At nim xjal in che yolin kyoj junjuntl yol ex at junjuntl kykostumbr toj Latinoamérica. Ex nim kyxol xjal lu o che ok te ajbʼel te Jehová. Tuʼn kyxi onit xjal in che yolin kyoj junjuntl yol tuʼn tel kynikʼ tiʼj Tyol Dios, in nok tilil kyuʼn testigos de Jehová tuʼn kyetz ex tuʼn kyxi sipet onbʼil tiʼj Tyol Dios kyoj mas te 130 yol te Latinoamérica. a Maske nim kyoklen junjun kostumbr toj kywitz erman kyoj tnam lu, mintiʼ in kubʼ kyikʼsaʼn aqeju in tzaj tqʼamaʼn Biblia qa nya bʼaʼn qe tuʼntzun kyajbʼen te Jehová. Tuʼntzunju, o che ok weʼ twitz junjun nya bʼaʼn ex in che el ikʼen kyuʼn xjal kyoj tnam lu. ¿Alkye tten o tzʼajbʼen pwaq te onbʼil in tzaj kyqʼoʼne tuʼn kyxi onit qe erman lu?

 Ateʼ erman in che anqʼin Jalisco toj tnam México ex in che yolin toj yol huichol. Noqtzun tuʼnj, xi kyqʼamaʼn toj tumel kye xjal toj kytnam qa mlay che participarin kyoj junjun costumbr aju nya bʼaʼn in tzaj tqʼamaʼn Biblia. b Tuʼn jlu tzaj nim kyqʼoj xjal ex toj 4 te diciembre te 2017, e ok tzoqpaj jun kʼloj xjal kyiʼj junjun Testigos de Jehová ex kyiʼj junjun xjal ateʼtoq kyukʼil. Ax ikx i etz lajoʼn qe erman toj tnam kyuʼn qe xjal lu, el qʼiʼn kyja, kytxʼotxʼ ex kyqʼama qa ok che bʼel bʼyoʼn qa ma che meltzʼaj juntl maj.

 Nim e onin erman in che anqʼin nqayin tiʼj kytnam erman lu ex xi kyqʼon tkyaqil aju at tajbʼen kye. ¿Pero tiʼ iltoq tiʼj tuʼn tbʼant tuʼn kymeltzʼaj kyja? Jun kyxol qe erman, aju Agustín tbʼi in tzaj tqʼamaʼn jlu: «Mintiʼtoq qpwaqe tuʼn t-xi qchjoʼne jun abogado ex mintiʼtoq ojtzqiʼn quʼne jatumel tuʼn qxiʼye jyol onbʼil twitz ley».

 Tej tok kybʼin qe erman te sucursal te Centroamérica aju in bʼajtoq kyiʼj qe erman tuʼn kyokslabʼil, ok tilil kyuʼn tuʼn kyonin kyiʼj. Aju bʼant kyuʼn tnejel, xi kyqʼamaʼn kye aj kawil te tnam tuʼn tzaj kyjoʼn junjun tqanil tiʼj nya bʼaʼn otoq bʼaj. Yajxitl, aju Kʼloj xjal Nukʼul aqʼuntl te Kʼloj Xjal Qʼil Twitz Aqʼuntl kye Testigos de Jehová, xi tqʼon ambʼil kye erman te sucursal tuʼn kyaqʼunan junx kyukʼil Erman in che onin tukʼilju at toklen tukʼil Ley twitz tkyaqil Txʼotxʼ ex tuʼn t-xi kyqʼon part kywitz aj kawil tiʼjju otoq tzʼok bʼinchaʼn kyiʼj erman in che yolin toj yol huichol. Tej tikʼ chʼintl ambʼil, xi bʼinchaʼn tiʼj nya bʼaʼn toj Suprema Corte de Justicia de la Nación, aju mas nim toklen toj tnam México.

 Bʼaj kybʼinchaʼn jun kʼloj abogado te junxichaq tnam jun chikʼbʼabʼil jatumel xi kyqʼamaʼn qa il tiʼj tuʼn tok qʼoʼn kyoklen qe xjal in che yolin toj juntl yol ex qa nim toklen tuʼn kyxqʼuqin qe aj kawil kyiʼj xjal in che anqʼin kyoj kytnam ik tzeʼn in bʼant kyuʼn kyiʼj txqantl. Ex qa toj alkyexku tnam ax kyoklen xjal at.

 Toj 8 te julio te 2020, e onin kykyaqil jwes toj Suprema Corte de Justicia kyiʼj Testigos de Jehová ex tzaj kyqʼamaʼn tuʼn kymeltzʼaj kykyaqil qe erman otoq che etz lajoʼn toj kytnam. Aju Agustín ma qo yolin tiʼj toj taqikʼ oxe, yolin te kyxel kykyaqil ex tzaj tqʼamaʼn jlu: «Nimxix in qo tzalaje ex in xi qqʼoʼne chjonte tiʼj tkyaqil aju o bʼant kyuʼn erman qiʼje. Noqwit mintiʼ e onin qiʼje, mintiʼwtlo jun tiʼ bʼant quʼne».

 Chʼixme ax jlu bʼaj kyiʼj erman te Ecuador tuʼnju in che yolin toj juntl yol atz San Juan de Ilumán, aju chqʼajlaj Otavalo tbʼi ex toj lugar lu in che anqʼin qe xjal te junxichaq tnam. Toj 2014, tzaj qʼoʼn permis tuʼn tjaw bʼinchet jun Ja te Chmabʼil ex xi tzyet tuʼn tjaw bʼinchet, noqtzun tuʼnj, e ok ten 100 xjal obligaril kye erman tuʼn tweʼ aqʼuntl kyuʼn tuʼnju otoq txi qʼamaʼn kye tuʼn jun pal tuʼn tbʼant jlu kyuʼn. Nya oʼkx jlu bʼant kyuʼn, sino ax ikx xi kyqʼamaʼn kye erman tuʼn miʼn toktl kychmabʼil.

 Aqeju Erman in che onin tukʼilju at toklen tukʼil Ley te sucursal te Ecuador, e aqʼunan junx kyukʼil erman te kytxuylal ninja qʼil twitz aqʼuntl tuʼn kykolin kyiʼj erman tuʼnju ya mintiʼ xi qʼoʼn ambʼil kye tuʼn kykʼulun te Jehová. Xi bʼinchet tiʼj nya bʼaʼn kyoj tribunal, nim onin jlu tuʼn ya miʼn tok kybʼinchaʼntl xjal nya bʼaʼn kyiʼj erman ex xi qʼoʼn ambʼil kye tuʼn tok kychmon kyibʼ ex tuʼn tkubʼ bʼaj Ja te Chmabʼil kyuʼn. Pero tuʼn tok xqʼuqit kyoklen erman toj ambʼil tzul, xi kyqʼamaʼn erman licenciado kye tribunal tuʼn tok tilil kyuʼn tuʼn ttzaj kytzaqʼweʼn jun xjel nim toklen: ¿ilpe tiʼj tuʼn t-xi kynimen xjal in che yolin kyoj txqantl yol aju kawbʼil in kubʼ kyqʼoʼn qe derechos humanos twitz tkyaqil Txʼotxʼ?

 Toj 16 te julio te 2020, xi bʼinchan tiʼj nya bʼaʼn toj Corte Constitucional del Ecuador ex toj tribunal mas nim toklen toj tnam aju. Aʼyeju erman te Ecuador e jaw skʼoʼn tuʼn kyxiʼ yolil, in che aqʼunan te abogado. Ax ikx e onin qe kyaje erman abogado ex at nim kyojtzqibʼil kyoj junjuntl tnam. Tuʼnju tzaj pandemia te COVID-19 ok kyconectarin kyibʼ abogado toj videoconferencia te nimku tnam tuʼn bʼaj bʼinchet tiʼj nya bʼaʼn. Tzma tnejel maj tzaj tqʼoʼn tribunal ambʼil te jun kʼloj abogado kye testigo de Jehová tuʼn t-xi kybʼinchaʼn tiʼj nya bʼaʼn toj videconferencia. c Xi kyqʼamaʼn kʼloj ermano abogado aju tzaj kyqʼamaʼn aj kawil twitz tkyaqil Txʼotxʼ ex xi kychikʼbʼaʼn qa kykyaqilx xjal at kyoklen axpe ikx qa in che yolin toj juntl yol.

 Toj ambʼil jaʼlo, in che yon erman te Otavalo tiʼj tqanil tzul tqʼamaʼn Corte Constitucional ex in xi kyqʼoʼn chjonte tiʼj onbʼil xi kyqʼoʼn erman kye. Jun ermano ansyan César tbʼi te kʼloj okslal Ilumán Quichua, tzaj tqʼamaʼn jlu: «Oʼkx Jehová jaku tzʼajbʼen ttnam tuʼn tuʼn tbʼant nim tiʼchaq tuʼn kyiʼj chʼin tmajen».

Kykyaqil abogado ex qeju e onin kyiʼj erman, testigo de Jehová qe ex mintiʼ xi chjet twiʼ kykʼuʼj. Noqtzun tuʼnj, xi tiʼn nim ambʼil ex pwaq tuʼn t-xi bʼinchet tiʼj nya bʼaʼn ex tuʼn kyxiʼ kolil kyiʼj erman twitz tribunal. Aju bʼaj toj México xi tiʼn mas te 380 or tuʼn tbʼaj kybʼinchan kyten abogado ex junjuntl erman e onin tuʼn t-xi bʼinchet tiʼj nya bʼaʼn, ax ikx xi tiʼn 240 or tuʼn tbʼaj traducirit qe uʼj tiʼj. Ax ikx tej ttzaj nya bʼaʼn toj Ecuador, e onin chʼixme 40 abogado te tkyaqil twitz Txʼotxʼ ex xi tiʼn nim syent or tuʼn kyaqʼunan tiʼj. ¿Jatumel ma tzaj pwaq quʼne aju sajbʼen tuʼn qkoline kyiʼj erman? Tiʼj onbʼil in tzaj kyqʼoʼne toj junxichaq tten ik tzeʼn toj donate.pr418.com. Chjontexix tuʼn kyoyaje.