In ul itzʼjiye toj Mulhouse, toj tjawitz qʼij toj tnam Francia, ex in jaw chʼiye toj jun kojbʼil jatumel attoq bʼiybʼil. Aju in tzaj nnaʼne tej tal kʼwaʼl qine qa kyxol ja xjal attoq nim qʼoj. Atzun weye toj nja, mintiʼtoq kyoklen xuʼj toj kywitz xinaq, moqa ichan, ex kwesttoq tuʼn kyokx bʼiʼn qa at jun tiʼ saj kyqʼamaʼn. In tzajtoq kyqʼamaʼn weye qa aju tembʼil jatumel tuʼn kyten xuʼj oʼkx toj kosin, tuʼn tok kykwentin kychmil ex qe kyal.

Kwesttoq wanqʼibʼile tej tzmatoq tal kʼwaʼl qine. Kyim ntate tuʼn kʼaj qʼeʼn tej iqʼintoq 10 abʼqʼi wuʼne. Tej tikʼ 5 abʼqʼi yajxitl, kubʼ tbʼyoʼn tibʼ jun kyxol qeju ntzike ex ok nqʼoʼn nwitze tiʼj alkye tten kubʼ bʼyoʼn jun xjal at nxilene tukʼe, tuʼn jlu, kyaj t-xobʼil wiʼje. In tzaj xnaqʼtzaʼne kyuʼn xjal at nxilene kyukʼil tuʼn kyajbʼen kuchiy ex pistola wuʼne tuʼntzun nbʼyoʼne. In oke te jun qʼa aju tgan qʼoj, ok nqʼoʼne tatuaje tiʼj tkyaqil nxmilale ex in ok tene kʼal qʼeʼn.

Tej iqʼintoq 16 abʼqʼi wuʼne, in bʼajtoq nkʼaʼne 10 moqa 15 cerveza toj jun qʼij ex xi tzyet tuʼn t-xi nkʼaʼne droga. Tuʼn tchjet jlu wuʼne, in xitoq nkʼayine junjun ttxʼaqin tiʼchaq ex in chin elqʼantoqe. Tej tzmatoq te 17 abʼqʼi qine, ya otoqxi chin okx qʼoʼne toj carcel. Tuʼn tkyaqil, 18 maj in okx qʼoʼne toj carcel tuʼnju in chin elqʼantoqe ex in chin bʼyoʼne.

Tej iqʼintoq 20 abʼqʼi wuʼne, mastoq nya bʼaʼn wanqʼibʼile. Tkyaqil qʼij in bʼajtoq 20 sichʼ marihuana wuʼne ex juntl wiq droga aju heroína tbʼi. Nim maj, chʼixme in kyime tuʼn tkyaqilju in xitoq nkʼane. In ok tene aqʼunal tiʼj droga ex qʼiʼn arma wuʼne aj nxiʼye bʼetil. Toj jun maj xi ndispararine jun xjal, noqtzun tuʼnj, mintiʼ kyim tuʼnju atz pon tzʼaq bala tiʼj kʼuxbʼil tok tiʼj tsinch. Kyim nnaʼne tej iqʼintoq 24 abʼqʼi wuʼne ex mas in oke te jun nya bʼaʼn xjal. In che tzajtoq xobʼ xjal weye aj ntzaj kykʼayine toj kay, jun rat naj in che ikʼx toj juntl plaj. Chʼixme tkyaqil maj aj tkubʼ bʼaj junjun seman, in chin pone kywitz policiy moqa toj hospital.

In kubʼ mojeʼye tej iqʼintoq 28 abʼqʼi wuʼne, nyatoq tbʼanel nmode tukʼe nxuʼjile. In xitoq nqʼamaʼne nya bʼaʼn yol te ex in noktoq nbʼyoʼne. Mintiʼtoq in nel npaʼne ambʼil tuʼn ntene tukʼe, in kubʼtoq nximane qa tuʼnju nim uwj in tzaj welqʼaʼne tuʼn t-xi nqʼoʼne te, ktzalajel tuʼn. Noqtzun tuʼnj, ikʼ jun tiʼ aju mintiʼtoq ximen wuʼne: xi tzyet t-xnaqʼtzaʼn nxuʼjile tiʼj Tyol Dios kyukʼe testigos de Jehová. Tej tbʼaj xnaqʼtzan tnejel maj, bʼiʼx kyaj ttzaqpiʼn sichʼ, mintiʼ xi tkʼamoʼn pwaq  in tzajtoq welqʼaʼne ex e tzaj tqʼoʼn tkyaqil uwj weye aju otoq txi nqʼoʼne te. Mintiʼ xi nqʼoʼne ambʼil te tuʼn t-xnaqʼtzan tiʼj Tyol Dios. In tzajtoq nim nqʼoje; in nokx nqʼoʼne tsibʼil sichʼ toj twitz ex in kubʼtoq nqʼoʼne tchʼixwi kywitz xjal jatumel in qo anqʼine.

Toj jun qonikʼan, xi nkʼaʼne nimxix qʼeʼn, ok nqʼoʼne qʼaqʼ tiʼj qjaye, noqtzun tuʼnj, o kleta tuʼn nxuʼjile tukʼe tal nmeʼjele te 5 abʼqʼi. Tej tel kʼaj qʼeʼn wiʼje, kubʼ nnaʼne nim nya bʼaʼn. Kubʼ nximane qa mlayx kubʼ tnajsaʼn Dios wile. Tzaj nnaʼne aju otoq tzʼok nbʼine te jun pal qa aʼyeju xjal nya bʼaʼn ok che xel toj qʼaqʼ. Axpe ikx aju psiquiatra in nonintoq wiʼje tqʼama jlu: «Ya mintiʼtl qʼanbʼil teya. Mlayx kleta».

Tej otoqxi bʼaj patj, moqa tzʼeʼy, qjaye, o xiʼye anqʼil kyja njiʼye. E ul qe testigos de Jehová visitaril nxuʼjile, ex xi nqanine kye qa jaku kubʼ tnajsaʼn Dios wile. Tzaj kyuʼjin 1 Corintios 6:9-11 weye. Toj taqikʼ Tyol Dios lu in tzaj tqʼamaʼn alkye junjun bʼinchbʼen ikʼun tuʼn Dios, ax ikx in tzaj tqʼamaʼn jlu: «Iktzun kyten junjun kyeye ojtxi». Tzaj qʼuqbʼaʼn nkʼuʼje kyuʼn yol lu qa jaku chʼexpaj wanqʼibʼile. Ax ikx tzaj kyuʼjin 1 Juan 4:8 tuʼn ttzaj kyyekʼun weye qa at tkʼuʼj Dios wiʼje. Nim onin jlu wiʼje, xi nqanine kye tuʼn ttzaj kyqʼoʼn xnaqʼtzbʼil weye tiʼj Tyol Dios kabʼe maj toj seman ex xi tzyet tuʼn nxiʼye toj kychmabʼil. In ok tene naʼl Dios te Jehová tkyaqil qʼij.

Tej tel jun xjaw, kubʼ nximane tuʼn miʼn t-xi nkʼantle droga ex qʼeʼn. Noqtzun tuʼnj, kukxtoq in tzaj tqanin nkʼuʼje. Tzaj nim wiq yabʼil wiʼje, tzaj chyon nwiʼye, tzaj chyon nkʼuʼje, tzaj calambre tiʼj nxmilale, ax ikx mintiʼtoq in chin wtane qonikʼen ex junjuntl yabʼil e tzaj wiʼje. Noqtzun tuʼnj, kubʼ nnaʼne qa onin Jehová wiʼje ex tzaj tqʼoʼn wipumale. Kubʼ nnaʼne ik tzeʼn te apóstol Pablo, tzaj tqʼamaʼn qa tzaj qʼoʼn tipumal tuʼn Dios (Filipenses 4:13). Tej tbʼet ambʼil, ax ikx kyaj ntzaqpiʼne tuʼn nsichʼine (2 Corintios 7:1).

Onin Tyol Dios wiʼje tuʼn tkyaj ntzaqpiʼne tkyaqilju nya bʼaʼn ex tuʼn ntene bʼaʼn kyukʼil toj njaye. Xi tzyet tuʼn tten tbʼanel nmode tukʼe nxuʼjile ex tuʼn t-xi nqʼamaʼne «najsame» ex «chjonte» te. Ax ikx in neltoq npaʼne ambʼil tuʼn tene tukʼe nmeʼjele. Tej tel jun abʼqʼi in chin xnaqʼtzane tiʼj Tyol Dios, jaw aʼ nwiʼye, moqa in bʼyane ex in oke te jun testigo de Jehová, ik tzeʼn bʼant tuʼn nxuʼjile.

Qʼuqlixix nkʼuʼje qa in kleta tuʼn Tyol Dios. Axpe ikx qeju at nxilene kyukʼil in tzaj kyqʼamaʼn weye qa noqwit mintiʼ e bʼant chʼixpubʼil lu wuʼne, owtlo chin kyime tuʼn tkyaqilju in xitoq nkʼane moqa tuʼn bʼiybʼil.

Chʼexpaj qanqʼibʼile kyukʼil toj njaye tej t-xi tzyet tuʼn tjapun wuʼne aju aqʼuntl il tiʼj tuʼn tbʼant tuʼn chmilbʼaj ex tatbʼaj, ik tzeʼn in tzaj tqʼamaʼn Tyol Dios (Efesios 5:25; 6:4). Xi tzyet tuʼn tkubʼ qbʼinchaʼne junjun tiʼchaq junx. Toj ambʼil jaʼlo mintiʼ in xi nqʼamaʼne te nxuʼjile tuʼn tten oʼkx toj kosin, sino, in nel tpaʼn nim ambʼil tuʼn tpakbʼan tiʼj Tyol Dios, ex ngane tuʼn wonine tiʼj. Ax ikx te, in nonin wiʼje tuʼn tbʼant aqʼuntl wuʼne toj ttnam Dios.

O chʼexpaj wanqʼibʼile tuʼn tkʼujlabʼil ex qʼaqʼbʼil tkʼuʼj Dios. Qʼuqli nkʼuʼje qa alkyexku xjal jaku chʼexpaj tanqʼibʼil tuʼn tipumal Tyol Dios. Tuʼntzunju, tuʼn tkyaqil wanmiye waje tuʼn nyoline tiʼj Jehová kyukʼil qeju in kubʼ kyximen qa mlay che qʼanit, tuʼnju aʼyine jun kyxol qe jlu ojtxe. O chin tzaj t-xnaqʼtzaʼne Tyol Dios tuʼn tok nqʼoʼne kyoklen xjal qa xinaq moqa xuʼj; noqtzun tuʼnj, ax ikx tuʼn tok nqʼoʼne toklen nchwinqlale.