MINTIʼ juntl taj tuʼn tok xqʼuqit ik tzeʼn jun neʼ, moqa neʼẍ tzma in nul itzʼji. Aj qul itzʼji qaj tuʼn qok xqʼuqin kyuʼn qtat. Tej tzmatoq in bʼant qbʼet, aj tok qqʼoʼn qwitz kyiʼj xjal mintiʼ ojtzqiʼnqe quʼn, kubʼ qximen qa nimaqxix kyweʼ ex o jaw xobʼ kyuʼn, ex jun rat naj oʼx jyol kye qtat. Nimxixlo o jaw tzalaj tej qpon kyukʼil qtat ex tej t-xi kytzyuʼn qqʼobʼ, kubʼ qnaʼn qa nya qjunalx atoʼ.

Tej kʼwaʼlx qoʼ, aju kykʼujlabʼil qtat ex onbʼil tzaj kyqʼoʼn qe onin qiʼj tuʼn qten bʼaʼn. Tej tel qnikʼ qa kʼujlan qo kyuʼn, kubʼ qnaʼn qa nya qjunalx atoʼ ex tej ttzaj kyqʼamaʼn qe qa tbʼanel aju in kubʼ qbʼinchan, mas ok qʼuqe qkʼuʼj qiʼj ex mas ok tilil quʼn tuʼn tbʼant junjun tiʼ toj tumel.

Tej qchʼiy, ax ikx qe tbʼanel qamiw e onin qiʼj tuʼn miʼn tkubʼ qnaʼn qa qjunalx atoʼ. In qo tzalajtoq kyukʼil, ax ikx e onin qiʼj tuʼn miʼn qtzaj xobʼxix tej qxiʼ toj ja xnaqʼtzbʼil.

Ax tok, tbʼanelxixlo noqwit ik tten in che tzaj chʼiy kykyaqil kʼwaʼl. Bʼisbʼajilxix tuʼnju ateʼ junjun kʼwaʼl kwest tuʼn kykanet kyamiw. Ex nim qe kʼwaʼl mintiʼ in xi qʼoʼn ambʼil kye tuʼn kykubʼ bʼiʼn kyuʼn kytat. «Aj tok nqʼoʼn nwitze tiʼj kyilbʼilal junjun ja xjal in che bʼinchaʼn junjun tiʼ junx, in kubʼ nximane jlu: ‹Noqwit ik qe weʼye toj nja tzeʼn qe jlu›» tqʼama Melisa. * Qajlo ax ikx teya in kubʼ tnaʼn.

Tej tzmatoq in chʼiya kubʼlo tnaʼna qa mintiʼtoq qʼuqbʼil tkʼuʼja. ¿Tiquʼn? Qajlo mintiʼ ok kʼujlaʼna ex mintiʼ tzaj onine tej tzmatoq kʼwaʼlxa. Ax ikx qa kukxtoq in che qʼojin qe ttata toj tkyaqil ambʼil tej naʼmxtoq tkyaj kytzaqpin kyibʼ ex atlo maj kubʼ tnaʼne qa aya at tpaj tiʼjju ikʼ. Ex mas qa ok kybʼinchan ttata jun nya bʼaʼn tiʼj t-xmilale moqa xi qʼamaʼn nya bʼaʼn yol teya.

¿Tiʼ nya bʼaʼn in tzaj kyiʼj kʼwaʼl tuʼn jlu? Aj kyokx toj kykuʼxumal, ateʼ junjun in che ok ten kʼal droga moqa kʼal qʼeʼn. Junjuntl in nokx kyqʼon kyibʼ kyxol kʼloj xjal nya bʼaʼn noq tuʼn tkubʼ kynaʼn qa nya kyjunalx ateʼ. Tuʼnju mintiʼ in che ok kʼujlaʼn in tzaj bʼaj kykʼuʼj ex in che ok ten jyol kyukʼe, noqtzun tuʼnj, a jlu noq chʼin ambʼil in ten, ex aj tkyaj kytzaqpin kyibʼ mas in tzaj bʼaj kykʼuʼj.

 Axpe ikx qeju kuʼxun in che ex twitz nya bʼaʼn lu, in che chʼiy tukʼilju kyxim qa mintiʼ kyajbʼen. Ik tzeʼn aju tqʼama Ana: «Qʼuqlixixtoq nkʼuʼje qa tkyaqilju in kubʼ nbʼinchaʼne nya bʼaʼn, tuʼnju oʼkx jlu kukxtoq in tzaj tqʼamaʼn nnane weʼye. Mintiʼ naʼn wuʼne qa tzaj tqʼamaʼn nnane jun tiʼ tbʼanel bʼant wuʼne».

Nya oʼkx tuʼnju alkye tten xqo jaw chʼiy in kubʼ qnaʼn qa qjunalx atoʼ. Ax ikx jaku tzaj jlu qa ma qo kyaj tzaqpiʼn tuʼn qukʼil, tuʼnju ma qo tijin ex tuʼnju tzeʼn qilbʼilal. Noq alkyexku jun kyxol jlu, jaku tzaj tiʼn bʼis ex jaku tzaj tiʼn nya bʼaʼn qxol kyukʼil txqantl. ¿Alkye tten jaku qo ex kywitz nya bʼaʼn lu?

Jaku tzʼok qeʼ qkʼuʼj qa nya qjunalx atoʼ. At jun jaku qo tzaj tonin, ex tajbʼil tuʼn qtzaj tonin: a Dios.

Ajbʼen Isaías tuʼn Dios tuʼn ttzaj ttziyen jlu qe: «Miʼn bʼaj kykʼuʼje, aqine Kydiose. Kxel nqʼoʼne kyipumale ex chin onile kyiʼje, tzyuʼn qeye wuʼne tuʼn nbʼanqʼabʼe» (Isaías 41:10, 13). In tzaj qʼuqbʼaʼnxix qkʼuʼj kyuʼn yol lu aj tel qnikʼ qa tzyuʼn qqʼabʼ tuʼn Dios. ¡Mintiʼ jun tiʼ tuʼn tbʼaj qkʼuʼj tuʼn!

In yolin Tyol Dios kyiʼj junjun tmajen Dios ojtxe qa kubʼ kynaʼn nim bʼis, noqtzun tuʼnj, bʼant tuʼn tok qeʼ kykʼuʼj tiʼj ex qa oktaq che tzajel onin tuʼn. Tej naʼmxtoq tul itzʼje Samuel, kubʼ tnaʼn Ana qa mintiʼtoq tajbʼen tuʼnju mlaytoq che tzaj tal. Ok xmayin ex el ikʼun tuʼn jlu. Tuʼntzunju, ok ten oqʼel ex mintiʼ waʼn (1 Samuel 1:6, 8). Noqtzun tuʼnj, tej otoqxi txi tqʼamaʼn te Dios tiʼtoq in tnaʼn, onin tiʼj tuʼn miʼn tbʼajtl tkʼuʼj (1 Samuel 1:18).

Nim maj kubʼ tnaʼn aj bʼitzil David qa tjunalxtoq at. Kyoj nimku abʼqʼi, jyoʼn aj kawil Saúl tiʼj tuʼn tkubʼ tbʼyoʼn. Maske mintiʼ kyim David, at maj kubʼ tnaʼn qa mlaytoq tzʼex twitz nya bʼaʼn (Salmo 55:3-5; 69:1). Noqtzun tuʼnj, kubʼ ttzʼibʼin jlu: «Txubʼtxaj in chin kubʼ koẍeʼye ex in chin tane, tuʼnju oʼkx aya qʼuqbʼalte nkʼuʼje, Nman» (Salmo 4:8).

Ik tzeʼn te Ana ex David xi kyqanin onbʼil te Dios tuʼn kyex twitzju yajbʼil ex kʼixkʼoj tzaj kyiʼj ex e tzaj onin tuʼn Dios (Salmo 55:22). ¿Alkye tten jaku bʼant quʼn ik tzeʼn kye?

1. Qʼonka tilil tuʼn tok qeʼ tkʼuʼja tiʼj Jehová ik tzeʼn ttata

Tzaj tqʼamaʼn Jesús tuʼn tok qojtzqiʼn Tman aju «Dios axix tok» (Juan 17:3). Ax ikx tqʼama apóstol Pablo jlu «ate Dios mya najchaq taʼ ttxlaj junjun qe» (Hechos 17:27). Tuʼntzunju, in tzaj tqʼamaʼn Santiago jlu qe: «Che laqʼexe ttxlaj Dios, ax ikx te ktzajel laqʼeʼ kyukʼile» (Santiago 4:8).

Aj tel qnikʼ qa at jun Qtat toj kyaʼj aju in ximin qiʼj ex kʼujlaʼn qo tuʼn, in nonin tuʼn miʼn tbʼajxix qkʼuʼj. Ax tok, tuʼn tten qʼuqbʼil qkʼuʼj in xi tiʼn ambʼil, noqtzun tuʼnj, nim xjal o tzʼel kynikʼ qa o tzʼonin kyiʼj. Tqʼama Carolina jlu: «Tej t-xi tzyet tuʼn tok qeʼ nkʼuʼje tiʼj Jehová, kanet jun nmane aju jaku txi nqʼamaʼne te tkyaqilju in nnaʼne. Nim onin wiʼje».

In tzaj tnaʼn Raquel jlu: «Tej nkyaj tzaqpiʼne kyuʼn ntate, a Jehová onin wiʼje tuʼn miʼn ttzaj bʼajxix nkʼuʼje. In chin yolintoqe tukʼe ex xi nqanine te tuʼn ntzaj tonine tuʼn wexe twitz nya bʼaʼn. Ex kukx onin wiʼje». *

2. Jyona onbʼil kyukʼe xjal in che ajbʼen te Dios

Xi tqʼamaʼn Jesús jlu kye t-xnaqʼtzbʼen: «Atzun kyeye kyitzʼin kyibʼe kykyaqile» (Mateo 23:8). Tajbʼiltoq Jesús tuʼn tten kʼujlabʼil kyxol qe t-xnaqʼtzbʼen ik tzeʼn jun ja xjal in che ajbʼen te Dios (Mateo 12:48-50; Juan 13:35).

In nok tilil kyuʼn kʼloj okslal kye testigos de Jehová tuʼn t-xi kyqʼoʼn onbʼil, kʼujlabʼil ex qʼuqbʼil kykʼuʼj xjal, ik tzeʼn in bʼant tuʼn jun ja xjal (Hebreos 10:24, 25). Nim xjal o tzʼok kyqʼoʼn kywitz qa aʼyeju kychmabʼil ik tten ik tzeʼn jun pomada in nok tqʼanin jun iẍil.

Tqʼama Eva jlu: «Attoq jun tbʼanel wamiwe toj ttnam Dios aju el tnikʼ tiʼjju kʼixkʼoj tzaj wiʼje. In kubʼ bʼine tuʼn, tzaj tuʼjin junjun taqikʼ Tyol Dios weʼye ex naʼn Dios junx wukʼile. Tzaj tqʼuqbʼaʼn nkʼuʼje qa nya njunalxe chin tele. Nimxix onin wiʼje. Chjonte tuʼn onbʼil tzaj tqʼoʼn, mintiʼxixtl bʼaj nkʼuʼje». Ax ikx tqʼama Raquel: «Kanet ‹ntate ex nnaʼne› toj ttnam Dios. In kubʼ nnaʼne qa kʼujlaʼn qiʼne kyuʼn ex in tzaj kyqʼuqbʼaʼn nkʼuʼje».

 3. Tenx tkʼujlabʼila ex tbʼanel tmoda

Qa ma kubʼ qyekʼun kʼujlabʼil kyiʼj txqantl, kchʼiyel qamiwbʼil kyukʼil. Tqʼama Jesús jlu: «Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye» (Hechos 20:35). Ax tok, qa ma txi qyekʼun mas kʼujlabʼil kyiʼj txqantl, ax ikx kye qo okel kykʼujlaʼn. Xi tqʼamaʼn Jesús jlu kye t-xnaqʼtzbʼen: «Kyqʼonxe chʼin kye mastl ex ktzajel tqʼoʼn Dios chʼintl kyeye» (Lucas 6:38).

Aj tkubʼ qyekʼun kʼujlabʼil ex aj qok kʼujlaʼn mintiʼtl in qo tzaj xobʼ. Ik tzeʼn in tzaj tqʼamaʼn Tyol Dios: «Aju kʼujlalil mlay bʼaj» (1 Corintios 13:8). Tqʼama María jlu: «In nel nnikʼe qa at junjun tiʼ nyaxix bʼaʼn in kubʼ nximane wiʼje, nya ax tok qe. In nel wikʼune ximbʼetz lu aj t-xi nqʼoʼne onbʼil kye txqantl. Ex in nikʼ tnaʼl junjun tiʼ wuʼne aju in chin xobʼe tuʼn. Kukx in chin tzalaje qa ma txi nqʼoʼne onbʼil kye txqantl».

Aʼyeju oxe nabʼil ma che kyaj, mlay che ok te jun milagr tuʼn t-xi bʼinchet tiʼj tkyaqil toj tumel jun rat naj, noqtzun tuʼnj, nim jaku che onin qiʼj. Tqʼama Carolina jlu: «Kukx in chin tzaj xobʼe, noqtzun tuʼnj, jaʼlo in nel nnikʼe qa at wajbʼene. Qʼuqli nkʼuʼje qa at tkʼuʼj Jehová wiʼje ex ateʼ nim wamiwe aʼyeju in che onin wiʼje tuʼn miʼn ntzaj xobʼe». Chʼixme ax yolju tqʼama Raquel: «In tzaj junjun maj nbʼise, noqtzun tuʼnj, ate nim wermane aʼyeju jaku txi nqanine nabʼil kye. Kukx in che onin wiʼje tuʼn tten jun tbʼanel nxime. Aju mas bʼaʼn, at jun tbʼanel Ntate aju in chin yoline tukʼe tkyaqil qʼij. Atzun in nela nnikʼe qa junxitl».

At jun qʼuqbʼil qkʼuʼj ktel te jumajx. In yolin Tyol Dios qa toj chʼintl ambʼil kʼokel Txʼotxʼ te jun tbʼanel najbʼil jatumel mi jun xjal ktzajel xobʼ. In tzaj ttziyen Tyol Dios jlu: «Kykyaqil xjal che anqʼil mintiʼtl kyxobʼil, ex teylex te junjun kʼojlal tjaqʼ t-xlekumal tqan t-uva ex tqan t-higo» (Miqueas 4:4). Mi jun xjal kʼokel tbʼinchaʼn nya bʼaʼn qiʼj ex qo tzajel xobʼ tuʼn. Axpe ikx, aju xobʼajil ya miʼn tzaj qnaʼntl (Isaías 65:17, 25). Ok ktel axix tok mujbʼabʼil tuʼn Jehová ex Jesús. Oktzun che tel xjal toj «tzalajbʼil ex bʼiʼx kqebʼil kykʼuʼj te jumajx» (Isaías 32:17).