¿Naʼnx Gail tuʼna aju ma qo yolin tiʼj toj tkabʼ xnaqʼtzbʼil tojx uʼj lu? Mintiʼ bʼiʼn tuʼn qa kikʼex bʼis tuʼn tiʼj tchmil aju Rob tbʼi. Tuʼntzunju, tajbʼil tuʼn tpon ambʼil tuʼn tok tqʼoʼn twitz tiʼj toj tbʼanel najbʼil aju in tzaj ttziyen Dios. Tqʼama jlu: «Aju taqikʼ Tyol Dios mas ngane, aju Apocalipsis 21:3, 4». Aʼyeju versículo lu in tzaj tqʼamaʼn jlu: «Ex axte Dios ktel kyukʼil te Kydios. Ex kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj; porque aqeju at tnejel ma che naj».

Tqʼamatl Gail jlu: «Aju o tzaj ttziyen Dios chikʼlixix taʼ. In tzaj qʼaqʼin nkʼuʼje kyiʼj xjal o kyim jun toj kyja ex mintiʼ ojtzqiʼn kyuʼn aju qʼuqbʼil qkʼuʼj qa ok che jawil anqʼin kyimni». Tuʼn tkubʼ tyekʼun Gail aju qʼuqli tkʼuʼj tiʼj, in nel tpaʼn ambʼil tuʼn tyolin kyukʼil xjal in che anqʼin ttxlaj tja tiʼjju yol o tzaj tziyen qa toj ambʼil tzul ya «mintiʼtl kamik».

Jakulo kubʼ t-ximana qa noq jun witzikʼ jlu. Tuʼntzunju, ximana tiʼj techel tiʼj Job, aju tzaj nimxix tyabʼ (Job 2:7). Maske kubʼ t-ximen qa tajtoq tuʼn tkyim, noqtzun tuʼnj, qʼuqlitoq tkʼuʼj qa jaku jaw anqʼin juntl maj tuʼn Dios tuʼntzun tanqʼin tzalu twitz Txʼotxʼ. Tuʼntzunju, tqʼama jlu: «Noqwit jaku chinx tewana tuj kynajbʼil kyimni, [...] jakulo chin txkete tuʼna ex jakulo txi ntzaqʼweʼne, ex jakulo chin tzaj t-xtalina, porque taqʼunbʼenx tqʼabʼa qine» (Job 14:13, 15). Ik tzeʼn in nel qnikʼ tiʼj, qʼuqlixixtoq tkʼuʼj Job qa tajbʼiltoq Dios tuʼn t-xi tqʼoʼn juntl maj tchwinqlal.

A jlu kbʼantel tuʼn Dios toj chʼintl ambʼil, kjawil anqʼin Job tuʼn ex nimxix xjal aj tok twitz Txʼotxʼ te jun tbʼanel najbʼil (Lucas 23:42, 43). In tzaj ttziyen Tyol Dios qa «ok che jawil anqʼin qe kyimni» (Hechos 24:15). Ax ikx tqʼama Jesús jlu: «Miʼn che labʼine tiʼj jlu; porque tzul tqʼijlalil kykyaqil xjal maquʼn tuj kamposant ok kybʼi tqʼajqʼajel nwiʼye, ex che jawitz anqʼin tuj muqbʼil» (Juan 5:28, 29). Ok kʼokel tqʼoʼn Job twitz kyiʼj qeju yol lu. Iktzun tten ok «kʼokel juntl maj ik tzaʼn tej kuʼxunxtoq» (Job 33:24, 25). Axju kbʼajel kyiʼj xjal aʼyeju in kubʼ kyyekʼun qʼuqbʼil kykʼuʼj tiʼjju o tzaj ttziyen Dios tuʼn kyjaw anqʼin qe xjal tuʼn, tuʼntzun kyanqʼin tzalu twitz Txʼotxʼ.

Qa o kyim jun xjal kʼujlaʼn tuʼna, aju xnaqʼtzbʼil ma qo xnaqʼtzan tiʼj, mlay tzʼel qʼiʼn tbʼisa tuʼn. Noqtzun tuʼnj, qa ma ximana tiʼjju in tzaj ttziyen Dios toj Xjan Uʼj, jaku tzaj tqʼuqbʼaʼn tkʼuʼja ex jaku tzaj onina tuʼn, tuʼn texa twitz bʼis (1 Tesalonicenses 4:13).

¿Taja tuʼn tel mas tnikʼa tiʼ jaku tzʼonin tiʼja tuʼn texa twitz bʼis? ¿O kubʼxi t-ximana tiquʼn in tzaj tqʼoʼn Dios ambʼil te nya bʼaʼn ex yajbʼil? Qa ikju, bʼaʼn tuʼn tokxa toj qtembʼile te Internet www.pr418.com/mam. Ex atz kkanetel tzaqʼwebʼil kyiʼj t-xjela ex junjun tbʼanel nabʼil in jatz toj Tyol Dios.