TBʼI XNAQʼTZBʼIL TOK TIʼJ T-XKʼOMIL: AJ TKYIM JUN XJAL KʼUJLAʼNXIX QUʼN
Tzeʼn jaku txi qqʼuqbʼaʼn kykʼuʼj qeju in che bʼisun
¿O kubʼxi tnaʼn teya qa kwest tuʼn t-xi tonina jun xjal in bʼisun? Atlo maj mintiʼ in nel qnikʼ tiʼ jaku bʼant quʼn moqa tiʼ yol jaku txi qqʼamaʼn ex tuʼn jlu mintiʼx jun tiʼ in bʼant quʼn. Noqtzun tuʼnj, at junjun tiʼchaq jaku bʼant quʼn tuʼn qonin.
At maj, jaku txi qqʼuqbʼan tkʼuʼj xjal qa ma qo ten tukʼe ex qa ma txi qqʼamaʼn junjun yol te ik tzeʼn ten tpasensa, mlayx bʼant jun tiʼ quʼn. Toj junjun tnam, aj ttzaj kychleʼn kyibʼ xjal ex aj t-xi kytzyuʼn kyyabʼ kyuwxix in kubʼ kyyekʼun qa in che ximen kyiʼj qeju in che bʼisun. Qa taj xjal tuʼn tyolin, bʼinkuya. Moqa bʼinchankuya jun tiʼ kyiʼj qe toj tja, bʼalo at jun tiʼ mlay bʼant tuʼn, ik tzeʼn tuʼn tbʼinchet wabʼj, tuʼn kyok xqʼuqit kʼwaʼl moqa jaku tzʼonina akux in che bʼinchaʼn junjuntl tiʼchaq toj tkyimlen toj tja. Aʼyeju bʼinchbʼen lu mas bʼaʼn twitz junjun yol in xi qqʼamaʼn.
Aj tbʼet ambʼil, bʼalo taj xjal tuʼn tyolin tiʼj toj tja otoq kyim, ik tzeʼn aj ttzaj tnaʼn junjun tbʼanel tmod moqa junjuntl tiʼchaq tgantoq tuʼn tbʼant tuʼn. Yajxitl jakulo kubʼ tnaʼn xjal mas bʼaʼn kyuʼn yol lu, axpe ikx tuʼn jlu jakulo jaw tzeʼn chin xjal tuʼna. A jlu ikʼ tiʼj Pam, ma tzʼel 6 abʼqʼi tkyimlen tchmil aju Ian tbʼi. Tqʼama Pam jlu: «In tzaj kyqʼamaʼn xjal weye qa bʼant junjun tiʼ tbʼanel tuʼn Ian, a jlu mintiʼtoq bʼiʼn wuʼne, tuʼn jlu in kubʼ nnaʼne bʼaʼn».
Ateʼ junjun xjal in tzaj kyqʼamaʼn qa aʼyeju in che bʼisun, tnejel in tzaj qʼoʼn nimxix onbʼil kye, noqtzun tuʼnj, aj tbʼet qʼij, in che ok ten qe kyamiw bʼinchal junjun tiʼ aju in bʼant kyuʼn tnejel, in nikʼ tnaʼl kyuʼn qa aʼyeju in che bʼisun kukx kyajbʼil onbʼil. Tuʼntzunju, kukx tuʼn qyolin kyukʼil qeju ateʼ toj bʼis. * Aj tikʼ ambʼil, aʼyeju xjal in che bʼisun in che qʼoʼn chjonte tuʼnju in xi kyqʼamaʼn aju in kubʼ kynaʼn.
Ximana tiʼjju ikʼ tiʼj jun txin aju Kaori tbʼi, tzaj nimxix tbʼis tej tkyim ttxuʼ moqa tnan, tzmatoq in nel jun abʼqʼi tukʼe oxe xjaw, kyim ttzik. Noqtzun tuʼnj, kukx tzaj onin kyuʼn qe tbʼanel tamiw. Jun kyxol qe tamiw aju Ritsuko tbʼi, aju mastoq nim tabʼqʼi twitz, tzaj tqʼamaʼn Ritsuko tuʼn tok xqʼuqin tuʼn ik tzeʼn jun tal. Noqtzun tuʼnj, tqʼama Kaori jlu: «Ax tok nya bʼaʼn ela ximbʼetz lu toj nwitze. Oʼkx jun txubʼaj at ex nyatoq waje tuʼn tten juntl ntxuʼye. Pero tuʼnju kubʼ tyekʼun tbʼanel tmod, in ok naqʼete tiʼj ex ok te jun xjal nimxix toklen te weye. Tkyaqil seman in qo pakbʼane junx ex in qoʼxe kyoj chmabʼil. In chinx ttxkoʼne kʼal té, in tzaj tiʼntoq nwaye ex in tzajtoq ttzʼibʼin junjun uʼj weye ex junjun tarjeta. Kyjaʼtzun, aju tbʼanel tmod Ritsuko aju ok te ntxuʼye, onin wiʼje».
Ma tzikʼ 12 abʼqʼi tkyimlen ttxuʼ Kaori. Toj ambʼil jaʼlo, in nel tpaʼn nim ambʼil junx tukʼe tchmil tuʼn kyyolin tiʼj Tyol Dios kyukʼe xjal in che anqʼin ttxlaj kyja. Tqʼama Kaori jlu: «Aju ntxuʼye Ritsuko kukx in ximen wiʼje. Aj nmeltzʼaje njaye in chinxe visitaril te ex nim in chin tzalaje aj ntene tukʼil».
Jun xuʼj testigo de Jehová te tnam Chipre Poli tbʼi, ax ikx o tzʼonin tiʼj aju onbʼil in tzaj kyqʼoʼn txqantl te. Aju tchmil, Sozos tbʼi, jun tbʼanel xjaltoq ex jun tbʼanel nejenel kyxol okslal. In che tzajtoq ttxkoʼn qeju mintiʼ kyman ex qeju xuʼj o kyim kychmil aʼyeju ateʼ toj ttnam Dios tuʼn kywaʼn ex tuʼn kyten jun rat junx (Santiago 1:27). Bʼisbʼajilxix, tej iqʼintoq 53 abʼqʼi tuʼn, kyim tuʼn jun tumor tiʼj tcerebro. Tqʼama Poli jlu: «Ya mintiʼtl wukʼile aju kʼujlaʼnxix wuʼne, aju in anqʼine 33 abʼqʼi junx tukʼe».
Jyona tumel alkye tten jaku tzʼonina kyiʼj qeju in che bʼisun.
Tej otoqxi kux maquʼn tchmil Poli, xiʼ anqʼil toj tnam Canadá junx tukʼe tal aju Daniel tbʼi te 15 abʼqʼi. Atztzun xi tzyet tuʼn tok kychmoʼn kyibʼ kyukʼil testigos de Jehová jatumel in che anqʼintoq. «Maske mintiʼtoq bʼiʼn kyuʼn erman tiʼ otoq tzaj qiʼje, noqtzun tuʼnj, tzaj kyqʼamaʼn tbʼanel yol qeye ex tzaj kyqʼamaʼn tuʼn kyonin qiʼje. ¡Nimxix onin jlu tiʼj wale, tuʼnju tajbʼiltoq tuʼn tten tukʼe ttat! Aʼyeju erman attoq kyoklen toj ttnam Dios in che ximenxixtoq tiʼj Daniel. Jun kyxol erman lu, in xitoq txkoʼn Daniel tuʼn, tuʼn kyten jun rat junx kyukʼe tamiw moqa tuʼn kyxi saqchal pelot». Toj ambʼil jaʼlo, in che tzalaj Poli tukʼe Daniel ex bʼaʼn ateʼ.
Ax tok, at nimku tten tzeʼn jaku qo onin ex jaku txi qqʼuqbʼaʼn kykʼuʼj qeju in che bʼisun tiʼj jun toj kyja otoq kyim. Toj juntl xnaqʼtzbʼil, bʼaʼn tuʼn tok tqʼoʼn twitza tiʼj alkye tten jaku tzaj qʼuqbʼaʼn qkʼuʼj tuʼn Tyol Dios, tuʼnju in yolin tiʼj jun tbʼanelxix qʼuqbʼil qkʼuʼj toj ambʼil tzul.
^ taqik' 6 Ateʼ junjun xjal in kubʼ kytzʼibʼin twitz jun calendario alkye qʼij kyim xjal tuʼntzun kyxi qʼuqbʼal kykʼuʼj qe toj tja, tuʼnju toj qʼij lu mas kyaj qʼuqbʼil kykʼuʼj.
