Toj marzo te 2020 tzaj tqʼamaʼn Organización Mundial de la Salud qa at COVID-19. Mintiʼ kubʼ kyximen nim xjal qa kukx tuʼn tten virus mas te jun abʼqʼi. Ateʼ nim millón xjal o tzaj yabʼil kyiʼj, o tzaj kybʼis ex mintiʼ kypwaq tuʼn tpaj pandemia, kyxol qe jlu ax ikx ateʼ testigo de Jehová. ¿Tiʼ o bʼant kyuʼn testigo de Jehová tuʼn kyonin kyiʼj kyerman toj ambʼil kwest?

 Tuʼn tonbʼil Kʼloj xjal Nukʼul aqʼuntl te Kʼloj Xjal Qʼil Twitz Aqʼuntl kye testigo de Jehová, o bʼaj nukʼuʼn mas te 950 Kʼloj ansyan in che onit aj ttzaj xitbʼil twitz tkyaqil Txʼotxʼ toj ambʼil te pandemia. At maj aʼyex erman in che onit kyiʼj txqantl erman aj ttzaj jun xitbʼil jatumel in che anqʼin, atzun kyoj junjuntl lugar, in xi kykʼamoʼn testigo de Jehová onbʼil in xi tqʼoʼn gobierno kye xjal. Ax ikx, o bʼaj tnukʼuʼn kʼloj ansyan in che onit aj ttzaj xitbʼil aqʼuntl twitz tkyaqil Txʼotxʼ.

 Jun techel, qo ximen tiʼjju o bʼaj atz Paraguay. In tzaj tqʼamaʼn jun periódico qa nim xjal mintiʼ in kanet twi kywa tuʼn tpaj pandemia. Pero otoq txi sipet kywa erman te kabʼe seman tuʼn kʼloj ansyan in che onit aj ttzaj nya bʼaʼn. Bʼalo 30 dólar twiʼ jun paquete wabʼj in xi samaʼn te jun familia te kyaje xjal. Toj paquete lu, tkuʼx wabʼj, qe tiʼchaq in najbʼen tuʼn tbʼant limpieza ex junjuntl tiʼchaq in najbʼen kyuʼn erman.

 ¿Tiʼ in bʼant kyuʼn qeju in cheʼx onil tuʼn miʼn ttzaj COVID-19 kyiʼj ex tuʼn tok kyxqʼuqin qe txqantl xjal? In najbʼen mascarilla kyuʼn ex mintiʼ in che ok laqʼeʼ kytxlaj txqantl. Ax ikx, in nok tilil kyuʼn tuʼn tok kykeʼyin qa saq taʼ lugar ex qa in xi kybʼiʼn xjal in che pon qʼol producto qe kawbʼil in tzaj qʼamaʼn kye. Ex in nok kykeʼyin qa in nok kyxqʼuqin kyibʼ qeju in chex qʼinte qe paquete, qa in bʼaj kylimpiarin ex qa in bʼaj kydesinfectarin kykar, ex in kubʼ kyqʼoʼn qe paquete tibʼaj jun mes otoq bʼaj desinfectarin. Ajtzun kyxiʼ erman sipil qe paquete, mintiʼ in che pon laqʼeʼ kytxlaj erman aj in che pon qʼol producto.

 Toj enero te 2021, otoq tzaj tqʼoʼn Kʼloj xjal Nukʼul aqʼuntl ambʼil tuʼn tajbʼen mas te 25 millón dólar tuʼn kyxi onit erman otoq tzaj nya bʼaʼn kyiʼj tuʼn pandemia. In nok tilil kyuʼn sucursal ex qe Comité te Socorro tuʼn tajbʼen pwaq toj tumel kyuʼn ex tuʼn kykanet producto mas barat. Jun techel, toj tnam Chile, kyajtoq erman at kyoklen tuʼn kyonin aj ttzaj jun xitbʼil tuʼn ttzaj kylaqʼoʼn 1,653 libra lenteja. Pero tej tikʼ jun xjaw, nim otoq jax twiʼ lenteja. Maske ikju, kubʼ kyximen erman tuʼn ttzaj kylaqʼoʼn. Tejtzun tikʼ kabʼe or, tzaj tqʼamaʼn xjal kʼayil lenteja qa pon jun xjal meltzʼulte lenteja otoq txi tlaqʼoʼn. Tuʼntzunju, tqʼama kʼayil lenteja kye qa jaku txi kylaqʼoʼn lenteja otoq pon meltzʼuʼn ex nyatoq il tiʼj tuʼn t-xi kychjoʼn nim twiʼ.

 Tejtzun kypon erman qʼilte qe lenteja, ya nya tajtoq xjal tuʼn ttzaj tkʼayin kye ik tzeʼn otoq kyaj bʼant tiʼj kyuʼn. Xi tqʼamaʼn kʼayil kye erman qa nya toj tumel in xi kysipen qe lenteja ik tzeʼn in bʼant kyuʼn txqantl xjal. Toj ambʼil aju, ok ten jun ermano naʼl Dios toj tanmi ex tibʼajxi jlu xi tqʼamaʼn te kʼayil qa otoq txi kyqanin kye kykyaqil congregación alkyeqe erman kyaj onbʼil tuʼn t-xi qʼet chʼin kywa. Ax ikx, xi kyqʼamaʼn erman qa aj kybʼaj bʼinchet qe paquete, in che ximen tiʼj alkyeqe tiʼchaq in najbʼen kyuʼn erman kyaj onbʼil. Tuʼntzunju, junxichaq tiʼ in kux qʼoʼn toj junjun paquete kye ja xjal ex in chex samaʼn qe tiʼchaq mas in che ajbʼen kyuʼn. Te mankbʼil, xi kyqʼamaʼn erman qa oyaj tkyaqil pwaq in najbʼen kyuʼn testigo de Jehová ex qa mintiʼ in xi chjet twi kykʼuʼj qeju in che pon onil. Jaw labʼin xjal tiʼj tkyaqil jlu. Tuʼntzunju, mas barat tzaj tkʼayin xjal lenteja ex tej ttzaj laqʼet juntl maj, ax ikx tzaj tqʼoʼn xjal juntl 882 libra lenteja te oyaj.

 In nanqʼin jun ermana Lusu tbʼi kyukʼil jweʼ tfamilia toj tnam Liberia. Ya o tijen ermana lu ex o kyim tchmil. At jun tal tchman ermana Lusu te wuq abʼqʼi. Akux in che wan te prim ex in che xnaqʼtzaʼn tiʼj taqikʼ Tyol Dios te qʼij aju, el tnikʼ tal tchman ermana tiʼj qa ya mintiʼtoq kywa. Xitzun tqanin tal tchman ermana te: «¿Tiʼtzun kxel qwaʼn jaʼlo?». Xitzun tqʼamaʼn ermana Lusu te tchman qa otoq naʼn Dios ex qa qʼuqlitoq tkʼuʼj tiʼj qa ktzajel tqʼoʼn Jehová aju at tajbʼen kye. Te qale te qʼij aju, e pon llamarin ansyan tiʼj ermana Lusu ex xi kyqʼamaʼn te qa jaku pon qʼil chʼin kywa. Tqʼama ermana Lusu jlu: «Tqʼama tal nchmane qa qʼuqli tkʼuʼj tiʼj qa in tzaj ttzaqʼweʼn Jehová qnaʼj Dios tuʼnju tzaj ttzaqʼweʼn nnaʼj Diose».

 In nanqʼin jun xuʼj nqayin tiʼj jun ja xjal testigo de Jehová atz República Democrática del Congo. Tej tok tkeʼyin xuʼj qa in che pon juntl testigo de Jehová qʼol kywa qe tvecin, tqʼama jlu: «Aj tbʼaj pandemia, qo okele te testigo de Jehová tuʼnju in che onin kyiʼj kyerman toj ambʼil kwest». Xi tqanin tchmil xuʼj jlu te: «¿Maj kʼokela te testigo de Jehová noq tuʼn jun tal bols arroz?». Xi ttzaqʼweʼn jlu te tchmil: «Miʼn, nya tuʼn jlu. Pero tuʼn bols arroz in tzaj kysamaʼn, in kubʼ kyyekʼin qa ax tok at kʼujlabʼil kyxol».

 Noq tuʼn onbʼil in tzaj kyqʼoʼne, jun rat o che onin testigo de Jehová kyiʼj kyerman akux at pandemia. Chjonte kyeye tuʼnju in tzaj kysamaʼne oyaj toj junxichaq tten toj donate.pr418.com.