Tej t-xi tzyet xjaw te marzo te 2022, kubʼ qʼoʼn tqanil lu toj jw.org: «Qaje tuʼn t-xi qqʼamaʼne kyeye qa o kubʼ t-ximen Kʼloj Xjal Qʼil Twitz Aqʼuntl qa kxel tzyet tuʼn tok kychmon kyibʼ kykyaqil congregación toj 1 te abril. Jaku bʼant jlu kyuʼn qa in tzaj tqʼoʼn gobierno ambʼil». Kykyaqil testigo de Jehová kubʼ kynaʼn tzalajbʼil tej tok kybʼiʼn tqanil lu. Noqtzun tuʼnj, kukxtoq at COVID-19. a Tuʼn kyok xqʼuqit qeju in che pon kyoj chmabʼil, e bʼant junjun chʼixpubʼil ex e tzaj laqʼet junjun producto te limpieza. Pero, ¿tzeʼn bʼaj bʼinchaʼn kyten Ja te Chmabʼil tuʼnju otoq tzikʼ kabʼe abʼqʼi naʼmxtoq tok qchmon qibʼ?

 Tbʼanel tuʼnju ya otoq tzikʼ junjun xjaw in che aqʼunan erman tuʼntzun tbʼant kyten Ja te Chmabʼil.

 Tej tikʼ jun xjaw ttzajlen qʼamaʼn qa ya mlay tzʼok qchmon qibʼ toj 2020, ok tkeʼyin Departamento Mundial te Diseño ex Construcción te Warwick New York tiʼ jakutoq bʼaj kyiʼj Ja te Chmabʼil. Ax ikx, ximen tiʼj juntl tumel tzeʼn jakutoq tzʼok qchmon qibʼ tuʼntzun miʼn ttzaj COVID-19 qiʼj.

 Junxichaq tiʼchaq tuʼn tbʼant toj teyele junjun lugar. In tzaj tqʼamaʼn Matthew De Sanctis jlu, jun ermano in nonin tiʼj Departamento Mundial te Diseño ex Construcción: «Kyoj junjun lugar, kwest tuʼn tkanet tumel tzeʼn tuʼn tel kytxʼjoʼn erman kyqʼabʼ. Qa mintiʼ aʼ toj jun Ja te Chmabʼil, il tiʼj tuʼn ttzaj laqʼoʼn moqa in cheʼx erman qʼilte toj jun río moqa jun pozo. Atzun kyoj junjuntl lugar, tzaj tqʼoʼn gobierno junjuntl kawbʼil tiʼj aire acondicionado ex junjuntl tiʼchaq tuʼntzun miʼn ttzaj yabʼil kyiʼj».

 ¿Tiʼ bʼant kyuʼn erman tuʼn kyex kywitz nya bʼaʼn lu? In tzaj tqʼamaʼn Matthew qa «kanet jun tumel kyuʼn tuʼn t-xi kybʼinchaʼn tiʼj jlu ex mintiʼ xi kynajsaʼn nim pwaq». Jun techel, kanet jun tumel kyuʼn erman te Papua Nueva Guinea tzeʼn tuʼn tel kytxʼjoʼn kyqʼabʼ. Tzaj kylaqʼoʼn garrafón te plástico te 20 litro moqa 5.3 galón ex ok kyqʼoʼn jun chorro tiʼj. Tuʼn jlu, oʼkx bʼaj kygastarin erman 40 dólar tuʼn tkyaj bʼant jun Ja te Chmabʼil toj jun aldea. Ax ikx, e tzaj laqʼoʼn mas te 6 mil lavamanos portátil toj jun tienda te Asia tuʼntzun kyxi samaʼn kyoj Ja te Chmabʼil te África.

 Atzun kyoj junjuntl Ja te Chmabʼil, e okx qʼoʼn ventilador moqa e bʼaj bʼinchaʼn chʼintl tuʼntzun miʼn tten nim kyaq. Ex chʼixme kykyaqil congregación tzaj kylaqʼoʼn jun tqan micrófono tuʼntzun miʼn t-xi kytzyuʼn erman aj t-xi kyqʼoʼn jun kyyol. Ax ikx, kukx e bʼaj limpiarit lugar jatumel jaku kyaj ten virus ik tzeʼn qe pwert ex qe lugar jatumel in cheʼx erman txʼajol kyqʼabʼ. Ateʼ junjun congregación ok kyqʼoʼn sensor kyiʼj lavamanos tuʼntzun tetz aʼ toj tjunalx. Toj tnam Chile, bʼaj gastarit junlo 1,400 dólar tuʼn tkyaj bʼant jun Ja te Chmabʼil.

 Ok tilil kyuʼn erman tuʼn kykyaj bʼant Ja te Chmabʼil tuʼntzun miʼn tel kyiqen erman yabʼil, pero ax ikx ok tilil kyuʼn tuʼn miʼn tbʼaj kynajsaʼn pwaq. Jun techel, kyoj junjun tnam xi kykʼamoʼn erman onbʼil tzaj tqʼoʼn gobierno tuʼntzun t-xi chjet kywiʼ lavamanos ex qe tqan micrófono. Ax ikx, e aqʼunan sucursal junx tuʼn kytzaj laqʼet tiʼchaq por mayor ex tuʼn miʼn tbʼaj najset nim pwaq. Bʼant trat tuʼn sucursal ex Kʼloj xjal loqʼil twitz tkyaqil Txʼotxʼ kyukʼil tajaw kʼaẍjel. Iktzun tten nya nim kywiʼ tiʼchaq xi chjet ex mas jun rat pon jatumel ateʼ erman.

 O che bʼant junjun tiʼchaq kyoj Ja te Chmabʼil tuʼntzun miʼn ttzaj COVID-19 kyiʼj erman ex o tzʼonin jlu kyiʼj tuʼn tkubʼ kynaʼn bʼaʼn. Tzaj tqʼamaʼn jun ermana te Perú, aju Dulcine tbʼi, qa tzaj xobʼ chʼin tej tok tbʼiʼn qa qo xeʼl juntl maj kyoj Ja te Chmabʼil. Tqʼama jlu: «Tzaj COVID-19 wiʼje tej t-xi tzyet pandemia. Tuʼntzunju, in tzaj xobʼe tej nximane tiʼj qa jakutoq tzaj juntl maj wiʼje aj nxiʼye kyoj Ja te Chmabʼil. Pero tej npone, ok nqʼoʼn nwitze tiʼj qa otoq che bʼant junjun tiʼchaq kyuʼn ansyan tuʼntzun kyok xqʼuqit erman. Jakutoq bʼaj qdesinfectarin qqʼabʼ ex otoq tzaj kylaqʼoʼn qe tqan micrófono. Ax ikx, otoq bʼaj kyximen tuʼn tbʼaj limpiarit Ja te Chmabʼil naʼmxtoq txi tzyet chmabʼil ex aj tkubʼaj. Kyuʼn tiʼchaq e bʼant, kubʼ nnaʼne bʼaʼn». b

 Ok weʼ Sara, jun ermana te Zambia kywitz junjuntl nya bʼaʼn. Tqʼama jlu: «Ma tzikʼ junjun xjaw, kyim nchmile tuʼn COVID-19. Kukx in ximane tiʼjju jakutoq kubʼ nnaʼne aj npone kyoj chmabʼil njunalxe». ¿Tiʼtzun in kubʼ tnaʼn jaʼlo aj tpon kyoj chmabʼil? Tqʼamatl jlu: «In nel nnikʼe tiʼj qa at Jehová qukʼil kyoj mankbʼil tqʼijlalil tuʼnju o tzaj tqʼoʼn ambʼil qe tuʼn tok qchmon qibʼ juntl maj. Jaʼlo, mas in kubʼ nnaʼne qa in che onin ansyan ex qe erman wiʼje, qa in tzaj kyqʼuqbʼaʼn nkʼuʼje ex qa in kubʼ kyyekʼin kykʼujlabʼil wiʼje».

 In che tzalaj erman twitz tkyaqil Txʼotxʼ tuʼnju o tzaj qʼoʼn ambʼil qe tuʼn qmeltzʼaj kyoj Ja te Chmabʼil. Chjonte kyeye tuʼn pwaq in tzaj kyqʼoʼne te onbʼil ex aju onbʼil in tzaj kyqʼoʼne toj donate.pr418.com. Kyuʼn onbʼil lu, o che bʼaj bʼinchet junjun tiʼchaq kyoj Ja te Chmabʼil tuʼntzun tkubʼ kynaʼn erman bʼaʼn aj tok kychmon kyibʼ.