In che ximen testigo de Jehová kyiʼj kyerman (1 Pedro 2:17). Nim qe in kubʼ qnaʼn ik tzeʼn te Tannis, jun ermana te Kenia. Tqʼama jlu: «Ngane tuʼn tok nbʼiʼne tiʼ in bʼaj kyiʼj erman twitz tkyaqil Txʼotxʼ». ¿Tzeʼn in nok kybʼiʼn testigo de Jehová aju in bʼaj kyiʼj kyerman? In nok kybʼiʼn tkyaqil tuʼnju at sección «Prensa» toj jw.org atxix toj 2013.

 Toj sección lu, in che kubʼ qʼoʼn tqanil tiʼj aqʼuntl in bʼant tiʼj construcción, tiʼj onbʼil in xi qʼet aj ttzaj jun xitbʼil ex kyiʼj junjuntl tiʼchaq nim kyoklen ik tzeʼn aj tbʼaj traducirit Biblia toj juntl yol. Ax ikx, in kubʼ qʼoʼn tqanil kyiʼj erman in che okx qʼoʼn toj cárcel tuʼnju in che ajbʼen te Jehová. Ex in che kubʼ qʼoʼn qe tbʼanel experiencia in nikʼ kyiʼj erman aj in che ok campaña tiʼj pakbʼabʼil ex tiʼj ambʼil te Nabʼitz Tkyimlen Jesucristo. Pero ¿alkyeqe in che aqʼunan tuʼn kybʼant noticia lu? ¿Alkyeqe in che jyon tqanil tiʼj ex tzeʼn in che bʼaj bʼinchaʼn?

 In che aqʼunan erman in che bʼinchan kyiʼj tqanil tiʼj sección «Prensa», aju at toj kytxuylal ninja qʼil twitz aqʼuntl. In nok tkeʼyin Kʼloj xjal Nukʼul aqʼuntl te Kʼloj Xjal Qʼil Twitz Aqʼuntl aju in bʼant kyuʼn erman lu. Tuʼn tbʼant tkyaqil aqʼuntl kyuʼn, in che onin mas te 100 ermano ex ermana kyiʼj ex ateʼ nim kye tzmax kyja in che onin. In che onin erman lu tuʼn kyjyon tqanil, tuʼn tbʼaj tzʼibʼit, tuʼn tbʼaj traducirit moqa in che onin tuʼn kybʼant junjuntl tiʼchaq. Ax ikx in che yolin kyukʼil aj kawil, kyukʼil qeju in che qʼon tqanil ex qe profesor te universidad. Ax ikx, at juntl 80 kʼloj erman in che onin tuʼn kybʼaj bʼinchet tqanil ex atz ateʼ kyoj sucursal twitz tkyaqil Txʼotxʼ.

 Tuʼn tbʼant jun noticia, junx in che aqʼunan erman in che bʼinchan kyiʼj tqanil kyukʼil kʼloj erman in che onin kyiʼj kyoj sucursal. Aj tok kybʼiʼn erman jun txʼolbʼabʼil ex jaku tzʼok te jun noticia, in xi kyjoʼn tqanil tiʼj ex in bʼaj kychmoʼn tkyaqil tqanil tzʼaqli. Tuʼn tbʼant jlu kyuʼn, il-lo tiʼj tuʼn t-xi kyqanin junjun xjel moqa in che yolin kyukʼil qeju at kyojtzqibʼil tiʼjju in nok kybʼiʼn. Aj tkanet tqanil kyuʼn, in kubʼ kytzʼibʼin ex in bʼaj kybʼinchaʼn chʼintl xnaqʼtzbʼil. Tibʼajxi jlu, in nok kyqʼoʼn foto tiʼj xnaqʼtzbʼil ex in xi kysamaʼn te Kʼloj xjal Nukʼul aqʼuntl tuʼntzun ttzaj kyqʼamaʼn qa bʼaʼn taʼ tkyaqil.

 ¿Tiʼ in tzaj kyqʼamaʼn erman tiʼj sección «Prensa»? In tzaj tqʼamaʼn jun ermana te Filipinas jlu, aju Cheryl tbʼi: «Ngane aj t-xi tzyet qʼij tuʼn wuʼjine kyiʼj tqanil tiʼj ttnam Jehová ex kyiʼj erman».

 Ateʼ junjun mas tbʼanel in nela toj kywitz qeju tqanil in che kubʼ qʼoʼn toj jw.org kywitz qeju tqanil in che kubʼ qʼoʼn kyuʼn junjuntl xjal. In tzaj tqʼamaʼn Tatiana jlu, jun ermana te Kazajistán: «In nok nqʼoʼne kyoklen noticia tkubʼ toj jw.org tuʼnju jaku tzʼok qeʼ qkʼuʼj tiʼj. Ax tok qe tqanil in che kubʼ qʼoʼn toj». Atzunte Alma in tzaj tqʼamaʼn jlu, jun ermana in nanqʼin atz México: «Kyoj junjuntl qʼol tqanil, in che kubʼ qʼoʼn nya bʼaʼn noticia. Atzun qe noticia in che kubʼ qʼoʼn toj jw.org, in tzaj kyqʼuqbʼaʼn qkʼuʼj».

 Nya oʼkx in kubʼ qʼoʼn tqanil tzʼaqli toj sección «Prensa», sino ax ikx in nonin qiʼj tuʼn tchʼiy qʼuqbʼil qkʼuʼj. In tzaj tqʼamaʼn Bernard jlu, aju in nanqʼin atz Kenia: «Noq kyuʼn noticia lu, in che ok nqʼoʼne qe erman ik tzeʼn qe toj njaye ex noq jaxku tumel in che anqʼin. Aj nnaʼne Dios, jaku txi nqʼamaʼne kybʼi te Jehová ex jaku txi nqʼamaʼne te tiʼxix in bʼaj kyiʼj». Ax ikx in tzaj tqʼamaʼn Bybron jlu, jun ermana in nanqʼin atz Kenia: «Aj tbʼaj traducirit Tyol Dios toj jun akʼaj yol ex in kubʼ qʼoʼn tqanil tiʼj, in kubʼ nnaʼne nim tzalajbʼil. In tzaj tnaʼn jlu weye qa qkyaqilx kʼujlaʼn qoʼ tuʼn Jehová».

 Ax ikx jaku tzʼonin qiʼj aj in che kubʼ qʼoʼn tqanil kyiʼj erman in che el ikʼun. Qbʼinx aju tqʼama Jackline, juntl erman in nanqʼin atz Kenia: «Aj nximane tiʼj kyipumal erman lu, in nonin wiʼje tuʼn tchʼiy qʼuqbʼil nkʼuʼje. In chin ximane tiʼj tiʼ in nonin kyiʼj tuʼn tikʼx kyuʼn. O tzʼel nnikʼe tiʼj qa nim in nonin kyiʼj aj kynaʼn Dios, aj kyuʼjin tiʼj Biblia ex aj kybʼitzin».

 Atzunte ermana Beatriz in nanqʼin atz Costa Rica ex in tzaj tqʼoʼn chjonte tuʼnju in che kubʼ qʼoʼn tqanil kyiʼj xitbʼil in che tzaj. Tqʼama jlu: «In qo jaw labʼin tuʼnju jun rat in nonin ttnam Jehová kyiʼj erman in tzaj nya bʼaʼn kyiʼj. In xi kyqʼoʼn tbʼanel onbʼil tukʼil kʼujlabʼil. Tuʼn jlu in nok qeʼ nkʼuʼje tiʼj qa atzun ttnam Jehová lu».

 In xi qqʼoʼn nim chjonte tuʼnju at sección «Prensa» toj jw.org. Noq kyuʼn noticia lu, in nok qbʼiʼn tiʼ in bʼaj kyiʼj erman twitz tkyaqil Txʼotxʼ. Pero mlay ten sección lu noqwit mintiʼ in tzaj kyqʼoʼne pwaq te oyaj ex nim maj in tzaj kysamaʼne oyaj lu toj donate.pr418.com. Chjontexix kyeye tuʼnju in tzaj kyqʼoʼne oyaj.