Tgan Jehová tuʼn t-xi qʼet xnaqʼtzbʼil kye tmajen, tuʼntzunju, in xi qʼet nim xnaqʼtzbʼil toj ttnam tuʼntzun kybʼant aqʼuntl kyuʼn toj tumel. Ex jun kyxol qe xnaqʼtzbʼil in che ok, at aju Xnaqʼtzbʼil kye Pakbʼal tiʼj Tkawbʼil Dios. Kyoj abʼqʼi ma che ikʼ, nya oʼkx o ximen ttnam Dios tiʼj alkye xnaqʼtzbʼil tuʼn t-xi qʼet kye qeju in cheʼx toj xnaqʼtzbʼil, sino ax ikx in ximen tuʼn kyok lugar jatumel in che ok qe xnaqʼtzbʼil te mas tbʼanel. In nok tilil tuʼn ttnam Jehová tuʼn kyok ja te xnaqʼtzbʼil te mas tbʼanel tuʼntzun tonin kyiʼj qeju qʼol xnaqʼtzbʼil ex qeju kʼamol xnaqʼtzbʼil. ¿Tzeʼn in nonin pwaq te onbʼil tuʼn tbʼant jlu?

 Toj nim ambʼil o che ok xnaqʼtzbʼil kyoj Ja te Chmabʼil ex kyoj Ja te Asamblea. Qa ikju, ¿tiquʼn o che bʼaj bʼinchaʼn chʼintl junjun ja moqa o che jaw bʼinchaʼn mastl ja tuʼn kyajbʼen tuʼn kyok xnaqʼtzbʼil kyoj? At oxe tiquʼn.

 In che tzaj qanin mas onil. «In tzaj kyqʼamaʼn erman ateʼ kyoj nim sucursal qa kyaj mas onbʼil kye mas ermano ex ermana bʼinchaʼn kyten tuʼn kyonin tiʼj pakbʼabʼil», chi ermano Christopher Mavor, jun onil toj Kʼloj Ximel tiʼj Aqʼuntl at toklen tukʼil Pakbʼabʼil te K’loj Xjal Q’il Twitz Aq’untl. Ex tqʼamatl: «Jun techel, toj 2019 tzaj kyqʼamaʼn ermano ateʼ toj sucursal te Brasil qa kyajtoq tuʼn kyonin junlo 7 mil 600 erman o che etz toj Xnaqʼtzbʼil kye Pakbʼal tuʼntzun tbʼant junjun aqʼuntl in bʼant tjaqʼ tkawbʼil sucursal». Ax ikx, tzaj kyqʼamaʼn erman ateʼ toj sucursal te Estados Unidos qa kyaj tuʼn kyonin mas precursor aqeju xnaqʼtzaʼn maj qeʼ tuʼn t-xi qʼet xnaqʼtzbʼil kye mas erman tuʼn kypakbʼan jatumel ateʼ nim xjal, jatumel in che pon bark ex kyoj qe cárcel. Nya oʼkxju, sino ax ikx aqeju ateʼ toj Kʼloj xjal Ximel Tzeʼn che Jawil bʼinchet Ja ex qeju ateʼ toj Kʼloj Yolil kyukʼil aj Qʼanil, kyaj onbʼil. Tkyaqil aqʼuntl lu, jaku bʼant kyuʼn qeju o che ten toj Xnaqʼtzbʼil kye Pakbʼal tiʼj Tkawbʼil Dios.

 Mas nim solicitud. In che pon nim solicitud kyoj sucursal kye qeju kyaj tuʼn kyten toj xnaqʼtzbʼil, pero nya kykyaqil jaku txi qʼoʼn txokbʼil kyiʼj. Jun techel, toj jun abʼqʼi, 2 mil 500 erman okx kyqʼoʼn ky-solicitud toj sucursal te Brasil. Pero oʼkx jakutoq t-xi qʼet xnaqʼtzbʼil kye 950 tuʼnju nya nim lugar at tuʼn kyok xnaqʼtzbʼil.

 Nya nim lugar at. In che kyaj kʼamol xnaqʼtzal toj kyja erman nqayin in che anqʼin qa toj jun Ja te Chmabʼil moqa toj jun Ja te Asamblea in nok jun xnaqʼtzbʼil. Bʼaʼn te jlu, pero qa nya nim xnaqʼtzbʼil in nok toj jun abʼqʼi. Pero qatzun at nim xnaqʼtzbʼil in che ok toj jun abʼqʼi, at maj, mintiʼ in bʼant tuʼn kykyaj ten kʼamol xnaqʼtzbʼil kyja erman kyoj nim xjaw. Tuʼntzunju, bʼaj ximet tuʼn kyxi jyet ja nqayin ateʼ ttxlaj ja te xnaqʼtzbʼil ex tuʼn kybʼaj bʼinchet tuʼn tajbʼen kye qeju in che xnaqʼtzan.

 Nim millón pwaq te dólar jaku txi tiʼn jun ja jatumel in nok xnaqʼtzbʼil ex jatumel ateʼ kwart jatumel tuʼn kykyaj ten qe qʼol xnaqʼtzbʼil ex qe jun 30 kʼamol xnaqʼtzbʼil noq depende tiʼj lugar jatumel xbʼaj bʼinchaʼn.

 In chex jyet ja te xnaqʼtzbʼil ttxaʼn tnam, jatumel mintiʼxix in qʼajt jun tiʼ, pero jatumel nqayin in che bʼet qe camioneta. Ex mas in chex jyet lugar jatumel ateʼ nim pakbʼal tuʼntzun kyonin aj kyok xnaqʼtzbʼil ex tuʼn kyok kyxqʼuqet ja ex qeju tiʼchaq in che ajbʼen kyoj.

 Toj jun tbʼanel ja te xnaqʼtzbʼil; qʼiʼn jun kʼubʼil uʼj, jun lugar tuʼn kyxnaqʼtzan erman, jun lugar jatumel ateʼ computadora, jun impresora ex junjuntl tiʼchaq at tajbʼen. Ax ikx, chʼixmi tkyaqil maj qʼiʼn jun lugar tuʼn aju jatumel jaku che waʼn junx qe qʼol xnaqʼtzbʼil ex qeju kʼamol xnaqʼtzbʼil. Ex in bʼaj bʼinchaʼn jun lugar jatumel tuʼn kybʼinchan ejercicio ex tuʼn kytzalaj jun rat.

 Pero aju lugar jatumel in nok xnaqʼtzbʼil atzun mas nim toklen tuʼn tten toj tumel toj jun ja te xnaqʼtzbʼil. «In xi qqanine te Kʼloj xjal nukʼul Xnaqʼtzbʼil toj ttnam Jehová tuʼn tonin qiʼje tuʼn tbʼaj ximet tiʼ atx taj tuʼn t-xi bʼinchet tiʼj jun ja te xnaqʼtzbʼil», chi Troy aju in naqʼunan kyukʼil qeju ateʼ toj Kʼloj xjal Ximel Tzeʼn che Jawil bʼinchet Ja twitz tkyaqil Txʼotxʼ atz Warwick, Nueva York. Tqʼamatl ermano Troy jlu: «Tzaj kyqʼamaʼn erman qeye jniʼ toj, jniʼ twaʼlil ex tzeʼn bʼinchabʼin te ja te xnaqʼtzbʼil. Ax ikx, tzaj kyqʼamaʼn tzeʼn tuʼn toktz spikʼun ex audio ex video toj». Ex tej tyolin jun qʼol xnaqʼtzbʼil Zoltán tbʼi te tnam Hungría kyiʼj junjun tiʼchaq at kyajbʼen, tqʼama: «Tnejel, mintiʼ jun micrófono, tuʼntzunju, tkyaqil ambʼil xi qqʼamaʼne kye qeju in che kʼamoʼn xnaqʼtzbʼil tuʼn kyyolin tukʼil tqʼajqʼajel kywiʼ. Pero jaʼlo, ya mas tbʼanel tuʼnju ya at jun micrónfono tiʼj teyele junjun mes».

 ¿Tiʼ in kubʼ kynaʼn qeju qʼol xnaqʼtzbʼil ex qeju kʼamol xnaqʼtzbʼil tuʼnju o che bʼaj bʼinchaʼn lugar lu te mas tbʼanel? At jun ermana xiʼ toj Xnaqʼtzbʼil kye Pakbʼal tiʼj Tkawbʼil Dios atz Palm Coast Florida te Estados Unidos Angela tbʼi, tqʼama jlu: «Tbʼanel lugar lu tuʼnju mintiʼ jun tiʼ in qʼajt. Tkyaqil; ik tzeʼn lugar jatumel tuʼn qxnaqʼtzan ex qeju kwart, ma che bʼaj bʼinchaʼn tuʼntzun tok qqʼoʼn qwiʼ tiʼj xnaqʼtzbʼil». Ex tqʼama jun kyxol qʼol xnaqʼtzbʼil te Hungría aju Csaba tbʼi qa nim toklen toj twitz aju ambʼil aj kywaʼn kyukʼil qeju in che xnaqʼtzan. In tzaj tqʼamaʼn qa toj ambʼil lu «in tzaj kyqʼamaʼn qeju in che xnaqʼtzan aju tkuʼx toj kyanmi ex aju o bʼaj toj kyanqʼibʼil. Tuʼn jlu in che ok qojtzqiʼne qeju in che xnaqʼtzan ex jaku tzʼajbʼen xnaqʼtzbʼil quʼne tuʼn tonin toj kyanqʼibʼil».

 In kubʼ kyximen qeju qʼol xnaqʼtzbʼil ex qeju in che kʼamoʼn xnaqʼtzbʼil qa aju in bʼant tuʼn kyok ja te xnaqʼtzbʼil te mas tbʼanel, jun kʼiwlabʼil qeʼ tuʼn Jehová aju Tbʼanel aj Xnaqʼtzal kye (Isaías 30:20, 21). Jun techel, bʼaj bʼinchaʼn jun ja tuʼn tok te jun ja te xnaqʼtzbʼil atz Filipinas ex xiʼ jun ermana toj xnaqʼtzbʼil toj lugar lu, tzaj tqʼamaʼn jlu: «In tzaj tnaʼn lugar lu qa nya noq oʼkx in qo ok te kʼamol xnaqʼtzbʼil, sino ax ikx in tzaj tnaʼn qe qa a Jehová in tzaj txkon qe ex qa taj tuʼn qtzalaj akux in qo xnaqʼtzan tiʼj Tyol».

 Noq tuʼnju onbʼil te pwaq in tzaj kyqʼoʼne, jaku che jaw bʼinchet akʼaj ja moqa jaku tzʼok bʼinchaʼn junjun tiʼchaq kyiʼj junjuntl tuʼntzun kyok xnaqʼtzbʼil kyoj. Nim kyeye atz in tzaj kyqʼoʼne pwaq te onbʼil toj donate.pr418.com. ¡Chjontexix kyeye!