

 Atxix toj 2017, aqeju in che anqʼin atz África subsahariana jaku tzʼok kykeʼyin JW Broadcasting toj jun canal te televisión toj satélite. Mintiʼ in xi kychjoʼn erman aj tok kykeʼyin canal lu ex in nex transmisión toj 24 or kyoj qeju 7 qʼij te seman, ex toj 16 yol.

 Tuʼn tbʼant jlu, in tzaj kymajnaʼn testigos de Jehová jun canal te televisión tuʼntzun tex transmisión kyiʼj xnaqʼtzbʼil toj satélite. In pon señal te satélite toj junlo 35 tnam te África subsahariana ex in xi chjoʼn mas te 12 mil dólares toj xjaw. At maj, in xi chjoʼn chʼintl pwaq tuʼntzun tex jun programa en vivo toj juntl canal. Tuʼnju in bʼant jlu, ateʼ nim xjal in nok kyqʼoʼn kywitz kyiʼj nimaq chmabʼil te oxe qʼij ex kyiʼj xnaqʼtzbʼil nim kyoklen in che ex qʼoʼn aj tpon jun erman te kytxuylal ninja qʼil twitz aqʼuntl visitaril jun sucursal.

 Ateʼ nim testigos de Jehová ex qe xjal nya Testigo in nok kykeʼyin canal lu toj kytelevisión. Noqtzun tuʼnj, ateʼ nim erman mintiʼ in kanin kypwaq tuʼn ttzaj kylaqʼoʼn jun equipo tuʼn tok kykeʼyin. Tuʼntzunju, o che okx instalarin junjun equipo in xi kykʼamoʼn señal te satélite toj junlo 3,670 Ja te Chmabʼil. Iktzun tten, jaku tzʼok kykeʼyin erman JW Broadcasting atz. Junlo 70 dólares twiʼ jlu junx tukʼil envío qa ya at jun televisión moqa jun proyector toj Ja te Chmabʼil. Qatzun mintiʼ qe tiʼchaq lu, jaku japun twiʼ te 530 dólares.

 In xi kyqʼoʼn erman nim chjonte tiʼj canal lu. In tzaj tqʼamaʼn jun ansyan te Camerún jlu: «In nok jlu ik tzeʼn maná te qeye kyukʼil toj njaye». Te tnam Nigeria ermano Odebode ex in tzaj tqʼamaʼn jlu: «In nok qchmon qibʼe kyukʼil toj njaye oxe maj toj seman tuʼntzun tok qkeʼyine canal. In che ayon nkʼwale tuʼn tpon ambʼil lu. Nya oʼkxju, ax ikx in tzaj kyqʼamaʼn qeye tuʼn tok qqʼoʼne canal lu kyoj junjuntl ambʼil». Ex in tzaj tqʼamaʼn Rose jlu aju te tnam Nigeria: «In chin tzalajxixe wen. Ojtxe ngantoqe tuʼn nkeʼyine kyiʼj noticia, pero jaʼlo mas ngane tuʼn tok nqʼoʼne nwitze tiʼj canal JW. Jun rat in tzajtoq nqʼoje tej tok nkeʼyine noticia ex in jaxtoq npresione. Atzunte canal JW in yolin kyiʼj tbʼanel tiʼchaq ex in kubʼ nnaʼne bʼaʼn tuʼn. Ngane canal lu. Jun kʼiwlabʼil tuʼn Jehová».

 In tzaj tqʼamaʼn jun ansyan in bʼet kyojele Ja te Chmabʼil te Mozambique qa o che pon equipo kyoj Ja te Chmabʼil aqeju in tzaj kykʼamoʼn señal toj satélite tuʼntzun tok kykeʼyin erman canal JW. In che pon erman toj salón jun or naʼmxtoq t-xi tzyet chmabʼil tuʼntzun tok kykeʼyin JW Broadcasting.

 Toj asamblea internacional te 2019 aju ok atz Johannesburgo te tnam Sudáfrica, ajbʼen canal JW tuʼn kyex chikʼbʼabʼil nim kyoklen toj juntl bʼeljaj lugar, ik tzeʼn aju ex qʼoʼn tuʼn jun kyxol erman ateʼ toj Kʼloj Xjal Qʼil Twitz Aqʼuntl. In tzaj tqʼamaʼn Sphumelele jlu, jun kyxol qe erman in che aqʼunan tiʼj Broadcasting toj sucursal te Sudáfrica: «Ojtxe atztoq in che ex transmitirit chikʼbʼabʼil toj Internet. Pero iltoq tiʼj tuʼn tten tbʼanel señal ex tuʼn ttzaj laqʼet Internet. Noqtzun tuʼnj, mas barat ex segur ela tej tex transmitirit toj canal te satélite».

 Tuʼnju in tzaj kyqʼoʼne pwaq te onbʼil, jaku tzʼok kyqʼoʼn erman te África kywitz tiʼj JW Broadcasting toj satélite. Chjontexix kyeye tuʼn onbʼil in tzaj kyqʼoʼne tiʼj aqʼuntl in bʼant twitz tkyaqil Txʼotxʼ toj donate.pr418.com.