Tuʼnju in qo anqʼin kyoj bʼajsbʼil tqʼijlalil, mintiʼ in qo jaw labʼin tiʼj aj tok qbʼiʼn qa at qʼoj ex qa «tqanil tiʼj qʼoj» (Mateo 24:6). Ateʼ nim erman in tzaj nya bʼaʼn kyiʼj toj ambʼil lu, pero in xi qʼet onbʼil kye tukʼilju at tajbʼen kye. Tej tok qbʼiʼn Tkabʼin tqanil tuʼn Kʼloj Xjal Qʼil Twitz Aqʼuntl te 2022, chewix qanmi tuʼnju etz qʼamaʼn qa otoq bʼaj kynukʼun erman kyten tuʼn t-xi qʼet onbʼil kye erman atz Europa del Este tuʼnju otoq tzaj nya bʼaʼn kyiʼj tuʼn qʼoj in nok toj tnam Ucrania. ¿Tzeʼn in chex onit erman lu maske at qʼoj? ¿Tiʼ in kubʼ kynaʼn erman te tnam Ucrania aj t-xi qʼet onbʼil kye?

 Toj 24 te febrero te 2022, tojxju qʼij tej t-xi tzyet qʼoj toj tnam Ucrania, tzaj tqʼoʼn Comité te Coordinador ambʼil tuʼn tajbʼen pwaq tuʼn kyxi onit erman. Tibʼajxi jlu, tzaj tlaqʼoʼn sucursal te Ucrania qe tiʼchaq ex xi kysipen qeju 27 Comité te Socorro.

 Nya oʼkxju, jun rat naj e ok ten erman ateʼ toj kytxuylal ninja qʼil twitz aqʼuntl ximel tiʼj tzeʼn jakutoq che onin tiʼj sucursal te Ucrania. Xi tqʼamaʼn Comité te Coordinador ex Publicación te Cuerpo Gobernante te Departamento Mundial de Compras tuʼn tkubʼ kyximen tiʼ jakutoq bʼant kyuʼn junx kyukʼil junjun erman ateʼ toj sucursal te Ucrania ex Polonia. Tkyaqil qʼij, ok kychmon kyibʼ nim erman ateʼ toj sucursal lu kyukʼil erman te departamento de Compras, te Envío ex te Asuntos Legales tukʼil jun ansyan at toj Comité te Sucursal te Ucrania ex kyukʼil junjun erman te Departamento Mundial de Compras tuʼntzun tbʼaj kynukʼun aqʼuntl.

 Tqʼama ermano Jay Swinney jlu, aju in nonin toj Departamento Mundial de Compras: «Tnejel, iltoq tiʼj tuʼn tok qbʼiʼne tiʼ onbʼil kyajtoq erman. Qajtoqe tuʼn t-xi qsamaʼne wabʼj ex junjuntl tiʼchaq kye, aju ya naqʼli qe tiʼj. Pero nya oʼkx tuʼn tok qbʼiʼne alkyeqe tiʼchaq at tajbʼen kye erman, sino ax ikx, ok tilil quʼne tuʼn tel qnikʼe tiʼj tzeʼn jakutoq che okx tiʼchaq toj tnam Ucrania ex mintiʼ tuʼn t-xi tiʼn nim ambʼil».

 Toj 9 te marzo te 2022, ya otoq tzʼel nikʼbʼaj tiʼj tiʼ il tiʼj tuʼn t-xi samet. Kubʼ ximet tuʼn t-xi samet junjun wabʼj ik tzeʼn qe lata tukʼil chibʼj ex pescado, qe cereal, arroz, frijol, jabón ex papel higiénico. Toj ambʼil lu, jaw qʼiʼn tajlal pwaq tuʼn t-xi tiʼn qe tiʼchaq lu ex tzaj qʼamaʼn qa iltoq tiʼj tuʼn t-xi tchjet junlo 65 dólar ex jakutoq kanin jlu toj kyaje seman te jun xjal. Tuʼnju ateʼtoq nim mil erman kyajtoq qe tiʼchaq lu, tzaj tqʼoʼn Comité te Coordinador ambʼil tuʼn tajbʼen nim pwaq tuʼntzun kyxi samet qe tiʼchaq. Pero, ¿tiʼ jakutoq bʼant tuʼn miʼn ttzaj nya bʼaʼn kyiʼj erman aj kyxi samet onbʼil lu?

 Toj 13 te marzo, bʼant jun prueba kyuʼn kabʼe erman te Polonia. Xi kyiʼn qe tiʼchaq toj sucursal te Polonia tuʼntzun tpon kyiʼn toj jun almacén at toj tnam Ucrania, nqayin tiʼj tnam Leópolis (Lviv). Tej naʼmxtoq tpon qʼij tuʼn t-xi kyiʼn qe tiʼchaq, e onin erman te sucursal te Ucrania ex Polonia kyiʼj tuʼntzun tbʼaj kybʼinchaʼn kyten. Bʼaj kybʼinchaʼn qe uʼj tuʼntzun kyex toj frontera ex iltoq tiʼj tuʼn t-xi kyqʼamaʼn qa in bʼanttoq jlu kyuʼn tuʼntzun kyonin kyiʼj xjal ex ok tilil kyuʼn tuʼn tok qʼet techel tiʼj kykar tuʼn tel nikʼbʼaj tiʼj qa in che onin kyiʼj txqantl. Ax ikx, e onin erman te Ucrania kyiʼj tuʼntzun tel kynikʼ tiʼj alkye bʼe mas bʼaʼn tuʼn t-xi kyiʼn aj kyokx toj tnam. Atz e pon qe tiʼchaq Leópolis ex mintiʼ xi tiʼn 24 or tuʼn kyxi sipet kye Comité te Socorro. Mintiʼ jun nya bʼaʼn tzaj kyiʼj erman tej kymeltzʼaj juntl maj toj tnam Polonia. Bʼant jlu tuʼnju xi bʼinchet qe tiʼchaq toj tumel ex tuʼnju tzaj kʼiwlaʼn tuʼn Jehová.

 Tbʼanel ok tnejel viaje, pero oʼkx xi sipet menos te jun tonelada wabʼj (jun tonelada te Estados Unidos). Atxtoq junlo 200 tonelada tuʼn t-xi sipet (220 toneladas te Estados Unidos). ¿Tiʼ jakutoq bʼant tuʼn kyxi samet ex tuʼn kyxi sipet toj menos ambʼil?

 Tej tjaw kyuʼjin xjal toj jw.org tiʼ nya bʼaʼn in tzaj kyiʼj erman tuʼn qʼoj in nok Ucrania, nim kye kyajtoq tuʼn kyonin. Aqeju in che anqʼin najchaq tiʼj tnam Ucrania, tzaj kyqʼoʼn onbʼil tiʼj aqʼuntl in bʼant kyuʼn testigo de Jehová tuʼnju ojtzqiʼn kyuʼn qa toj tumel tuʼn tajbʼen pwaq. Atzun qeju in che anqʼin nqayin tiʼj tnam Ucrania, e onin toj junjuntl tten tuʼnju el kypaʼn ambʼil, junjun tiʼchaq kye ex kyipumal tuʼntzun kyonin. Atzun jlu junjun tiʼchaq bʼant kyuʼn.

 Toj tnam Polonia, bʼaj kybʼinchaʼn nim erman nim mil cajas kyukʼil tiʼchaq ex bʼaj kydibujarin tal kʼwal qe tarjetita tuʼntzun t-xi kyqʼoʼn kye erman. Tqʼama Bartosz Kościelniak jlu, aju in nonin toj Departamento de Compras te sucursal te Polonia: «[Toj Traducción del Nuevo Mundo,] in tzaj tqʼamaʼn Salmo 110:3 qa kyuʼnx kyibʼ xjal etzan tuʼn Jehová che onil tiʼj. Nim maj otoq jaw wuʼjine qe yol lu, pero naʼmxtoq tok nkeʼyine jun maj ik tzeʼn tej kyul nim syent erman onil tiʼj alkyexku aqʼuntl».

 At jun ermano at jun t-empresa internacional te logística, tzaj tqʼoʼn qe tcamión te majen ex xi tchjoʼn tkyaqil gasolina ajbʼen kyiʼj kar. Tqʼama jlu: «Te weye, atzun jun ambʼil lu jatumel jaku kubʼ nyekʼine kye erman ex te Jehová qa kʼujlaʼn qe wuʼne. In chin tzalaje tuʼnju xi nqʼamaʼne tuʼn wonine». Tuʼn tkyaqil, tzaj qʼoʼn mas te 2,034 galón gasolin te oyaj tuʼntzun tajbʼen tuʼn t-xi sipet wabʼj. Atzun kye junjuntl erman, el kypaʼn ambʼil tuʼn kymanejarin chʼixmi 48,000 kilómetros.

 Noq tuʼnju e onin erman ex tuʼnju kubʼ kyyekʼin kykʼujlabʼil, toj 28 te marzo, tej tikʼ 15 qʼij te tnejel viaje, ya otoq txi qʼiʼn 100 tonelada tiʼchaq kye erman (110 tonelada te Estados Unidos). Ex tuʼnju tzaj kyqʼoʼn nim erman ex qe kʼayil nim tiʼchaq te oyaj tej kybʼaj bʼinchet qe caja, tuʼn jlu mintiʼ bʼaj najset nim pwaq. Jaʼlo, ya o xi kysamaʼn testigo de Jehová 190 tonelada tiʼchaq te onbʼil toj tnam Ucrania. ¿Tiʼ kubʼ kynaʼn erman tej tpon qʼoʼn onbʼil kye?

 Tej kypon caja atz Leópolis, xi kysipen Comité de Socorro toj tkyaqil tnam Ucrania kye qeju at tajbʼen kye. Ateʼ nim caja xi samaʼn kyoj tnam ateʼ mas te 1,300 kilómetros tiʼj tnam Leópolis. Maske ok tilil kyuʼn erman tuʼn miʼn t-xi tiʼn nim ambʼil, pero xi tiʼn ambʼil tuʼn kypon. a

 Tqʼama Markus Reinhardt jlu, jun kyxol erman at toj Kʼloj ansyan toj Ninja qʼil twitz aqʼuntl te Ucrania: «Tuʼn tkyaqilju in bʼaj, ateʼ nim erman o tzʼok kyqʼoʼn kywitz tiʼj tkʼujlabʼil Jehová ex tiʼjju tzeʼn in nonin kyiʼj aj in xi kybʼiʼn tqanil tuʼn ttnam Jehová, axpe ikx aj naʼmxtoq ttzaj jun nya bʼaʼn. Jun techel, in tzaj tqʼamaʼn ttnam Jehová qe qkyaqilx tuʼn tbʼaj qchmoʼn chʼin qwa ex qkʼaʼ aʼ toj qja, aju jaku kanin kyoj junjun seman. Ex tuʼnju in qo yolin tiʼj jlu, tqʼama jun ansyan Anton tbʼi te congregación Kiev jlu: ‹In xi qqʼoʼne nim chjonte tuʼnju bʼinchaʼn qtene tuʼn ttnam Jehová kyiʼj ambʼil ik tzeʼn jlu. Tuʼnju kʼuʼn aʼ quʼne, kʼuʼn chʼin qwaye ex jun radio, ma tzʼonin jlu tuʼn miʼn qkyime›. Tbʼanel tuʼnju in xi kybʼiʼn erman tkyaqil tqanil. Tuʼn jlu ma ten ambʼil tiʼj sucursal tuʼn tbʼaj tnukʼun aqʼuntl tuʼn t-xi qʼet onbʼil».

 ¿Tiʼ kubʼ kynaʼn erman tej tpon onbʼil? Tqʼama Míkola ex Zinaida jlu, aqeju in che anqʼin atz Járkov: «Tuʼnju in che ximen erman qiʼje, in kuʼpen toj qanmiye. Chjonte kyeye tuʼn qwaye ex kyuʼn qʼanbʼil. Qʼanchaʼl qa in nonin Jehová tiʼj tkyaqil jlu». Ax ikx, tqʼama Valentina jlu ex tojx tnam aju in nanqʼin: «Tej t-xi tzyet qʼoj, iltoq tiʼj tuʼn qayone toj fila tuʼntzun tlaqʼet qwaye ex nya tkyaqil maj kanet aju at tajbʼen qeye. Pero el tnikʼ Jehová tiʼj jlu. Tuʼntzunju, e tzaj tsamaʼn qe erman qjaye ex qʼiʼn qe caja kyuʼn jatumel kykuʼx qe tiʼchaq atxix tajbʼen qeye. Aj in cheʼx tiʼchaq toj il ex in kubʼ qximen qa ya mlay bʼant jun tiʼ quʼn, toj ambʼil lu in nok qkeʼyin tzeʼn in nonin Jehová ex ttnam qiʼj toj jun tbʼanel tten. In chewix qanmi aj ttzaj qʼoʼn onbʼil qe toj jun ambʼil jatumel in qo jyon tiʼj».

 I etz oq Evguen, Irina ex Mikita atz Mariúpol ex kyqʼama jlu: «In xi qqʼoʼne chjonte kyeye tuʼn tkyaqil qanmiye tuʼnju in che xqʼuqine kyiʼj toj qjaye tukʼil kʼujlabʼil. Ul onbʼil toj jun ambʼil jatumel atxix tajbʼen qeye. ¿Ojtzqiʼn kyuʼne? Tnejel, kubʼ qximane qa oʼkx kykuʼx tiʼchaq kyoj caja, pero tej kyjaw qjaqoʼne, el qnikʼe tiʼj qa tkuʼxtoq nim kʼujlabʼil kyoj».

 In nel qnikʼ tiʼj qa in nonin xewbʼaj xjan ex Jehová aj t-xi qʼet onbʼil jatumel at qʼoj ex «tqanil tiʼj qʼoj». Ex ax jlu jaku txi qʼamet tiʼj onbʼil in tzaj kyqʼoʼne ex nim maj in tzaj kysamaʼne toj donate.pr418.com. ¡Chjonte kyeye tuʼnju bʼaʼn che qʼone oyaj!

Jun rat naj in xi qʼet onbʼil ex toj tumel

1. 24 te febrero te 2022: Tzaj tqʼoʼn Comité te Coordinador ambʼil tuʼn tajbʼen pwaq tuʼn sucursal te Ucrania tuʼntzun t-xi qʼet onbʼil kye erman otoq tzaj nya bʼaʼn kyiʼj.

2. 24 te febrero a 8 te marzo te 2022: Tzaj tlaqʼoʼn sucursal te Ucrania qe tiʼchaq ex xi qʼet kye Comité te Socorro tuʼntzun t-xi kysipen kye erman. Ax ikx, bʼaj tbʼinchaʼn tten sucursal tuʼntzun t-xi tkʼamoʼn ex tuʼn t-xi tsipen onbʼil in pon samaʼn tuʼn tnam Polonia.

3. 9 te marzo te 2022: Tzaj tqʼoʼn Comité te Coordinador ambʼil tuʼn t-xi samet onbʼil kye erman otoq tzaj nya bʼaʼn kyiʼj atz Ucrania.

4. 10 a 12 te marzo te 2022: Bʼaj ximet tuʼn tok jun prueba tuʼn kyxiʼ erman qʼol jun viaje te Polonia tuʼntzun t-xi kyiʼn wabʼj ex junjuntl tiʼchaq kye erman atz Leópolis te Ucrania.

5. 13 te marzo te 2022: Ok tnejel prueba tiʼj viaje tuʼntzun t-xi kyiʼn erman te Polonia wabʼj ex junjuntl tiʼchaq kye erman te Leópolis.

6. 14 a 16 te marzo te 2022: Toj tnam Polonia, e pon erman te Departamento Local de Diseño ex Construcción toj jun Salón te Asamblea nqayin tiʼj tnam Poznań, tuʼntzun tbʼaj bʼinchet junjun caja tukʼil wabʼj ex junjuntl tiʼchaq kye erman.

7. 17 te marzo te 2022: Tej tikʼ kyaje qʼij tej otoqxi bʼant tnejel viaje kyuʼn erman, xi tzyet tuʼn t-xi kyiʼn 13 tonelada (14 tonelada te Estados Unidos) wabʼj ex junjuntl tiʼchaq tuʼntzun tpon toj frontera te Ucrania tuʼntzun t-xi qʼet kye erman.

8. 21 a 27 te marzo te 2022: Bʼaj bʼinchaʼn mas caja toj tnam Polonia ex xi samaʼn toj tnam Ucrania. Naʼmxtoq tikʼ 24 or, ya otoq txi sipet kyoj lugar jatumel mas kyaj erman onbʼil.

9. 28 te marzo te 2022: Tej tikʼ 20 qʼij ttzajlen qʼoʼn ambʼil tuʼn t-xi qʼet onbʼil, ya otoq txi sipet 100 tonelada (110 tonelada te Estados Unidos) wabʼj ex junjuntl tiʼchaq kye erman atz Ucrania.

 Toj ambʼil jaʼlo, ya o txi kysamaʼn testigo de Jehová 190 tonelada onbʼil toj tnam Ucrania (209 tonelada te Estados Unidos).