TBʼI XNAQʼTZBʼIL TOK TIʼJ T-XKʼOMIL
¿Tiquʼn kyim Jesús ex ikʼx nim kʼixkʼoj tuʼn?
«Kyjaʼtzun, ik tzaʼn noq tuʼn jun xinaq okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal tuʼnju kykyaqil e bʼinchan il» (Romanos 5:12).
¿Tajbʼil teya tuʼn tanqʼina te jumajx? Nim xjal jaku tzaj kytzaqʼweʼn qa kyaj, noqtzun tuʼnj, in kubʼ kyximen qa mlayx bʼant jlu. Tuʼnju aj in kyim jun xjal, atztzun bʼajsbʼil te tkyaqil tanqʼibʼil.
Noqtzun tuʼnj, yajtzun qa junxitl tten xi qqanin xjel, ¿bʼantnipe ttena tuʼn tkyima? Ik tzeʼn in bʼaj jaʼlo, jakulo tzaj kyqʼamaʼn xjal qa nya bʼantni kyten. ¿Tiʼ in tzaj t-xnaqʼtzaʼn jlu? Qa aju qajbʼil, aju tuʼn kukx qanqʼin maske in qo ok weʼ twitz nimku nya bʼaʼn. In tzaj tqʼamaʼn Tyol Dios qa e kubʼ tbʼinchaʼn Dios qe xjal tukʼil kyajbʼil tuʼn kyanqʼin. Tuʼntzunju, tqʼama jlu: «Ax ikx xi tqʼoʼn Dios kynabʼl xjal tuʼn tel kynikʼ tiʼj ju at te jumajx» (Eclesiastés 3:11).
Ax tok, kykyaqil xjal in che kyim. ¿Tiʼtzun nya bʼaʼn bʼant? ¿Ope bʼant jun tiʼ tuʼn Dios tuʼn tkyaj nya bʼaʼn lu toj ttxolil? In tzaj tqʼamaʼn Tyol Dios jun tbʼanel tqanil, ax ikx in tzaj tqʼamaʼn tiquʼn kyim Jesús ex ikʼx nim kʼixkʼoj tuʼn.
¿TIʼTZUN NYA BʼAʼN BʼANT?
Aʼyeju tnejel oxe capítulo te uʼj Génesis toj Tyol Dios in tzaj tqʼamaʼn qa kubʼ tqʼoʼn Dios tnejel mejebʼleʼn, Adán ex Eva, tuʼn kyanqʼin te jumajx ex xi tqʼamaʼn kye tiʼtoq il tiʼj tuʼn tbʼant kyuʼn. Aʼyeju txʼolbʼabʼil in che yolin tiʼj alkye tten ya mintiʼtl xi kyniman Dios ex xi naj aju tuʼn kyanqʼin te jumajx. In tzaj chikʼbʼaʼn jlu toj jun tten nya kwest, tuʼnju nya kwest in kubʼ kyximen junjun qa noq jun txʼolbʼabʼil jlu. Noqtzun tuʼnj, aju uʼj te Génesis, ik tten ik tzeʼn qeju kyaje uʼj in che yolin tiʼj tanqʼibʼil Jesús, in tzaj kyqʼon tkyaqil tqanil tiʼjju bʼaj, aʼyeju txʼolbʼabʼil e kyaj tzʼibʼin jaku tzʼok qeʼ qkʼuʼj kyiʼj. *
¿Tiʼ o tzaj tuʼnju il kubʼ tbʼinchaʼn Adán? In tzaj ttzaqʼweʼn Tyol Dios jlu: «Kyjaʼtzun, ik tzaʼn noq tuʼn jun xinaq [Adán] okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal tuʼnju kykyaqil e bʼinchan il» (Romanos 5:12). Kubʼ tbʼinchaʼn Adán il tej mintiʼ xi tbʼiʼn aju tzaj tqʼamaʼn Dios te. Iktzun tten xi tnajsaʼn aju tuʼn tanqʼin te jumajx, tej tbʼet ambʼil tijin ex kyim. Tuʼnju tiyjil, moqa tyajil Adán qoʼ, ax ikx qe jaku kubʼ qbʼinchaʼn il. Tuʼntzunju, in qo yabʼti, in qo tijin ex in qo kyim. Aju tqanil tiʼj tiquʼn in qo kyim, in xi qnimen tuʼnju in nel qnikʼ tiʼj jaʼlo aju il kyaj qʼoʼn qiʼj. Noqtzun tuʼnj, ¿ope bʼant jun tiʼ tuʼn Dios tuʼn tkyaj bʼant nya bʼaʼn lu ttxolil?
¿TIʼ BʼANT TUʼN DIOS?
Kubʼ t-ximen Jehová tuʼn tkyaj nya bʼaʼn lu toj ttxolil, moqa tuʼn tchjet aju xi tnajsaʼn Adán kye qe tiyjil, moqa tyajil, aju tuʼn kyanqʼin te jumajx. ¿Alkye tten bʼant jlu tuʼn Dios?
In tzaj tqʼamaʼn Tyol Dios jlu toj Romanos 6:23: «Porque aju chojbʼil qe in tzaj tqʼoʼn il, atzun tuʼn qkyim». A t-xilen jlu, qa aju chojbʼil in tzaj tqʼoʼn il aju kyimen. Kubʼ tbʼinchaʼn Adán il, tuʼntzunju kyim. Ax ikx qe aj il qoʼ, ex toj juntl yol, atoʼkx tjaqʼ chojbʼil in tzaj tqʼoʼn il, aju tuʼn qkyim. Noqtzun tuʼnj, nya a qoʼ at qpaj tiʼj, tuʼnju ya aj il qoʼ aj qul itzʼje. Tuʼnju tkʼujlabʼil Dios tzaj tsamaʼn Tkʼwaʼl, a Jesús, tuʼn «tchjet» qil, ¿alkye tten chjet jlu tuʼn?
Tuʼnju kyim Jesús, o tzaj qʼoʼn ambʼil qe qa jaku qo anqʼin te jumajx toj tzalajbʼil.
Atxix tiʼj tnejel xjal, aju xjal tzʼaqli Adán, oktz il ex kyimen noq tuʼnju mintiʼ xi tbʼiʼn aju tzaj tqʼamaʼn Dios te, iltoq tiʼj jun xjal tzʼaqli ajxi tkyim tuʼntzun tchjet aju il. In tzaj tqʼamaʼn Tyol Dios jlu: «Porque ik tzaʼn e ok nimku xjal aj il noq tuʼn tlaj jun xinaq mintiʼ xi tniman tyol Dios, ax ikxtzun nimku xjal ok che okel te tzʼaqlxix tuʼn Dios noq tuʼn jun xinaq xi tniman tyol Dios» (Romanos 5:19). A Jesús ok te «jun xinaq» moqa jun xjal. Kyaj tqʼoʼn tnajbʼil toj kyaʼj, oktzun te jun xjal tzʼaqli *, ex kyim tuʼn qpaj. Tuʼn jlu, o tzaj qʼoʼn ambʼil qe tuʼn qok tqʼoʼn Dios te tzʼaqli ex tuʼn tten juntl maj qchwinqlal te jumajx.
¿TIQUʼN KYIM JESÚS EX IKʼX NIM KʼIXKʼOJ TUʼN?
Noqtzun tuʼnj, ¿tiquʼn iltoq tiʼj tuʼn tkyim Jesús tuʼn tbʼant jlu? ¿Mlaytoqpe bʼant tuʼn Dios tuʼn tkubʼ naj aju t-ximbʼetz tnejel ex tuʼn ttzaj tqʼoʼn ambʼil kye tyajil Adán tuʼn kyanqʼin te jumajx? Ax tok, at toklen tuʼn tbʼant jlu tuʼn. Noqtzun tuʼnj, mintiʼwtlo japun Tley qa tuʼn il in tzaj kamik. Ex a jlu mintiʼ in yolin tiʼj jun Ley aju jaku chʼexpaj qa jaku bʼant. In yolin tiʼj jun Ley nimxix toklen tuʼntzun tbʼinchet aju tzʼaqli (Salmo 37:28).
Noqwit mintiʼ japun tuʼn Dios aju otoq tzaj tqʼamaʼn toj ambʼil aju, kukxwitlo in kubʼ qxjelin qa ok kbʼantel juntl maj jlu tuʼn Dios. Jun techel, ¿bʼaʼnpetzulo tuʼn tkubʼ ximet alkyeqe kyxol tyajil, Adán jaku che anqʼin te jumajx? ¿Jakupetzulo tzʼok qeʼ qkʼuʼj tiʼjju in tzaj ttziyen? Tuʼnju japun tuʼn Dios aju Tley te kolbʼil qe, jaʼlo qʼuqlixix qkʼuʼj qa kukx kxel tbʼinchaʼn aju tzʼaqli.
Tuʼnju kyim Jesús, o tzaj tqʼoʼn Dios qʼuqbʼil qkʼuʼj tuʼn qanqʼin te jumajx toj Tbʼanel Najbʼil tzalu twitz Txʼotxʼ. Ximana tiʼjju tqʼama Jesús: «Tuʼnju nimxix tkʼujlalil Dios kyiʼj xjal, kyjaʼtzun ma chin tzaj samaʼne tuʼn, aqine oʼkxku jun Tkʼwaʼl, tuʼntzun miʼn kynaj kykyaqil qeju ma che okslan wiʼje, noq oʼkx tuʼn tten kychwinqlal te jumajx» (Juan 3:16). Kyim Jesús, nya noq tuʼn tjapun yol, sino, aju mas nim toklen, tuʼnju nimxix kʼujlaʼn qoʼ tuʼn.
Noqtzun tuʼnj, ¿tiquʼn iltoq tiʼj tuʼn Jesús tukʼe nimxix kʼixkʼoj? Tuʼnju kubʼ tiʼj tkyaqil nya bʼaʼn tuʼn aju ok weʼ twitz ex kukx ten tzʼaqli, ex nim maj kubʼ kyiʼj ttramp Satanás tuʼn, tuʼnju otoq tqʼama Satanás qa mlay che ten xjal tzʼaqli twitz Dios aj kyok weʼ twitz nya bʼaʼn (Job 2:4, 5). Aju tramp lu bʼaʼn ela toj twitz Satanás tej otoqxi kubʼ tzʼaq Adán toj il. Noqtzun tuʼnj, a Jesús ok te t-xel Adán tzʼaqli, kukx ajbʼen te Dios maske ok weʼ twitz nim nya bʼaʼn (1 Corintios 15:45). Iktzun tten kubʼ tyekʼun Jesús qa ax ikx te Adán jakutoq bʼant tuʼn kukx tajbʼen te Dios noqwit jaw tjyoʼn. Ax ikx kubʼ tqʼoʼn Jesús jun techel qwitz qa jaku qo ajbʼen te Dios aj qok weʼ twitz nya bʼaʼn (1 Pedro 2:21). Tuʼnju kukx ajbʼen Jesús te Jehová, xi qʼoʼn tchwinqlal te jumajx toj kyaʼj.
¿TIʼ TBʼANEL JAKU TZAJ TKʼAMOʼNA?
Ax tok o kyim Jesús. Ex tuʼn jlu o tzaj qʼoʼn ambʼil qe qa jaku qo anqʼin te jumajx. ¿Tajbʼil teya tuʼn tanqʼina te jumajx? Tqʼama Jesús tiʼ il tiʼj tuʼn tbʼant: «Ex atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok, ex tuʼn wojtzqinjtze kyuʼn, aqine Jesucrist ma chin tzaj t-samaʼna» (Juan 17:3).
Aʼyeju bʼinchal uʼj lu in che txoken tiʼja tuʼn tel tnikʼa tiʼj Jehová, aju Dios axix tok, ex tiʼj Tkʼwaʼl Jesucristo. Aʼyeju testigos de Jehová in che anqʼin jatumel najliya, ok che tzalajel aj kypon visitaril teya. Ax ikx jaku kanet txqantl onbʼil tuʼna qa ma tzʼokxa toj qtembʼil toj www.pr418.com/mam.
^ taqik' 8 Jyonkuxa xnaqʼtzbʼil «Carácter histórico de Génesis», tjaqʼxi jatumel in tzaj tqʼamaʼn «Génesis, Libro de», toj uʼj Perspicacia para comprender las Escrituras volumen 1, t-xaq 1017, aju bʼinchaʼn kyuʼn testigos de Jehová. Jaku kanet tuʼna toj jw.org (jaku tzʼokxa toj PUBLICACIONES > BIBLIOTECA EN LÍNEA).
^ taqik' 13 Ok tqʼoʼn Dios tanqʼibʼil Tkʼwaʼl toj talbʼil María tuʼn tul itzʼji tzalu twitz Txʼotxʼ ex ok xqʼuqin tuʼn xewbʼaj xjan tuʼn miʼn tok te aj il ik tzeʼn María aju ttxuʼ (Lucas 1:31, 35).