In qo anqʼitoqe toj Tellancourt jun tnam tuʼj tbʼanqʼabʼ qʼij te Francia. Te Francia ntate atzun ntxuʼye te Italia. Tej iqʼintoq 8 abʼqʼi wuʼne oʼxe anqʼil toj tnam Italia, jun tembʼil jatumel mebʼa, moqa prow qe xjal, in chextoq aqʼunal ttxaʼn tnam Roma. Nyatoq bʼaʼn qanqʼibʼile toj qjaye, in che ok tentaq ntate tukʼil nnane qʼojel tiʼj pwaq.

Tej iqʼintoq 15 abʼqʼi wuʼne, tzaj tqʼamaʼn ntxuʼye tuʼn wexe jyol qe wamiwe. Tuʼntzunju, mintiʼ in tentle njaye, jun rat e kanet qe wamiwe aʼyeju nya bʼaʼnqe. Toj jun qʼij pon laqʼeʼ jun xjal ntxlaje aju kubʼ nximane qa tbʼaneltoq. Tzaj nkʼamoʼne droga aju tzaj tqʼoʼn weʼye, wajtoqe tuʼn tkubʼ nyekʼune qa otoq chin chʼiye. Jun rat naj in ok tene kʼal droga ex in ok tene yaẍil. Nim maj e ok ten xjal wiʼje. Mintiʼtoq toklen chwinqlal toj nwitze, ikxtoq in nela toj nwitze qa ma chin anqʼine ex qa ma chin kyime. Kubʼ nnaʼne qa njunalxe atine. Tej iqʼintoq 16 abʼqʼi wuʼne kubʼ nximane tuʼn tkubʼ nbʼyoʼn wibʼe, xi nkʼane jun botey whisky ex kux nxoʼn wibʼe toj aʼ. In tene oxe qʼij mintiʼ in yukchiye.

Tej tbʼet ambʼil el nnikʼe qa nim toklen chwinqlal, noqtzun tuʼnj, in ok tene bʼiyel ex sbʼul kyiʼj xjal. In xi nqʼamaʼntoqe kye tuʼn nyaẍine kyukʼil ex aj npone kyja, in xi nqʼoʼne droga kye ex in netz welqʼaʼne tkyaqil tiʼchaq nim twiʼ. In ajbʼene kyuʼn nim kʼloj eleqʼ tuʼn t-xi nsipine droga toj tnam Italia. Kukxtoq in tzaj nya bʼaʼn wiʼje kyuʼn polisiy. Maske nya bʼaʼntoq wanqʼibʼile, qʼuqlitoq nkʼuʼje qa at tiquʼn ẍin kubʼ bʼinchane. Tuʼntzunju, in ok tene naʼl Dios: «Oʼkx in xi nqanine teya tuʼn ttzaj tqʼoʼna jun abʼqʼi tzalajbʼil weʼye ex mujbʼabʼil».

Tej iqʼintoq 24 abʼqʼi wuʼne kubʼ nximane tuʼn nxiʼye anqʼil toj tnam Inglaterra. Nyatoq segur taʼ wanqʼibʼile, attoq jun kʼloj kʼayil droga kyajtoq tuʼn nkubʼ kybʼiyoʼne. Tej naʼmxtoq wikʼ bʼete, in xiʼye kaʼyil nnane ex in jaw labʼine tiʼj Annunziato Lugarà in yolintoq tiʼj Tyol Dios tukʼil. * Ojtzqintoq wuʼne ojtxe qa jun eleqʼtoq, tuʼntzunju in jaw xobʼe ex xi nqanine te tiʼtoq in bʼant tuʼn atz. Tzaj tqʼamaʼn weʼye qa otoq bʼant nim chʼixpubʼil  tuʼn toj tanqʼibʼil tuʼn tok te testigo de Jehová, xi ntziyene te tuʼn njyoʼne kyiʼj testigo de Jehová aj npone Inglaterra. Maske xi ntziyene te, kukx ten wanqʼibʼile te nya bʼaʼn.

Jun qʼij ok nqʼoʼn nwitze tiʼj jun testigo de Jehová in che kyaj tqʼoʼn uʼj Aju Xqʼuqil ex ¡Despertad! toj jun bʼe jatumel ateʼ nim xjal toj tnam Londres. Tuʼn jlu, tzaj nnaʼne qa otoq txi ntziyene jun yol ex xi nqanine te qa jakutoq chin nxnaqʼtzane tiʼj Tyol Dios.

In jaw labʼine tiʼjju el nnikʼe tiʼj. Ik tzeʼn aju in tzaj tqʼmaʼn 1 Juan 1:9 tiʼj Dios: «Pero qa ma jatz qpaʼn qil twitz Dios, knajsetel qil tuʼn ex kʼelel ttxʼjoʼn tkyaqil mya bʼaʼn tuj qanmi». Chʼexpaj wanqʼibʼile kyuʼn qe yol lu, kubʼ nnaʼne qa tzʼiltaq qiʼne tuʼn tkyaqilju otoq bʼant wuʼne. Jun rat naj nxiʼye kyoj chmabʼil in che ok kyoj Ja te Chmabʼil kye testigos de Jehová, jatumel tzaj kyyekʼun kykʼujlabʼil wiʼje tej npone. Tej tok nqʼoʼn nwitze qa attoq kʼujlabʼil kyxol, a jlu kukxtoq in kubʼ nximane, wajtoqe tuʼn ntene kyxol kʼloj okslal lu.

Nyaxix kwest ela te weʼye tuʼn miʼn nkʼane droga ex tuʼn nyaẍine. Aju mas kwest ela te weʼye aju tuʼn tchʼexpaj nmode. El nnikʼe qa iltoq tiʼj tuʼn woke te tbʼanel xjal ex tuʼn nximane kyiʼj txqantl. Axpe ikx jaʼlo kukx in nok tilil wuʼne tuʼn tkyaj ntzaqpiʼne junjuntl nmode nya bʼaʼn. Noqtzun tuʼnj, chjonte te Jehová mas bʼaʼn atine jaʼlo. Tej tikʼ qaq xjaw in chin xnaqʼtzaʼne tiʼj Tyol Dios jaw aʼ nwiʼye, moqa in bʼyane, ex in oke te testigo de Jehová toj 1997.

Tej otoqxi jaw aʼ nwiʼye, in kubʼ mojeʼye tukʼil jun txin Barbara tbʼi aju ax ikx tzmatoq chʼin ambʼil toklen te testigo de Jehová. Jun kyxol qe wamiwe e ten ojtxe ok ten xnaqʼtzal tiʼj Tyol Dios tej tok tqʼoʼn twitz tiʼj nimku chʼixpubʼil otoq bʼant wuʼne. Toj ambʼil jaʼlo, o che ok te testigo de Jehová junx tukʼil tanabʼ. Ax ikx bʼantju tuʼn terman nyaʼye, iqʼintoq mas te 80 abʼqʼi tuʼn tej t-xnaqʼtzan tiʼj Tyol Dios ex tej tbʼet ambʼil jaw aʼ twiʼ.

Toj ambʼil jaʼlo ansyan qine toj ttnam Dios, ex in nel qpaʼne nim ambʼil junx tukʼe nxuʼjile tuʼn qpakbʼane kye xjal in che yolin toj yol italiano toj tnam Londres. At maj in tzaj nbʼise aj ttzaj nnaʼne wanqʼibʼile ojtxe, noqtzun tuʼnj, kukx in tzaj qʼuqbʼaʼn nkʼuʼje tuʼn Barbara. Tuʼntzunju, ma tzaj qʼoʼn aju ximintoq wuʼne tuʼn tten weʼye: tbʼanel wanqʼibʼile kyukʼil toj njaye ex at jun Ntate kʼujlaʼn qiʼne tuʼn. Xi nqanine jun abʼqʼi tzalajbʼil te Dios ex mujbʼabʼil, noqtzun tuʼnj, mas nim o tzaj tqʼoʼn weʼye.