Toj enero te 2021, tzaj tqʼamaʼn Kʼloj Xjal Qʼil Twitz Aqʼuntl qa kʼeletz jun akʼaj libro tuʼn qqʼon xnaqʼtzbʼil aju tok tbʼi Tzalaja tiʼj tanqʼibʼila. a ¿Tiʼ kubʼ tnaʼna tej tok tbʼiʼna tqanil lu? In tzaj tqʼamaʼn Matthew jlu, jun ermano te Canadá: «¡Mintiʼ xi nnimane! Tej tok nbʼiʼne chikʼbʼabʼil ex qe video jatumel tzaj chikʼbʼaʼn tzeʼn bʼaj bʼinchaʼn libro lu ex tzeʼn otoq tzʼajbʼen kyuʼn erman, mas in jaw tzalaje. Wajtoqe tuʼn tok nkeʼyine ex tuʼn tajbʼen wuʼne».

 Junxitl tten tuʼn qqʼon xnaqʼtzbʼil tukʼil libro lu, pero ax ikx junxitl keʼyin kywitz junjuntl libro o che etz. Qa ya at jun teya tlibro, olo tzʼok tqʼoʼn twitza tiʼj. ¿Taja tuʼn tel tnikʼa tiʼj tiquʼn junxitl libro lu? Qqʼonk qwitz tiʼj tzeʼn kubʼ bʼinchaʼn libro Tzalaja tiʼj tanqʼibʼila.

 Aju tpimil uʼj. Tuʼn tetz imprimirit libro Tzalaja tiʼj tanqʼibʼila, iltoq tiʼj tuʼn tajbʼen jun uʼj mas pin. ¿Tiquʼn? Tuʼnju tkuʼx mas te 600 dibujo toj ex mas nim twitzju tkuʼx toj uʼj In tzaj t-xnaqʼtzaʼn. Ax ikx, at junjun plaj jatumel mintiʼ tkubʼ dibujo ex letra. Tuʼntzunju, qa ma tzʼajbʼen jun uʼj slikʼ, jaku qʼanchaʼlix dibujo toj juntl plaj maske noq chʼin. Tuʼn miʼn tbʼaj jlu, e bʼant junjun prueba kyuʼn erman in che onin tuʼn kyetz imprimirit uʼj atz Wallkill te Nueva York. Ajbʼen kyaje wiq uʼj kyuʼn aqeju ya in che ajbʼen toj imprenta. Tej tkubʼaj prueba, ok tkeʼyin Comité de Redacción te Cuerpo Gobernante alkye uʼj mas nya qʼanchaʼl qe dibujo toj toj juntl plaj. Jaw kyskʼoʼn uʼj mas pin maske junlo 16% mas nim twiʼ twitzju kukx in najbʼen kyuʼn. ¿Tiquʼn bʼant jlu? Bʼant tuʼntzun kytzalaj xjal aj kyxnaqʼtzan tiʼj libro ex tuʼn miʼn kyel tzpet kyuʼn dibujo toj juntl t-xaq.

 Aju t-xkʼomil. Junxitl t-xkʼomil libro Tzalaja tiʼj tanqʼibʼila kywitz junjuntl libro tuʼnju ok qʼoʼn jun material tiʼj aju tok tbʼi laminado moqa película protectora especial. Mas in qoptzʼaj kyxkʼomil junjuntl libro, atzunte libro lu mintiʼ ex mas qʼanchaʼl dibujo tok tiʼj. Ax ikx, in nonin material lu tiʼj libro tuʼn tten mas ambʼil. Noqtzun tuʼnj, mas te jweʼ maj twiʼ laminado lu twitzju in qoptzʼaj. Tuʼntzunju, xi kyjyoʼn junjun sucursal jun laminado mas nya nim twiʼ.

 Qa mas nim twiʼ material lu, ¿tiquʼntzun ajbʼen? In tzaj tqʼamaʼn jun ermano in nonin tuʼn kyetz imprimirit uʼj jlu: «Tuʼnju nim maj kʼajbʼel libro lu, tbʼanel qa ma ten nim ambʼil». In tzaj tqʼamaʼn Eduardo jlu, aju in naqʼunan toj Oficina te Imprenta te sucursal te Brasil: «In qo tzalaje tuʼnju in che ajbʼen tbʼanel material tuʼn ttnam Jehová tuʼn tbʼinchet libro lu ex tuʼn tten toj nim ambʼil. Ax ikx, tuʼnju toj tumel in najbʼen pwaq in tzaj qʼoʼn te onbʼil».

 Xi tzyet tuʼn tetz imprimirit libro Tzalaja tiʼj tanqʼibʼila toj marzo te 2021 akux at pandemia, tuʼntzunju e ok weʼ erman kywitz junjun nya bʼaʼn. Tuʼnju ya mintiʼ e okx erman toj Betel, mintiʼ e pon erman onil ex mintiʼ xi qʼoʼn txokbʼil kyiʼj junjun tuʼn kypon toj Betel. Kyoj junjun imprenta, nya nim kybʼet erman tuʼn kyaqʼunan. Atzun junjuntl, e kubʼ jupuʼn tuʼnju kawbʼil kubʼ tqʼoʼn gobierno tuʼn tpaj COVID-19.

 ¿Tzeʼn i ex erman kywitz nya bʼaʼn lu? Tej t-xi tzyet tuʼn kyetz imprimirit uʼj, xi kyqanin erman onbʼil kye junjuntl betelita in che aqʼunan kyoj junjuntl departamento. In nonin jun erman Joel tbʼi tuʼn kyetz imprimirit uʼj ex in tzaj tqʼamaʼn jlu: «Bʼant tkyaqil aqʼuntl quʼne tuʼnju e onin erman qiʼje ex tuʼnju kubʼ kyyekʼin qa kyajtoq tuʼn tel kynikʼ kyiʼj junjuntl aqʼuntl».

 Maske e ok weʼ erman kywitz junjun nya bʼaʼn, ya otoq che etz ky-imprimirin nim millón libro Tzalaja tiʼj tanqʼibʼila. Tuʼn kybʼant libro lu, ajbʼen nim material kyuʼn ik tzeʼn uʼj, tinta, pegamento, qe plancha de impresión ex laminado. Tej otoq tzikʼ jweʼ xjaw in che imprimirin, ya otoq bʼaj gastarit mas te 2.3 millón dólar twiʼ material. Tuʼn miʼn tbʼaj najset nim pwaq, oʼkx in che etz imprimirit libro kʼajbʼel kyuʼn congregación.

 ¿Tiʼ in kubʼ kynaʼn erman ex qe xjal in che xnaqʼtzan aj tok kyqʼoʼn kywitz tiʼj libro lu? Tqʼama jun ermano te Australia jlu aju Paul tbʼi: «Ngane tuʼn tajbʼen libro lu wuʼne tuʼn nqʼone xnaqʼtzbʼil. Kygan xjal libro lu, mas in qo yolin kyukʼil, tbʼanel xnaqʼtzbʼil tkuʼx toj, qe xjel, qe video, qe tilbʼilal, qe recuadro ex aju tuʼn tkubʼ tbʼinchaʼn xjal in xnaqʼtzan. Tbʼanel tzeʼn o bʼaj bʼinchaʼn, waje tuʼn tbʼant-xix nqʼone xnaqʼtzbʼil tukʼil».

 In tzaj tqʼamaʼn jun xjal te Estados Unidos jlu, aju in xnaqʼtzan tiʼj Tyol Dios: «Ngane libro lu. In che onin tilbʼilal wiʼje tuʼn tel nnikʼe kyiʼj xnaqʼtzbʼil nim kyoklen ex in che onin video wiʼje tuʼn tkubʼ nbʼinchaʼne aju in nel nnikʼe tiʼj». In xiʼ xjal lu kyoj kykyaqil chmabʼil ex in xnaqʼtzan kabʼe maj toj seman.

 Atx nim millón libro tuʼn kyetz imprimirit kyoj nimku yol. O tzaj tqʼoʼn Kʼloj Xjal Qʼil Twitz Aqʼuntl ambʼil tuʼn tetz imprimirit libro lu toj 710 yol, 340 mas twitz uʼj In tzaj t-xnaqʼtzaʼn.

 ¿Jatumel in tzaj pwaq tuʼn tbʼant tkyaqil aqʼuntl lu? Atz tiʼj pwaq in tzaj qʼoʼn te onbʼil twitz tkyaqil Txʼotxʼ. In tzaj qʼoʼn onbʼil lu toj donate.pr418.com. Chjonte kyeye tuʼn onbʼil in tzaj kyqʼoʼne. Iktzun tten jaku che etz imprimirit mas libro tuʼn tonin kyiʼj xjal kyaj tuʼn tel kynikʼ tiʼj Jehová ex kyaj tuʼn tten kychwinqlal te jumajx (Salmo 22:26).