Qʼiʼn mas te 130 abʼqʼi in kubʼ kyikʼsaʼn qe tmajen Jehová qe asamblea te oxe qʼij tkyaqilju abʼqʼi. Aʼyeqe programa toj ambʼil jaʼlo qʼiʼn mas te 40 chikʼbʼabʼil, tqʼajqʼajel bʼitz, yekʼbʼil ex qe video tuʼn. Il tiʼj tuʼn tok kybʼin ex tuʼn tok kykeʼyin qe asistentes asamblea te oxe qʼij toj tumel tuʼntzun kytzalaj ex tuʼn tqʼuqbʼet kykʼuʼj . (Lucas 2:20) ¿Tzeʼn in nonin qe tdonaciona tuʼn kyok qe asamblea te oxe qʼij nok jaxku tumel?

 Nim qe estadio in che tzaj alquilarin tuʼn kyok qe asamblea ya at equipo te audio ex video kyoj. Qa ikju ¿Tiquʼntzun il tiʼj tuʼn tajbʼen qex qe equipo te audio ex video? In tzaj tqʼamaʼn David aju in naqʼunan toj Departamento te Broadcasting atz toj Central Mundial: «Il tiʼj tuʼn tzaj qnaʼn qa chʼixme kykyaqil programa in yolin kyiʼj chikʼbʼabʼil. Nya tkyaqil qe lugar in tzaj alquilarin o che bʼaj bʼinchan tuʼn tok kybʼin qe asistentes chikʼbʼabʼil mas te 6 or. Jun techel aʼyeqe equipo te audio oʼkx in che ajbʼen tuʼn kyetz qʼon junjun tqanil ex tuʼn tok kyqʼon qe bʼitz. Ex qe equipo te video oʼkx in ajbʼen tuʼn tok qʼon qe video chʼin tqan . Pero kyoj asamblea in che ok, ate qe video nim kyqan ex qajbʼile tuʼn telxix kynikʼ tiʼj chikʼbʼabʼil in netz qʼon atz twiʼ plataforma.»

 Tuʼnju junxichaq tten qe lugar tuʼntzunju o che bʼaj bʼinchet qe equipo te audio ex video tuʼn kyajbʼen kyoj. In xi tzyet aqʼuntl aj tkanet lugar jatumel tuʼn tbʼaj bʼinchet asamblea. Aqeju erman in che aqʼunan tiʼj Departamento te Broadcasting in nok kyqʼon kywitz tiʼj lugar ex jteʼ xjal jaku tzʼokx toj tuʼn kykubʼ qeʼ. Yajxitl in che kanet qe lugar kyuʼn erman jatumel tuʼn tok kyqʼon qe bocinas qe pantallas, ex tzeʼn tuʼn kyok conectaril. Te mankbʼil in kubʼ kybʼinchan jun lista jatumel in kubʼ kytzʼibʼen tkyaqilju at tajbʼen tuʼn tok kybʼin ex tuʼn tok kykeʼyin asamblea tojxix tumel.

 Pero mas kwest in nela chʼintl qa ma tzʼetz programa kyoj nimku yol. Tuʼntzunju in xi kysamaʼn qe audio ex video kye traductor ex aju in che bʼaj traducirit, toj ax ambʼil lu in che etz kyoj nimku radio. Tuʼn tok kyqoʼn erman kywitz tiʼj video toj ax ambʼil, in najbʼen jun reproductor kyuʼn aju tuʼn tetz audio ex video junx toj mas te 8 yol. In tzaj tqʼamaʼn David: «Aqeju kʼuxbʼil lu nya fácil qe, tuʼntzunju aqeju erman in che aqʼunan tiʼj jlu il tiʼj tuʼn t-xi qʼet capacitación kye»

 Chʼixme kykyaqil qe sucursal ya at jun kyequipo te audio ex video aju in najbʼen kyuʼn kyoj kykyaqil abʼqʼi. Aʼyeqe erman in che aqʼunan in nok tilil kyuʼn tuʼn tzaj kysamaʼn qe kʼuxbʼil kyoj junxichaq asamblea. Aju sucursal te Estados Unidos in bʼaj tgastarin $200 mil dólares a kyoj kykyaqil abʼqʼi aj in tzaj kysamaʼn qe kʼuxbʼil lu. Maske in najbʼen pwaq lu pero mas nya nim in xi kygastarit kywitz qe aj kytzaj laqʼet qe akʼaj kʼuxbʼil ex tuʼn kyok xqʼuqet. In tzaj tqʼamaʼn Steven, aju o tzʼaqʼunan toj equipo te audio ex video toj jun asamblea atz Canadá: «Aʼyeqe in che aqʼunan toj equipo in nok tilil kyuʼn tuʼn tok kykeʼyin qa kykyaqil piezas ateʼ ik tzeʼn tuerca tornillo ex cable...In bʼaj kyajlaʼn ex in kux kyqʼoʼn toj caj tuʼntzun xi kʼuʼt ex tuʼn kyajbʼen kyoj junjuntl asamblea»

 Nim pwaq jaku xi gastarit qa ma che tzaj alquilarin qe equipo te audio ex video ex at maj nya bʼaʼn in che ele tuʼnju mintiʼ in che ok xqʼuqin toj tumel. Tuʼntzunju in che tzaj laqʼet qe equipo te audio ex video tuʼn kyajbʼen quʼn. Toj ambʼil jaʼlo jun pantalla LED matijxix tuʼn kyajbʼen tuj ja te asamblea aju at 5 metro tqʼelil ex 3 metro twaʼlil moqa (16 pies tqʼelil  ex 10 pies twaʼlil) chʼixme $24 mil dólares twi, ex atzun jun cable te microfono te 15 metros moqa (50 pies) chʼixme $20 dólares twi. Tuʼntzunju in xi kyqanin onbʼil te Departamento jatumel che tzajel laqʼet junjun tiʼ ex tuʼn tbʼant jlu tnejel che ximel tiʼj nikʼpun pwaq knajel kyuʼn. (Lucas 14:28) Jun techel in che kubʼ kyxjelin jlu: ¿Jteʼ xjal kʼajbʼel aju equipo kyuʼn? ¿Ilpetzulo tiʼj tuʼn tzaj laqʼet jun equipo akʼaj? ¿Atpe jun tembʼil jatumel tuʼn t-xi kʼuʼt? ¿Ateʼqe ermanos at kyojtzqibʼil ex herramientas tuʼn kyok xqʼuqet qe equipo te audio ex video toj tumelxix?

 Tuʼn kyten equipo te audio ex video nim ambʼil il tiʼj tuʼn t-xi qʼet reparación kye ex tuʼntzun miʼn tbʼaj najset nimku pwaq kyiʼj aju in jatz kyoj donaciones . Ax ikx in che ajbʼen cajas kyuw quʼne tuʼn miʼn kykʼixbʼisanjtz aj kyxi qsamaʼne qe equipos te audio ex video at maj il tiʼj tuʼn t-xi qʼet reparaciones kye qe caja.

 Ate junjun xjal nya Testigos de Jehová qe in che jaw labʼin-tiʼj alkye tten in qʼajte audio ex video kyoj qe asambleas. Jun techel, jun xjal in naqʼunan toj jun compañia te audio ex video aju mas nim toklen tzaj tfelicitarin alkye tten binchamaj qe programa ex aju tqʼajqʼajel. In tzaj tqʼamaʼn Jonathan tiʼ o bʼaj kyoj qe asamblea aju in nonin tuʼn tkubʼ instalarit audio ex video ex najbʼen tuʼn:«Tej tok tbʼiʼn qa tkyaqil qeju in che aqʼunan toj departamento te audio ex video qa mintiʼ kyojtzqibʼil noq okx in che onin nimxix jaw labʼin. Tzaj tqʼamaʼn qa aju otoq bʼaj q-instalarine toj chʼixme kabʼe qʼij atzun qe in che aqʼunan toj tcompañia jakulo txi tiʼn chʼixmi jweʼ qʼij.» Toj juntl asamblea tzaj tqʼamaʼn jun encargado te instalaciones jlu: «Tzalu o che ikʼ nimku xjal at kyojtzqibʼil tzeʼn tuʼn bʼinchet qe video, ¡pero mintiʼtoq o tzʼok nkeʼyine xjal at nimxix kyojtzqibʼil tok kyaqʼun!»

 ¿Yajtzun teya? ¿In tzalajpe teya tiʼj asamblea tuʼnju at qe tbʼanel equipo te audio ex video in najbʼen toj? Bʼalo axjo in tkubʼ tnana ik tzeʼn te David in nanqʼin toj Inglaterra In tzaj tqʼamaʼn: «Qʼin 88 abʼqʼi wuʼne ex o chin tene toj tkyaqil asamblea Pero toj asamblea lu atzun tnejel maj mas nya kwest o tzʼel nnikʼe tiʼj tkyaqil tqanil. Tuʼnju at nim video tbʼanel clarxix qe xnaqʼtzbʼil ex in nel naj qnikʼ tiʼj. ¡Jurat naj inex ambʼil!» Yajtzun Michael te Nigeria in tzaj tqʼamaʼn:« Tuʼnju ya mintiʼ in tzaj bʼaj kykʼuʼj ermanos tiʼj tzeʼn kʼokel kykeʼyin qe video moqa tzeʼn kʼokel kybʼin qe chikʼbʼabʼil mas jaku tzʼok kybʼin aju programa»

 Aj t-xiʼya toj asamblea te jun qʼij ex te oxe qʼij toj abʼqʼi lu aju tok tbʼi «Kypakbʼanxe tbʼanel tqanil» jaku ximana tiʼj alkye tten o bʼaj bʼinchet noq tuʼn tok tbʼina ex tuʼn tel tnikʼe tiʼj programa in bʼant tkyaqil jlu noq tuʼnju bʼaʼn che qʼoʼne donaciones ax ikx toj donate.pr418.com. ¡Nimxix chjonte kyeye!.