Toj abʼqʼi 2020, tzaj nim xitbʼil tuʼnx twitz txʼotxʼ ex tzaj tzyet txʼuʼj yabʼil COVID-19. ¿Tiʼ bʼant kyuʼn testigos de Jehová tuʼn kyonin kyiʼj qeju tzaj nya bʼaʼn kyiʼj?

 Toj abʼqʼi te pakbʼabʼil te 2020, a tzaj tqʼoʼn Kʼloj xjal Nukʼul aqʼuntl te Kʼloj Xjal Qʼil Twitz Aqʼuntl ambʼil tuʼn tajbʼen 28 millón dólar b tuʼn t-xi qʼet onbʼil kye erman tej ttzaj jun xitbʼil. Ajbʼen pwaq lu tuʼn t-xi qʼet onbʼil kye qeju tzaj jun nya bʼaʼn kyiʼj kyuʼn mas te 200 xitbʼil e tzaj, ik tzeʼn yabʼil COVID-19, qe kyqʼiqʼ jbʼal, weʼyaj atz Venezuela, qʼijal toj tnam Zimbabue ex aʼ jaw chʼiy atz África. Tzaj laqʼet junjun tiʼchaq ik tzeʼn wabʼj, aʼ, xbʼalun, qʼanbʼil ex jun lugar jatumel tuʼn kykyaj ten erman. Ax ikx, ajbʼen pwaq lu tuʼn ttzaj laqʼet junjun tiʼchaq in che ajbʼen tuʼn tbʼinchet limpieza, tuʼn kyjaw bʼinchet junjun ja moqa tuʼn kybʼaj bʼinchet chʼintl. Qo yolin kyiʼj junjun tiʼchaq o bʼant tuʼn t-xi qʼet onbʼil kye erman.

 COVID-19. O tzaj nya bʼaʼn kyiʼj kykyaqil erman twitz tkyaqil Txʼotxʼ tuʼn yabʼil lu. Ateʼ junjun mintiʼ in kanin kypwaq, o tzaj yabʼil kyiʼj moqa in che bʼisun. Tuʼntzunju, tuʼn kyxi onit erman lu, o che jaw jyoʼn mas te 800 Kʼloj ansyan in xi kyqʼoʼn onbʼil aj ttzaj xitbʼil. In nok kykeʼyin ansyan lu alkyeqe onbʼil kyaj erman ex in xi kyqʼamaʼn te Kʼloj xjal Nukʼul aqʼuntl tuʼntzun ttzaj qʼoʼn onbʼil kye.

 Akux in nex abʼqʼi, xi tqʼoʼn Kʼloj ansyan lu junjun tiʼchaq kye erman ik tzeʼn wabʼj, aʼ, qʼanbʼil ex qe tiʼchaq in che ajbʼen tuʼn tbʼinchet limpieza. Atzun kyoj junjuntl tnam, e onin kyukʼil ansyan in che anqʼin atz tuʼntzun ttzaj qʼoʼn onbʼil kye erman tuʼn gobierni.

 O tzʼok kykeʼyin xjal aqʼuntl in bʼant tuʼn ttnam Jehová aj ttzaj jun xitbʼil. Jun techel, xi tqʼamaʼn jun nejenel kye polisiy te tnam Zambia jlu kye erman, aju Field Simwinga tbʼi: «In xi qqʼoʼne nimxix chjonte kyeye tuʼnju jun rat naj e onine kyiʼj familia tzaj nya bʼaʼn kyiʼj».

 Weʼyaj toj tnam Angola. Tej ttzaj yabʼil COVID-19, ya mintiʼxix ten wabʼj toj tnam Angola ex jax kywiʼ tiʼchaq. Tuʼntzunju, mas kwest ela toj kywitz erman tuʼn ttzaj laqʼet kywa.

 Tuʼn t-xi qʼet onbʼil kye erman lu ex tuʼn t-xi qʼet kywa, xi qanit onbʼil te sucursal te Brasil. Tuʼn miʼn tbʼaj kyyajin erman onbʼil in tzaj qʼoʼn te oyaj, tnejel bʼaj kybʼiʼn jniʼ twiʼ wabʼj ex jteʼ jaku tzʼel cobrarin kyiʼj tuʼn t-xi qʼiʼn. Tuʼntzunju, kubʼ kyximen qa mastoq bʼaʼn tuʼn ttzaj kylaqʼoʼn nim wabʼj. Tuʼn t-xi qʼet jun bols te 44 libra wabʼj te jun xjal moqa familia ik tzeʼn arroz, frijol ex aseyt, oʼkx bʼaj gastarit 22 dólar. Toj ambʼil jaʼlo, o txi sipet 33 mil 544 bols wabʼj. O txi samet chʼixme 654 tonelada wabʼj ex junjuntl tiʼchaq kye mas te 50 mil xjal.

 ¿Tiʼ kubʼ kynaʼn erman tuʼn onbʼil xi qʼoʼn kye? In tzaj tqʼamaʼn Alexandre jlu, aju in nanqʼin najchaq tiʼj tnam Angola: «O tzʼel nnikʼe tiʼj qa kʼujlaʼn qine tuʼn Jehová, qa nya njunalxe atine ex qa nim woklene toj twitz ttnam». In tzaj tqʼamaʼn Mariza jlu, jun txubʼaj tjunalx in xqʼuqin kyiʼj tal: «Tzaj tbʼiʼn Jehová nnaʼj Diose. In xi nqʼoʼne nimxix chjonte te ex te ttnam».

 Qʼijal toj tnam Zimbabue. Toj abʼqʼi te pakbʼabʼil te 2020, mintiʼ tzajxix jbʼal toj tnam Zimbabue ex chʼixme e kyim nim millón xjal tuʼn weʼyaj. Ax ikx kye erman, mintiʼ ten nim kywa.

 Tuʼn t-xi qʼet kywa erman, xi qʼet kyoklen jweʼ Kʼloj ansyan in xi kyqʼoʼn onbʼil aj ttzaj xitbʼil. Ateʼ nim erman e onin tuʼn tbʼaj nukʼet wabʼj ex tuʼn t-xi iqʼet toj kar, atzun junjuntl tzaj kyqʼoʼn kykar te majen. c Toj abʼqʼi te pakbʼabʼil te 2020, bʼaj gastarit 691 mil 561 dólar tuʼn t-xi qʼet kywa mas te 22 mil 700 xjal.

 Ateʼ junjun erman otoq kubʼaj kywa tej t-xi qʼoʼn onbʼil kye. Tuʼntzunju, xi kyqʼoʼn nimxix chjonte te Jehová ex ateʼ junjun e ok ten bʼitzil.

 Toj jun lugar, e ten kabʼe ermana o kyim kychmil toj jun chmabʼil jatumel tzaj qʼamaʼn kye qa tzul qʼoʼn onbʼil kye tuʼn jun organización mintiʼ toklen tukʼil gobierni (ONG). Noqtzun tuʼnj, e ok ten xjal yolil tiʼj política. Tuʼntzunju, kubʼ kyximen ermana qa mlaytoq tzaj kykʼamoʼn onbʼil. Tej kyikʼ bʼet, kykyaqil e ok ten xmayil kyiʼj ex kyqʼama: «Miʼn che ultle qanil kywaye qukʼile». Noqtzun tuʼnj, tej tikʼ kabʼe seman e kanin erman qʼol kywa ermana lu. Bʼaj jlu tej atxtoq nim ambʼil tuʼn tpon onbʼil tuʼn ONG.

 Ax ikx, e yolin xjal bʼaʼn tiʼj ttnam Jehová tej t-xi qʼet onbʼil kye erman toj tnam Zimbabue. Qo yolin tiʼjju bʼaj tiʼj Prisca, aju in nanqʼin toj jun tal tnam. Maske tzaj nya bʼaʼn tuʼnju mintiʼ jbʼal, kukx pakbʼan Prisca tkyaqil miércoles ex viernes, axpe ikx tej kyqʼuʼn moqa tej kykjon xjal tiʼj txʼotxʼ. E xmayin xjal tiʼj ex xi kyqʼamaʼn te: «Che kyimel toj tjaya tuʼn weʼyaj qa kukx in pakbʼana». Atzunte Prisca xi ttzaqʼweʼn kye: «Mintiʼ in che kyaj tkolin Jehová tmajen». Tej tikʼ chʼin ambʼil, pon kyiʼn erman twa. Tej tbʼaj jlu, e jaw labʼin junjun tvesin ex xi kyqʼamaʼn jlu te: «Mintiʼ o kyaj kolina tuʼn Dios. Qaje tuʼn tel mas qnikʼe tiʼj». Atzun jaʼlo, in nok kybʼiʼn wuq tvesin chmabʼil toj radio.

 Akux in nul laqʼeʼ tqʼijlalil Jehová, mas che tzajel xitbʼil tuʼnx twitz txʼotxʼ (Mateo 24:3, 7). In xi qqʼoʼne chjonte kyeye tuʼnju in tzaj kyqʼoʼne pwaq te onbʼil toj donate.pr418.com. Kʼonil pwaq lu tuʼn t-xi qʼet onbʼil kye erman in che ok weʼ twitz jun nya bʼaʼn.