Taj Jehová tuʼn tel kynikʼ kykyaqil xjal tiʼj ex tiʼj Tkawbʼil (1 Timoteo 2:3, 4). Tuʼntzunju, in nok tilil kyuʼn testigo de Jehová tuʼn kyetz Biblia ex junjuntl uʼj tuʼn kyxnaqʼtzan xjal tiʼj. Ax ikx, in che etz uʼj kye xjal chkin kywiʼ. Ex o tzʼetz nim video kyiʼj uʼj toj mas te 100 yol in che yolin men tiʼj. a ¿Alkye tten in che bʼant uʼj lu ex alkye tten in chex sipan? ¿Tzeʼn o che ok te mas tbʼanel kyoj mankbʼil abʼqʼi?

 Twitz tkyaqil Txʼotxʼ, ateʼ erman in che onin tuʼn kykubʼ traducirit uʼj toj kyyol men. Naʼmxtoq tkubʼ traducirit jun uʼj, teyele junjun equipo in bʼaj tbʼinchaʼn tten. Yajxitl, in kubʼ kyximen tzeʼn kxel kyqʼamaʼn toj kyyol men jatumel in che anqʼin. Te mankbʼil, in che kubʼ grabarin uʼj toj video. Toj ambʼil jaʼlo, at mas te 60 equipo in che onin tuʼn tkubʼ traducirit uʼj toj kyyol men. Atzun juntl 40 equipo, oʼkx in bʼant kyuʼn kyoj junjun ambʼil.

 Toj ambʼil ojtxe, xi tiʼn nim pwaq tuʼn kybʼant video toj kyyol men. Mas nimtoq kywiʼ cámara ex junjuntl tiʼchaq e ajbʼen twitzju toj ambʼil jaʼlo. Ax ikx, in che kubʼ grabarin video toj jun estudio te grabación. At maj, il tiʼj tuʼn tbʼaj bʼinchaʼn jun akʼaj lugar jatumel tuʼn kygrabarin erman moqa il tiʼj tuʼn tbʼaj bʼinchet chʼintl. Tuʼn tkyaqil, in xi tiʼn mas te 30,000 dólar tuʼn tbʼaj bʼinchaʼn jun lugar jatumel tuʼn kyaqʼunan erman. b

 Tuʼn tajbʼen pwaq toj tumel tuʼn ttnam Jehová, o txi tjyoʼn junjuntl tumel nya kwest tuʼntzun tbʼaj kytraducirin erman qe uʼj. Tuʼntzunju, mas akʼaj qe tiʼchaq in che ajbʼen kyuʼn, mas nya nim kywiʼ ex mas nya kwest tuʼn kyajbʼen. Jun techel, nya il tiʼj tuʼn tten jun lugar jatumel tuʼn kygrabarin erman. Teyele junjun equipo te traducción jaku kubʼ kygrabarin video toj ky-oficina aj tajbʼen jun fondo chaʼx kyuʼn moqa jun croma. Aj kyetz yekʼin nim erman toj jun video, teyele junjun jaku kubʼ tgrabarin toklen toj t-oficina moqa tzmax tja.

 Ax ikx o che kubʼ qbʼinchaʼne programa tuʼntzun qonine kyiʼj equipo te traducción. Tuʼn jlu, ya mintiʼ in xi tiʼn nim ambʼil tuʼn kyetz uʼj toj kyyol men. In tzaj kyqʼoʼn erman chjonte tuʼnju o bʼant aqʼuntl lu. In tzaj tqʼamaʼn jun ermano jlu, aju Alexánder tbʼi: «Nim in chin tzalaje tuʼnju mas in che etz video jaʼlo twitzju ojtxe. Tkyaqil qʼij in nok nkeʼyine jun video».

 Toj ambʼil jaʼlo, tuʼn tkyaj bʼant jun lugar jatumel tuʼn kyaqʼunan equipo te traducción, in xilo tiʼn chʼixmi 5,000 dólar. Tuʼn jlu, jaku che bʼant mas video toj kyyol men te junxichaq lugar.

 Aj tkubʼ grabarin jun uʼj, il tiʼj tuʼn t-xi sipet kye erman in najbʼen kyuʼn. Tnejel, in che kubʼtoq grabarin video ex in chextoq samaʼn te jun compañia tuʼn tbʼaj tbʼinchaʼn qe caset ex disco, yajxitl in chex samaʼn kyoj congregación. Pero tuʼn tbʼant jlu, xi tiʼn ambʼil ex xi najset nim pwaq. Toj 2013, xi najsaʼn mas te kabʼe millón dólar tuʼn kybʼant disco toj kyyol men.

 In che tzalajtoq men aj tok kykeʼyin video, pero kwest ela toj kywitz tuʼnju otoq chmet nim video. At maj, il tiʼj tuʼn kyajbʼen nim disco tuʼn tkubʼ grabarit jun libro tiʼj Tyol Dios. Tqʼama Gilnei jlu, jun ermano te Brasil: «Tuʼn tjaw quʼjine jun texto, iltoq tiʼj tuʼn t-xi qjyoʼne caset ex yajxitl aju versículo. Kwesttoq tuʼn tbʼant jlu quʼne». In najbʼentoq disco tuʼn jun ermana Rafayane tbʼi ex tqʼama jlu: «Kwesttoq tuʼn nxnaqʼtzane njunalxe. In xitoq tiʼn nim ambʼil tuʼn t-xi njyoʼne qe texto ex qe referencia». Ex tej kypakbʼan erman, iltoq tiʼj tuʼn t-xi kyiʼn qe caset ex disco tuʼntzun tok kyqʼoʼn toj kytelevisión xjal kyajtoq tuʼn tok kybʼiʼn tqanil. Ateʼ junjun xi kyiʼn jun reproductor toj pakbʼabʼil. Yajxitl, e kubʼ bʼinchaʼn qe reproductor te disco portátil ex mastoq nya kwest tuʼn kyajbʼen. In tzaj tqʼamaʼn Bobby jlu, aju in nanqʼin atz Estados Unidos: «Qa wajtoqe tuʼn t-xi nyekʼine juntl texto, iltoq tiʼj tuʼn tkubʼ nchʼexpuʼne disco. Tuʼnju in xitoq tiʼn ambʼil, kwesttoq tuʼn tajbʼen Biblia quʼne aj qyoline kyukʼil xjal».

 Toj 2013, etz aplicación JW Library Sign Language® tuʼn ttnam Jehová. Toj aplicación lu, jaku kutz kydescargarin erman video moqa jaku tzʼok kyqʼoʼn toj kycelular moqa tablet. Tnejel oʼkx etz aplicación toj kyyol men te Estados Unidos, pero toj 2017, tzaj qʼoʼn ambʼil tuʼn tetz toj mas kyyol men te juntl lugar. Kubʼ kynaʼn erman nim tzalajbʼil. In tzaj tqʼamaʼn Juscelino jlu, jun ermano te Brasil: «Kwest tuʼn t-xi nimane. Kukx in ximane tiʼj qa kʼujlaʼn qe xjal chkin kywiʼ tuʼn Kʼloj Xjal Qʼil Twitz Aqʼuntl ex taj tuʼn tchʼiy kyamiwbʼil tukʼil Jehová ik tzeʼn kye txqantl. Kubʼ nnaʼne nim tzalajbʼil tej tetz aplicación ex wajtoqe tuʼn nxnaqʼtzane mas tiʼj Tyol Dios».

 Toj ambʼil jaʼlo, in che kubʼ qʼoʼn kykyaqil video in che etz toj kyyol men toj qtembʼil te internet jw.org ex toj aplicación JW Library Sign Language. Tuʼn jlu, ya mintiʼ in xi tiʼn nim ambʼil tuʼn kykubʼ traducirit ex tuʼn kykubʼ grabarit uʼj toj kyyol men. Ex toj nimku kyyol men, in che etz uʼj toj ax ambʼil ik tzeʼn kyoj txqantl yol.

 Qbʼinx aju in tzaj kyqʼamaʼn junjun erman chkin kywiʼ. In tzaj tqʼamaʼn jun ermana jlu, aju Klízia tbʼi: «Mintiʼ juntl organización in ximen kyiʼj xjal chkin kywiʼ ik tzeʼn te ttnam Jehová, tuʼnju in tzaj tqʼoʼn nim xnaqʼtzbʼil qe. Mlayx bʼant jlu tuʼn juntl organización». In tzaj tqʼamaʼn Vladimir jlu: «In tzaj kyyekʼin video weye qa kʼujlaʼn qe xjal chkin kywiʼ tuʼn Jehová ik tzeʼn qe txqantl».

 Chʼixme kyoj kykyaqil video toj kyyol men, in che etz yekʼin yol lu: «Mintiʼ in xi kʼayit uʼj lu aj t-xi qʼoʼn kye xjal tuʼnju at toklen tukʼil jun aqʼuntl in bʼant twitz tkyaqil Txʼotxʼ te xnaqʼtzbʼil tiʼj Tyol Dios ex in xi onit tukʼil oyaj». In xi qqʼoʼne chjonte kyeye tuʼn onbʼil in tzaj kyqʼoʼne, ex nim maj in tzaj qʼoʼn onbʼil lu toj donate.pr418.com. Tuʼn jlu, in che etz Biblia ex qe uʼj tuʼn kyxnaqʼtzan kykyaqil xjal, axpe ikx in netz uʼj toj kyyol men.