Toj ambʼil jaʼlo in tzaj kykʼamoʼn testigo de Jehová nim xnaqʼtzbʼil kyoj kʼuxbʼil. Noqtzun tuʼnj, kyoj junjun lugar kwest tuʼn tlaqʼet moqa tuʼn tchjet Internet kyuʼn erman. Ex kyoj junjuntl lugar, noq chʼin ambʼil in pon Internet, chebʼe in bʼet moqa mintiʼ.

 Toj ambʼil jaʼlo, nim erman ya jaku kuʼtz kyiʼn qe quʼj maske mintiʼ Internet kyukʼil. ¿Tzeʼn in bʼant jlu?

 In najbʼen JW Box kyuʼn. Jun tal kaj in xi samet kye kʼloj okslal najchaq ateʼ ex kwest tuʼn tpon Internet kyukʼil. ¿Tiʼtzun JW Box? Jun rúter in tzaj laqʼoʼn tukʼil jun empresa ex at jun programa toj, aju in bʼaj bʼinchaʼn tuʼn Kʼloj xjal in che aqʼunan tiʼj Computación te Betel. Ax ikx, in che kubʼ qʼet video toj ex qe uʼj ateʼ toj jw.org. Chʼixme 75 dólar twiʼ junjun tal kaj.

 Aj kypon erman toj Ja te Chmabʼil in najbʼen wifi kyuʼn toj kycelular moqa toj kytableta tuʼn tkutz kyiʼn qe uʼj ex qe video ateʼ toj JW Box. Maske nya nim twiʼ kyolbʼil erman jaku tzʼok kykonektarin tukʼil tal kaj. Qatzun mintiʼ Internet jatumel ateʼ kʼloj okslal, ¿tzeʼntzun in che kubʼ qʼet akʼaj uʼj ex video toj JW Box? In xi tsamaʼn ninja qʼil twitz aqʼuntl qe memoria USB kyukʼil akʼaj xnaqʼtzbʼil in che kubʼ qʼet toj jw.org. Bʼalo 4 dólar kywiʼ memoria lu. Aj kypon memoria kyukʼil erman, in nok kykonektarin tiʼj JW Box tuʼntzun tkuʼtz kyiʼn erman qe akʼaj uʼj ex akʼaj video.

 ¿Tzeʼn o tzʼonin JW Box kyiʼj erman? In tzaj tqʼamaʼn Nathan Adruandra jlu, aju in nanqʼin toj República Democrática del Congo: «Nim maj ok tilil wuʼne tuʼn tkutz wiʼne video ‹Nman Jehová, tiʼja qʼuqli nkʼuʼje› ex ‹Kynaʼntze tiʼ bʼaj tiʼj t-xuʼjil Lot›, pero mintiʼ bʼant tuʼn tkutz. Tzaj nbʼise tuʼn jlu. Atzun jaʼlo, jaku kutz wiʼne qe video toj nyolbʼile. Ex in nonin jlu qiʼje tuʼn t-xi qqʼoʼne xnaqʼtzbʼil kye qkʼwale».

 In tzaj tqʼamaʼn jun erman te Nigeria jlu, aju in nonin tuʼn kybʼaj instalarit JW Box: «In nok kyqʼoʼn erman JW Box ik tzeʼn jun oyaj tuʼn Jehová kye. Nim in che tzalaj tuʼnju jaku kutz kyiʼn qe uʼj ex qe video ateʼ toj qe onbʼil tuʼn qqʼon xnaqʼtzbʼil».

 Ya o txi samet mas te 1,700 JW Box atz África, Oceanía ex Sudamérica, ex in kubʼ ximet tuʼn t-xi samet kyoj mas congregación. ¿Jatumel in tzaj pwaq tuʼn tbʼant aqʼuntl lu? Atz in tzaj kyiʼj oyaj in tzaj qʼoʼn tiʼj aqʼuntl in bʼant twitz tkyaqil Txʼotxʼ. Nim qe oyaj lu in che tzaj samaʼn toj donate.pr418.com. Chjonte tuʼn onbʼil in tzaj kysamaʼne.