TBʼI XNAQʼTZBʼIL TOK TIʼJ T-XKʼOMIL: O KLET TYOL DIOS TWITZ ALKYEXKU NYA BʼAʼN
Klet Tyol Dios tiʼjju tuʼn tbʼaj naj
TEJ TOK BʼINCHAN NYA BʼAʼN TIʼJ: Aʼyeju aj tzʼibʼil ex qeju e tzaj copiarinte Tyol Dios kubʼ kyqʼoʼn twitz papiro ex twitz pergamino (2 Timoteo 4:13). * ¿Alkye tten jakutoq txi naj aju Tyol Dios kyuʼn?
In nok papiro te toqoqon, in nel bʼaj tcoloril ex lwey in naj. «Aj tbʼet ambʼil, in bʼaj naj jun t-xaq ajxi tok ik tzeʼn jun esqueleto de fibras ex in nok te quq —tzaj kyqʼamaʼn Richard Parkinson ex Stephen Quirke aʼyeju in che xnaqʼtzan tiʼj kyanqʼibʼil aj Egipto e ten ojtxi—. Akux kʼuʼn jun uʼj tolin tten jaku tzʼok noj tiʼj tuʼn lan, ex jaku kubʼ qʼayj tuʼn cheʼw ex qa maquʼn tkux tjaqʼ txʼotxʼ in bʼaj waʼn kyuʼn tal txkup, mas kyuʼn snik saq kyiʼj». Tej kykanet qe papiro e kubʼ qʼoʼn junjun tiʼj luz moqa toj cheʼw ex tuʼn jlu e bʼaj naj.
Aju pergamino mas kyuw twitz papiro, noqtzun tuʼnj, in bʼaj naj qa mintiʼ in kubʼ qʼet toj jun tembʼil bʼaʼn, qa ma kubʼ qʼet toj moqʼmoj, toj cheʼw moqa toj luz. * Ax ikx in bʼaj waʼn kyuʼn tal txkup. Tuʼntzunju, aju tbʼinchbʼen Everyday Writing in the Graeco-Roman East (La escritura cotidiana en el Oriente Grecorromano) in tzaj tqʼamaʼn tiʼjju tqanil ojtxi qa «aju kyaj anqʼin kukx in bʼaj lu nya noq jun maj». Noqwit tzaj jlu tiʼj Tyol Dios, aju tqanil tkuʼx toj owtle txi naj.
ALKYE TTEN KLET TYOL DIOS: Aju Ley tzaj qʼoʼn kye qe aj Israel tzaj tqʼamaʼn qa kykyaqil qe aj kawil te Israel kbʼeltoq kytzʼibʼin «jun kopya tiʼj ley lu», aʼyeju tnejel jweʼ uʼj toj Tyol Dios (Deuteronomio 17:18). Axpe ikx, aʼyeju e tzaj copiarinte at kyojtzqibʼil bʼaj kybʼinchaʼn nimxix uʼj, tej tkubʼ bʼaj tnejel syent abʼqʼi jakutoq kanet copia kyiʼj Tyol Dios kyoj ja te kʼulbʼil toj tkyaqil Israel axpe ikx toj najchaq tnam Macedonia (Lucas 4:16, 17; Hechos 17:11). ¿Alkye tten o che klet junjun ojtxi uʼj atxix ojtxi ex in nul toj ambʼil jaʼlo?
Aqeju ojtxi uʼj aju ojtzqiʼn ik tzeʼn uʼj tolin tten aju kanet toj mar Muerto e klet toj nim syent abʼqʼi kyoj qe kʼil txʼotxʼ kytxʼotxʼil ateʼkx kyoj jul toj jun tembʼil tzqij.
«Ojtzqiʼn qa xi kykʼuʼn aj Judiy qe uʼj tolin tten tiʼj Tyol Dios kyoj kʼil txʼotxʼ kytxʼotxʼil tuʼntzun miʼn kybʼaj naj», tqʼama xjal at tojtzqibʼil tiʼj Akʼaj Tuʼjil Philip Comfort. Ex axju bʼant kyuʼn okslal. Iktzun tten o che kanet junjun uʼj e kubʼ tzʼibʼin tiʼj Tyol Dios kyoj qe kʼil txʼotxʼ kytxʼotxʼil, toj jun kwart qlolj, toj jul, ax ikx kyoj qeju tembʼil tzqij.
AJU O BʼANT TUʼN: Nim mil piẍ ojtxi uʼj tiʼj Tyol Dios, at junjun o tzikʼxi mas te kabʼe mil abʼqʼi tbʼantlen ex kukx at toj ambʼil jaʼlo. Mintiʼ juntl uʼj ojtxi kubʼ tzʼibʼin at nim ojtxi uʼj tiʼj ex in ten nim ambʼil.
^ taqik' 3 Aju papiro bʼinchan tiʼj jun tzeʼ tkuʼx toj aʼ aju ax tbʼiju papiro. Atzunju pergamino bʼinchan tiʼj ttzʼumil txkup.
^ taqik' 5 Jun techel, aju acta tiʼj Declaración de Independencia kye qe xjal te Estados Unidos kubʼ tzʼibʼin twitz pergamino. Naʼmx tbʼant kabʼe syent abʼqʼi tukʼe nikʼjan ex aju tqanil tkuʼx toj mintiʼxix qʼanchaʼl ex chʼix tok te mintiʼx toklen.
