«Kubʼwitlo qximen qa mlayx tzaj qkʼamoʼn xnaqʼtzbʼil en digital». ¿Axpe jlu kubʼ t-ximana? Atzun jlu etz tqʼamaʼn ermano Geoffrey Jackson toj tqaqin tqanil tuʼn Kʼloj Xjal Qʼil Twitz Aqʼuntl te 2020. Ax ikx tqʼamatl jlu: «Pero kubʼlo qxjelin jlu toj ambʼil te txʼuʼj yabʼil, ¿tiʼwtlo ma bʼant quʼn noqwit mintiʼ JW Library? Atxix ojtxe, o qo tzaj t-xnaqʼtzaʼn Jehová tuʼn qex kywitz nya bʼaʼn ik tzeʼn at jaʼlo».

 ¿Tzeʼn in nonin Jehová qiʼj tuʼn tbʼaj qbʼinchaʼn qten? ¿Tiʼ aqʼuntl bʼant tuʼntzun tbʼaj bʼinchaʼn aplicación JW Library? ¿Ex tiʼ il tiʼj tuʼn tbʼant tuʼntzun kukx kykubʼ qʼoʼn akʼaj tqanil toj ex tuʼn tok te mas tbʼanel?

 Toj mayo te 2013, xi tqʼoʼn Kʼloj Xjal Qʼil Twitz Aqʼuntl ambʼil kye erman in che aqʼunan tiʼj MEPS tzmax toj kytxuylal ninja qʼil twitz aqʼuntl tuʼn tkubʼ kybʼinchaʼn jun aplicación. Toj aplicación lu, kyajtoq tuʼn tkux kyqʼoʼn Traducción del Nuevo Mundo toj. Tqʼama ermano Paul Willies jlu, jun kyxol qe erman in che aqʼunan tiʼj MEPS: «Naʼmxtoq tkubʼ qbʼinchaʼne jun aplicación jaku kutz descargarit. Tuʼntzunju, ya mintiʼ xi qbʼinchaʼne junjun aqʼuntl tuʼntzun qaqʼunane tiʼj aplicación lu. Bʼaj qchmoʼne junjun erman tuʼn kyaqʼunan tiʼj ex junx o aqʼunane kyukʼil junjuntl departamento toj Betel. Nim o naʼne Dios ex ok qqʼoʼne qwitze tiʼj qa onin Jehová qiʼje. Tej tikʼ jweʼ xjaw, ya otoq kyaj bʼant aplicación ex etz qʼoʼn tqanil tiʼj toj chmabʼil in nok jun maj toj abʼqʼi».

 Noqtzun tuʼnj, iltoq tiʼj tuʼn t-xi jyet tumel tuʼn tkubʼ qʼet mas uʼj toj aplicación JW Library ex tuʼn kykubʼ qʼoʼn toj mas yol. Toj enero te 2015, ya otoq kubʼ qʼoʼn nim uʼj toj yol inglés ex tej tikʼ qaq xjaw, ya jakutoq kutz qʼiʼn toj mas yol.

 Kukx o tzʼok tilil kyuʼn erman tuʼn tok aplicación te mas tbʼanel. Jun techel, o che kubʼ qʼoʼn video toj ex o kubʼ qʼoʼn jun pestaña jatumel kykubʼ uʼj in che ajbʼen quʼn kyoj chmabʼil. Nya oʼkxju, ax ikx jaku che kanet referencia quʼn kyiʼj texto.

 Tkyaqil xjaw, mas te 15 millón xjal in najbʼen aplicación JW Library kyuʼn. Kyxol jlu, in najbʼen kyuʼn mas te 8 millón xjal tkyaqil qʼij. ¿Tiʼ in bʼaj bʼinchet tuʼntzun tajbʼen aplicación lu kyoj junxichaq celular, tableta ex computadora­? In tzaj tqʼamaʼn Paul Willies jlu: «Mintiʼ in bʼaj aqʼuntl tiʼj aplicación. Kukx in che kubʼ qʼoʼn juntl tumel tzeʼn jaku tzʼajbʼen aplicación lu tuʼntzun nya kwest tuʼn tajbʼen. Tuʼnju kukx in che bʼaj actualizarin qe sistema kyiʼj celular, ax ikx qeye kukx in bʼaj qbʼinchaʼne aplicación tuʼntzun taqʼunan toj tumel. Ex tuʼnju mas in che kubʼ qʼoʼn uʼj ex grabación toj JW Library, in bʼaj q-actualizarine software tiʼj aplicación». Toj ambʼil jaʼlo, o kubʼ qʼoʼn mas te 200,000 uʼj toj JW Library ex o kubʼ qʼoʼn mas te 600,000 audio ex video toj junxichaq yol.

 Tuʼn taqʼunan aplicación lu toj tumel, nya oʼkx in che ajbʼen computadora, tableta ex celular. Ax ikx in che tzaj laqʼet licencia tiʼj software. Ex aj ttzaj laqʼet jun licencia in xi chjet 1,500 dólar twiʼ toj jun abʼqʼi. Nya oʼkxju, ax ikx in xi kynajsaʼn erman in che aqʼunan tiʼj MEPS junlo 10,000 dólar tkyaqil abʼqʼi tuʼn kytzaj laqʼet akʼaj computadora, tableta ex qe celular. ¿Tiquʼn in tzaj kylaqʼoʼn? Tuʼntzun tok kyqʼoʼn kywitz tiʼj qa in naqʼunan JW Library toj tumel kyoj.

 Tuʼnju ya at aplicación JW Library, ya mintiʼ in xi najset nim pwaq tuʼn kyetz imprimirit uʼj ex tuʼn tok kyxkʼomil. Jun techel, qbʼinx tiʼ o bʼaj tukʼil folleto Qo xnaqʼtzan tiʼj Tyol Dios tkyaqil qʼij. Toj 2013, etz imprimirit 12 millón copia tiʼj. Atzun toj 2020, oʼkx etz imprimirit 5 millón ex ya otoq chʼiy juntl 700,000 kybʼet pakbʼal. ¿Tiquʼn nya nim copia etz imprimirit? Tuʼnju mas nim erman in jaw kyuʼjin taqikʼ Tyol Dios tkyaqil qʼij toj JW Library. a

 Jaku tzʼajbʼen aplicación JW Library quʼn toj junxichaq tten. Jun techel, in kubʼ t-ximen ermana Geneviève, aju in nanqʼin atz Canadá, qa o tzʼonin aplicación lu tiʼj tuʼn t-xnaqʼtzan toj tumel. In tzaj tqʼamaʼn jlu: «Noqwit il tiʼj tuʼn tetz wiʼne nim libro tuʼn nxnaqʼtzane, mlay bʼant jlu wuʼne tkyaqil prim. Atzunte aplicación JW Library, oʼkx in najbʼen tableta wuʼne ex atz tkuʼx tkyaqilju in najbʼen wuʼne toj. Tuʼnju kukx in chin xnaqʼtzane, o chʼiy qʼuqbʼil nkʼuʼje ex in kubʼ nnaʼne qa mas in chin ok laqʼeʼye ttxlaj Jehová».

 Nim o tzʼonin aplicación lu ex mas toj ambʼil te pandemia. Jun techel, in tzaj tqʼamaʼn Charlyn te Estados Unidos jlu: «Tuʼnju at COVID-19 twitz tkyaqil Txʼotxʼ, ya ma tzikʼ mas te jun abʼqʼi naʼmx tok nkeʼyine jun uʼj in netz imprimirit. Atzun toj JW Library, in kanet tkyaqil wuʼne tuʼn tchʼiy wamiwbʼile tukʼil Jehová. In xi nqʼoʼne chjonte te Jehová tiʼj tbʼanel oyaj lu».

 Chʼixme kykyaqil erman ax kyximbʼetz at ik tzeʼn te ermana Faye, aju in nanqʼin atz Filipinas. Tqʼama jlu: «Tbʼanel aplicación lu tuʼnju tkux nim xnaqʼtzbʼil toj ex in nonin qiʼj tuʼn qok laqʼeʼ mas ttxlaj Jehová. In najbʼen wuʼne te prim tuʼn wuʼjine jun rat, tuʼn tok nbʼiʼne jun tbʼanel tqanil akux in bʼant waqʼune ja, tuʼn tbʼaj nxnaqʼtzaʼne chmabʼil ex tuʼn wuʼjine tiʼj Tyol Dios. Aj wojlane jun rat, in najbʼen wuʼne tuʼn kyok nkeʼyine video. Qatzun in chin ayone toj jun fila, in najbʼen wuʼne tuʼn wuʼjine tiʼj Tyol Dios ex kyiʼj junjuntl uʼj. Mlayx chjet aplicación lu quʼn».

 Ax ikx, nim in nonin aplicación lu aj qpakbʼan. Jun techel, tbʼanel ela toj twitz jun ermana te Camerún alkye texto ajbʼen tuʼn juntl ermana toj pakbʼabʼil. Tejtzun tikʼ junjuntl seman, tajtoq ermana tuʼn tajbʼen ax texto lu tuʼn, pero otoq tzikʼ tnaʼl tuʼn. In tzaj tqʼamaʼn ermana jlu: «Tzaj nnaʼne jun txol yol tiʼj texto. Tuʼntzunju, jaw njaqoʼne aplicación JW Library ex xi njyoʼne txol yol lu toj Biblia. Qa ya mintiʼ naʼn qe texto wuʼne, in che kanet juntl maj wuʼne noq tuʼn tonbʼil JW Library».

 Noq tuʼnju in tzaj kyqʼoʼne pwaq te onbʼil toj donate.pr418.com, jaku bʼaj bʼinchet chʼintl aplicación JW Library ex jaku tzʼok te mas tbʼanel. Iktzun tten jaku tzʼonin kyiʼj erman twitz tkyaqil Txʼotxʼ. Chjontexix kyeye tuʼnju in tzaj kyqʼoʼne pwaq te oyaj tuʼn tkyaqil kykʼuʼje.

1. Toj octubre te 2013, etz qʼamaʼn qa otoq bʼant aplicación ex qa jaku kanet Traducción del Nuevo Mundo toj inglés toj.

2. Toj enero te 2015, e kubʼ qʼoʼn mas uʼj toj yol inglés toj ex tej tikʼ chʼintl ambʼil, ax ikx kubʼ qʼoʼn toj mas yol.

3. Toj noviembre te 2015, kubʼ qʼoʼn resaltador tiʼj texto toj.

4. Toj mayo te 2016, kubʼ qʼoʼn pestaña jatumel in tzaj qʼamaʼn «Reuniones».

5. Toj mayo te 2017, kubʼ qʼoʼn función tuʼn kykubʼ qtzʼibʼin nota.

6. Toj diciembre te 2017, kubʼ qʼoʼn Biblia de estudio toj inglés toj.

7. Toj marzo te 2019, bʼaj bʼinchaʼn chʼintl aplicación tuʼntzun tkuʼtz qdescargarin qe audio, tuʼn kyok qkeʼyin video en línea ex tuʼn kyok qkeʼyin referencia kyiʼj texto.

8. Toj enero te 2021, e kubʼ qʼoʼn junjuntl tumel tzeʼn tuʼn t-xi qʼet xnaqʼtzbʼil tiʼj Tyol Dios tukʼil uʼj Tzalaja tiʼj tanqʼibʼila.