TAQIKʼ TYOL DIOS: «Miʼn bʼaj kykʼuʼje» (Mateo 6:25).

¿Tiʼ t-xilen? Tqʼama Jesús qe yol lu toj tchikʼbʼabʼil twiʼ jun witz. In tzaj tqʼamaʼn jun uʼj pujbʼil yol, aju verbo griego jaku kubʼ qʼet «bʼaj kykʼuʼje» atz in yolin tiʼj «aju qximbʼetz in tzaj tiʼj mebʼayil, moqa prow, aju weʼyaj ex junjuntl tiʼchaq in bʼaj qkʼuʼj tiʼj junjun qʼij toj qanqʼibʼil». Nimku maj aju in bʼaj qkʼuʼj tiʼj aju jaku tzikʼ toj ambʼil tzul. Ax tok in tzaj bʼaj qkʼuʼj tiʼj junjun tiʼchaq at tajbʼen qe ex tuʼn kyten qeju xjal at qkʼuʼj kyiʼj toj tbʼanel (Filipenses 2:20). Noqtzun tuʼnj, tej tqʼama Jesús aju yol lu: «Miʼn bʼaj kykʼuʼje» atz yolin tiʼjju tuʼn miʼn ttzaj bʼajxix qkʼuʼj, kyiʼj qe tiʼchaq at tajbʼen qe te juntl qʼij aʼyeju jaku tzeʼl kyin tzalajbʼil qe toj qanqʼibʼil (Mateo 6:31, 34).

¿Atpe tajbʼen aju consej lu toj ambʼil jaʼlo? Aju tqʼama Jesús nim toklen. At junjun uʼj o che bʼant kyuʼn xjal in tzaj kyqʼamaʼn qa at jun xjal mintiʼ in kubʼ tiʼj aju in bʼaj tkʼuʼj tuʼn, aju sistema nervioso simpático in tzaj tqʼamaʼn tqanil tkyaqil maj. Ax ikx in tzaj kyqʼamaʼn qa a jlu «at toklen tukʼil yabʼil aju úlcera, aʼyeju yabʼil cardíacas ex asma».

Jun tbʼanel onbʼil aju tqʼama Jesús tuʼn miʼn ttzaj bʼajxix qkʼuʼj: mintiʼx tajbʼen. Tqʼama jlu: «¿Ex alkye jun kyxole jaku bʼant tuʼn tuʼn tok tqʼoʼn kabʼe xkʼachubʼtl [tchwinqlal, TNM] tuʼnju nimxix in bʼaj tkʼuʼj tiʼj?» (Mateo 6:27). Qa ma tzʼok qqʼoʼn qwiʼ tiʼjju in tzaj bʼaj qkʼuʼj tiʼj mlay ten qanqʼibʼil mas bʼaʼn nix tuʼn t-xi qlaqʼbʼaʼn jun segundo mas. Ax ikx, mintiʼxix in che ikʼ qeju tiʼchaq in bʼaj qkʼuʼj tiʼj ik tzeʼn in qo ximen tuʼn tbʼaj. Ik tzeʼn tqʼama jun ajnabʼil: «Aju in bʼaj qkʼuʼj tiʼj toj ambʼil tzul nokx gan in nok qqʼoʼn ambʼil tiʼj, ex aju in bʼaj qkʼuʼj tiʼj tuʼn tikʼ [...] nok junjun maj in che el te nya bʼaʼn ik tzeʼn in tzaj tqʼamaʼn aj nabʼil».

¿Alkye tten jaku kubʼ tiʼj ximbʼetz in tzaj bʼaj qkʼuʼj tuʼn? Tnejel, tuʼn tok qʼuqeʼ tkʼuʼja tiʼj Dios. Qa in tzaj tqʼoʼn Dios kywa qeju chyuʼj, moqa pichʼ, ex in che ok t-xbʼalumin qe bʼech te tbʼanel, ¿mlaypetzulo che ok tkwentin qeju in che ajbʼen te? (Mateo 6:25, 26, 28-30). Ax ikx, miʼn kubʼ nej t-ximbʼetza, tzʼanqʼina tukʼilju at junjun qʼij. Tqʼama Jesús lu: «Kyjaʼtzun, miʼn bʼaj kykʼuʼje tiʼj ju te nchiʼj, porque aju te nchiʼj texte tbʼis ktzajel» tuʼnju teyele junjun qʼij in tzaj qbʼis toj (Mateo 6:34).

Qa ma txi qbʼiʼn aju consej tqʼama Jesús, ya mlay tzaj junjun nya bʼaʼn qiʼj ex tzul qkʼamoʼn mojbʼabʼil lu, «kqebʼil kykʼuʼje tuʼn Dios» (Filipenses 4:6, 7).