QʼIʼNTOQ junlo 365 abʼqʼi tuʼn Enoc, kyaje maj mas nim twitzju anqʼibʼil in kubʼ qximen jaʼlo. Maske kwest tuʼn t-xi qnimen, toj ambʼil aju, nyatoq tij jun xjal qa iktoq tabʼqʼi. Ma tzʼel 5,000 abʼqʼi, mastoq nim ambʼil in che anqʼin xjal ik tzeʼn jaʼlo. Jun techel, aju tnejel xinaq, moqa ichan, Adán ya otoq tzʼel mas te 600 abʼqʼi tuʼn tej tul itzʼji Enoc ex anqʼin juntl 300 abʼqʼi, axpe ikx ateʼ junjun tyajil, moqa tiyjil, e anqʼin mas nim ambʼil twitz. Naʼmxtoq ttijen Enoc tej tjapun te 365 abʼqʼi, atxtoq nim ambʼil tuʼn tanqʼin. Noqtzun tuʼnj, ya mlaytoq tzʼanqʼin mastl ambʼil.

Bʼalo kyajtoq xjal tuʼn tkubʼ kybʼyoʼn. Jaku kubʼ qximen lu Enoc in nel oq, kwest tuʼn tetz tiʼn toj twiʼ aju kymod xjal kubʼ kyyekʼun tej t-xi tqʼamaʼn tqanil kye, aju xi tqʼoʼn Dios te. Qʼanchaʼlxix toj kywitz qa in che qʼojin wen. Aʼyeju xjal in neltoq kyikʼun Enoc, nyatoq kyaj tuʼn tok kybʼiʼn tqanil ex in che ikʼuntoq tiʼj Dios aju otoq txi samante. Ax tok, mlaytoq che ok tzoqpaj tiʼj Jehová aju Tdios Enoc, pero jakutoq che ok tzoqpaj tiʼj Enoc aju qʼol tqanil. In kubʼlo t-xjelin Enoc qa kʼokel tqʼoʼn juntl maj twitz kyiʼj toj tja. ¿Ximinpe tiʼj t-xuʼjil ex kyiʼj tmyal? ¿Tiʼj Matusalén aju tkʼwaʼl? ¿Moqa tiʼj tchman aju Lamec? (Génesis 5:21-23, 25). ¿Atzpe tuʼn tpon bʼaj tkyaqil tanqʼibʼil Enoc?

Mintiʼxix ojtzqiʼn tkyaqil quʼn tiʼj xjal lu in yolin Tyol Dios tiʼj. Tuʼnju oʼkx oxe maj in yolin Tyol Dios tiʼj toj chʼin ambʼil (Génesis 5:21-24; Hebreos 11:5; Judas 14, 15). Maske ikju, aʼyeju junjun taqikʼ Tyol Dios lu in che onin nim qiʼj tuʼn tok qojtzqiʼn tzeʼnxix Enoc aju ten qʼuqbʼil tkʼuʼj. ¿Ateʼ toj tjaya tuʼn t-xi tqʼoʼna aju at tajbʼen kye? ¿Moqa o kolina jun maj tiʼjju bʼiʼn tuʼna qa bʼaʼn? Qa ikju, jaku tzʼel tiʼna nim xnaqʼtzbʼil tiʼj nim qʼuqbʼil tkʼuʼj Enoc.

Attoq nim nya bʼaʼn toj tqʼijlalil Enoc. Ax tok, aʼyeju xjal —aju twuqin kʼloj kyyajil xjal ten tiʼjxi Adán— mas niqayin ateʼtoq tiʼj chwinqlal tzʼaqli otoq t-xi t-najsaʼn Adán tukʼil Eva, tuʼntzunju in che anqʼintoq mas abʼqʼi. Noqtzun tuʼnj, nya tbʼaneltoq kymod ex mintiʼtoqtl in che ajbʼen te Dios. Nimtoq in che bʼiyen xjal, aju otoq tzaj tzyet toj tkabʼin kʼloj kyyajil xjal, tej tkubʼ bʼyoʼn Abel tuʼn Caín. Axpe ikx, jun kyxol tyajil Caín jaw tnimsan tibʼ ex mastoq nya bʼaʼn tmod ik tzeʼn te Caín. Toj toxin kʼloj kyyajil xjal ten juntl akʼaj tten nya bʼaʼn. «Ajbʼen tbʼi Qman [Jehová, TNM] kyuʼn» xjal, noqtzun tuʼnj, nya tuʼn kykʼulun twitz. In najbʼentoq aju tbʼi Dios xjan kyuʼn tuʼn kyyolin nya bʼaʼn tiʼj (Génesis 4:8, 23-26).

Aju tten kʼulbʼil nya ax tok lu in bʼanttoq kyuʼn kykyaqil xjal toj ambʼil aju. Tuʼntzunju, jaw tjyoʼn Enoc alkye tuʼn tbʼant tuʼn. ¿Okpe kʼokel ik tzeʼn txqantl xjal? ¿Moqa kjyoltoq tiʼj Jehová, aju Dios axix tok, aju otoq kubʼ bʼinchante kyaʼj ex Txʼotxʼ? Nimlo onin techel Abel tiʼj, aju otoq kyim tuʼn tpaj in kʼulun te Jehová ik tzeʼn tajbʼil. Kubʼ t-ximen Enoc tuʼn tel tkanoʼn qʼuqbʼil tkʼuʼj. Toj Génesis 5:22 in jaw quʼjin jlu: «Bʼettl Enoc tukʼil Dios». Aju  yol lu in nok tqʼoʼn toklen Enoc ik tzeʼn jun xinaq in nimen te Jehová kyxol xjal in kubʼ kybʼinchaʼn nya bʼaʼn. A Enoc tnejel xjal in tzaj tqʼamaʼn Tyol Dios jlu tiʼj.

Ax taqikʼ Tyol Dios lu in tzaj tqʼamaʼn qa kukx bʼet Enoc tukʼil Jehová tej tul itzʼji Matusalén aju tkʼwaʼl. Tej iqʼinlo 65 abʼqʼi tuʼn Enoc ok te mambʼaj. Maske mintiʼ in tzaj tqʼamaʼn Tyol Dios aju tbʼi t-xuʼjil ex jteʼ tkʼwaʼl ul itzʼji, ojtzqiʼn quʼn qa kubʼ mojeʼ ex qa e «ul itzʼjtl tkyʼajal ex tmeʼjel». Tuʼn t-xi qʼamet qa in bʼet jun mambʼaj tukʼil Dios, akux in xi tqʼoʼn aju at tajbʼen kye toj tja, il tiʼj tuʼn kyok t-xqʼuqin toj tja ik tzeʼn tajbʼil Dios. Ojtzqiʼntoq tuʼn Enoc qa tajbʼiltoq Jehová tuʼn tten tzʼaqli tukʼil t-xuʼjil (Génesis 2:24). Ex bʼalo ok tilil tuʼn tuʼn kyxi t-xnaqʼtzaʼn tkʼwaʼl tuʼn tok kykʼujlaʼn Jehová. ¿Tiʼ tzaj tuʼn jlu?

Mintiʼ in tzaj tqʼamaʼn Tyol Dios nimxix tiʼchaq. Axpe ikx mintiʼ in tzaj tqʼamaʼn tiʼj qʼuqbʼil tkʼuʼj Matusalén aju tkʼwaʼl Enoc, aju xjal in yolin Tyol Dios tiʼj aju anqʼin mas nim ambʼil ex kyim toj ax abʼqʼi tej ttzaj Nim Jbʼal. Noqtzun tuʼnj, ojtzqiʼn quʼn qa ten nimxix qʼuqbʼil tkʼuʼj Lamec aju tchman Enoc, a jlu tkʼwaʼl Matusalén, aju anqʼin mas te 100 abʼqʼi toj ax ambʼil tukʼil Enoc. Ajbʼen Lamec tuʼn Jehová tuʼn tkyaj tqʼamaʼn jun yol tiʼj Noé aju tkʼwaʼl ex japun twiʼ tej otoq bʼaj Nim Jbʼal. Ax ikx ok ojtzqiʼn Noé ik tzeʼn jun xjal in bʼet tukʼil Dios ik tzeʼn te Enoc aju t-xka chman. Maske mintiʼ ok kyojtzqiʼn kyibʼ, kyaj tqʼoʼn Enoc jun tbʼanel techel te Noé. Bʼalo ok tojtzqiʼn tuʼn Lamec aju tman moqa tuʼn Matusalén aju tchman moqa tuʼn Jared aju tman Enoc, aju kyim tej iqʼintoq 366 abʼqʼi tuʼn Noé (Génesis 5:25-29; 6:9; 9:1).

Junxitl te Enoc twitz Adán. Maske ok Adán te jun xjal tzʼaqli, kubʼ tbʼinchaʼn il twitz Jehová ex kyaj tqʼoʼn nimxix nya bʼaʼn kyibʼaj tyajil. Atzun te Enoc, maske nya tzʼaqli te, bʼet tukʼil Dios ex kyaj tqʼoʼn jun tbʼanel techel tiʼj qʼuqbʼil tkʼuʼj kye tyajil. Kyim Adán tej iqʼintoq 308 abʼqʼi tuʼn Enoc. ¿Tzajpe kybʼis toj tja tiʼj tej tkyim tuʼnju oʼkx ximen tiʼjx? Mintiʼ ojtzqiʼn quʼn. Noqtzun tuʼnj, kukx «bʼet Enoc tukʼil Dios» (Génesis 5:24).

Qa ateʼ teya toj tja, aju techel tiʼj qʼuqbʼil tkʼuʼj Enoc jaku tzʼonin tiʼja. Nim toklen tuʼn t-xi qqʼoʼn aju at tajbʼen kye toj qja, noqtzun tuʼnj, mas nim toklen tuʼn qonin kyiʼj tuʼn tten jun kyamiwbʼil tukʼil Dios (1 Timoteo 5:8). Tuʼn tbʼant jlu, il tiʼj tuʼn tten tbʼinchbʼena tukʼilju in xi tqʼamaʼna. Qa ma kubʼ t-ximana tuʼn tbʼeta tukʼil Dios ik tzeʼn te Enoc ex tuʼn kyxi tnimana qe tkawbʼil, ax ikx teya kyjel tqʼoʼna jun tbʼanel techel tiʼj qʼuqbʼil tkʼuʼja kye toj tjaya.

Tuʼnju ten qʼuqbʼil tkʼuʼj Enoc, bʼalo kubʼ tnaʼn qa tjunalx in nanqʼin kyxol xjal in kubʼ kybʼinchaʼn nim nya bʼaʼn. Noqtzun tuʼnj, ¿elpe tnikʼ Jehová tiʼjju in bʼajtoq tiʼj? El tnikʼ tiʼj. Jun qʼij, yolin Jehová tukʼil tmajen tzʼaqli tuʼn t-xi tqʼamaʼn jun tqanil kye xjal toj ambʼil aju. Tuʼn jlu ok tqʼoʼn Jehová toklen Enoc te t-sanjel. A Enoc ok te tnejel t-sanjel Dios ex in kanet toj Xjan Uʼj aju tqanil tqʼama.  Ojtzqiʼn quʼn tuʼnju tej tikʼ nim abʼqʼi kubʼ ttzʼibʼin Judas, aju medio terman Jesús, qe yol xi tqʼamaʼn Enoc kye xjal. *

¿Tiʼ kyaj tqʼamaʼn Enoc? Tqʼama jlu: «Lu tzul Qman kyukʼix qe t-anjel xjan nimxix kyajlal. Tzul Qman qʼol jwisi kyibʼaj kykyaqil ex tuʼn tel tuj qʼanchaʼl kybʼinchbʼen xjal mya nimal Dios qe ex mya bʼaʼn kybʼinchbʼen, ex tuʼn tel tuj qʼanchaʼl kyyol qe aj il mya nimal Dios qe, aqeju ma che yolin kyuw tiʼj Qman» (Judas 14, 15). Bʼalo mas in nok tqʼoʼn twiʼya tiʼj qa yolin Enoc ik tzeʼn ya otoq tzikʼ aju yol kyaj tqʼamaʼn, ik tten jlu ik tzeʼn otoq bʼant tuʼn Dios. Atzun jun tten jlu kyaj kyqʼamaʼn t-sanjel Dios nim yol. Qa ma txi kyqʼamaʼn jlu, in tzaj tyekʼun qa ax tok kjapuneltoq twiʼ yol ex jakutoq che yolin tiʼj ik tzeʼn otoq japun twiʼ (Isaías 46:10).

Bʼalo iltoq tiʼj tuʼn t-xi tqʼamaʼn Enoc tqanil lu kye kykyaqil xjal. ¿Tiʼ kubʼ tnaʼn tuʼn jlu? Qʼonka twitza tiʼjju tqanil xi tqʼamaʼn. Nim maj xi tqʼamaʼn yol «mya nimal Dios qe» tuʼn ttzaj tyekʼun aju nya bʼaʼn kybʼinchbʼen. Aju yol lu in tzaj tqʼamaʼntoq qa aʼyeju xjal otoq che ten tej ttzaj tzyet nya bʼaʼn toj Edén, puro nya bʼaʼn qetoq ex oktoq che kbʼel najsaʼn. Oktoq che kbʼel tnajsaʼn Jehová kyukʼil «qe t-anjel xjan nimxix kyajlal», toj juntl yol aju kʼloj t-anjel bʼinchan kyten tuʼn kyqʼojin. Mintiʼ tzaj xobʼ Enoc tuʼn t-xi tqʼamaʼn tqanil lu, ex bʼant tuʼn tjunalx. Tuʼntzunju, mlay qo jaw labʼin tiʼj qa ok tqʼoʼn Lamec toklen tchman ex jaw labʼin tiʼj tuʼnju mintiʼ tzaj xobʼ.

Aj qximen tiʼj qʼuqbʼil tkʼuʼj Enoc, jaku kubʼ qxjelin qa ik in che ok qkeʼyin xjal ik tzeʼn in che ok tkeʼyin Jehová. Aju tqanil pakbʼan Enoc tiʼj kukx in bʼant jaʼlo ik tzeʼn toj ambʼil tej tten. Aju tqanil xi tpakbʼan Enoc japun twiʼ tej ttzaj tiʼn Jehová Nim Jbʼal ex tej kykubʼ tnajsaʼn tkyaqil xjal nya bʼaʼn toj tqʼijlalil Noé. A jlu jun yekʼbʼil tiʼjju matij xitbʼil chʼix tul (Mateo 24:38, 39; 2 Pedro 2:4-6). Toj ambʼil jaʼlo, ax ikx o bʼant tten Dios tuʼn tok tzoqpaj junx kyukʼil «qe t-anjel xjan nimxix kyajlal» ex tuʼn tkubʼ tqʼoʼn kysentens xjal nya bʼaʼn. Qqʼonk toklen tqanil pakbʼan Enoc tiʼj ex qqʼamanx kye txqantl xjal. Atlo junjun maj jaku kubʼ qnaʼn qa qjunalx atoʼ tuʼnju mintiʼ in che onin qe toj qja qiʼj ex qe qamiw. Noqtzun tuʼnj, mintiʼ kyaj tzaqpiʼn Enoc tuʼn Jehová ex mlay che kyaj ttzaqpiʼn qeju kukx in che ajbʼen te.

¿Alkye tten kyim Enoc? Jaku txi qqʼamaʼn qa mintiʼxix ojtzqiʼn quʼn tzeʼn kyim twitzju tanqʼibʼil. Toj txʼolbʼabʼil te Génesis oʼkx in tzaj qʼamaʼn jlu: «Tuʼntzunjuʼ anqʼin Enok kseʼnxjuʼ tajbʼil Dyos, naq kubʼnaj, quʼn ax Dyos xiʼ iqʼinte» (Génesis 5:24, XT). ¿Alkye tten xi tiʼn Dios Enoc? Tzaj tchikʼbʼaʼn apóstol Pablo yajxitl tej tqʼama jlu: «Tuʼn tokslabʼl Enok xiqʼiʼn tuʼn Dyos itzʼ ex min kyim, ex min okyaljuʼ t-xmilal, quʼn akuʼ Dyos xiqʼinte. Ex intmaʼn toj Tuʼjil tyol Dyos, qa intoq tzalaj Dyos tiʼj Enok tej naʼmxtoq txiqʼiʼn» (Hebreos 11:5, XT). ¿Tiʼtoq tajbʼil Pablo tuʼn ttzaj tqʼamaʼn kyukʼil qe yol «xiqʼiʼn tuʼn Dyos itzʼ ex min kyim»? Ateʼ junjun traducción tiʼj Tyol Dios in tzaj kyqʼamaʼn qa xi tiʼn Dios Enoc toj kyaʼj, noqtzun tuʼnj, mlay bʼaj jlu tuʼnju in tzaj tqʼamaʼn Tyol Dios qa a Jesús tnejel xjal jaw anqʼin tuʼn t-xiʼ toj kyaʼj (Juan 3:13).

Tuʼntzunju, ¿alkye tten «xiqʼiʼn tuʼn Dyos itzʼ ex min kyim»? Bʼalo a Jehová el qʼinte tchwinqlal Enoc tuʼntzun miʼn kubʼ tnaʼn kʼixkʼoj. Iktzun tten  mi jun xjal ok tbʼinchaʼn nya bʼaʼn tiʼj. Noqtzun tuʼnj, ¿alkye tten el tnikʼ Enoc tej chʼixtoq tkyim qa «tzalaj Dyos tiʼj»? Bʼalo xi tqʼoʼn Dios ambʼil te Enoc toj jun twitzikʼ tuʼn tok tqʼoʼn twitz tiʼj Txʼotxʼ aj tok te jun tbʼanel najbʼil. Tej tel tnikʼ Enoc tiʼj yekʼbʼil lu qa in tzalaj Jehová tiʼj, kyim. Yolin apóstol Pablo tiʼj Enoc ex kyiʼj junjuntl xinaq, xuʼj, moqa qya, aʼyeju kukx e ajbʼen te Dios, ex kubʼ ttzʼibʼin jlu: «Kykyaqil qe jlu e kyim tuj kyokslabʼl» (Hebreos 11:13). Tej tkyim, bʼalo e jyon qe xjal nya bʼaʼn tiʼj t-xmilal, noqtzun tuʼnj, mintiʼ kanet kyuʼn tuʼnlo a Jehová kubʼ najsante. Iktzun tten mintiʼ xi tqʼoʼn Jehová ambʼil tuʼn tok kybʼinchaʼn xjal nya bʼaʼn tiʼj t-xmilal Enoc moqa tuʼn tajbʼen kyuʼn toj okslabʼil nya ax tok. *

Tuʼn tkyaqil jlu, jaku qo ximen tiʼj tzeʼn ok tanqʼibʼil Enoc tej chʼixtoq tkyim. Ximana tiʼj jlu, noqtzun tuʼnj, naʼntza qa nya ax tok. In nel oq Enoc ex chʼix tbʼaj tipumal. Lepchiqex txqan xjal tiʼj aʼyeju ma tzaj kyqʼoj tuʼnju tqanil ma tzʼok kybʼiʼn. Jaʼlo, ma kanet jun lugar tuʼn Enoc jatumel tuʼn tokx tewin tibʼ ex tuʼn tojlan, ex in nel tnikʼ tiʼj qa chʼix tjyet kyuʼn xjal. Ojtzqiʼn tuʼn qa kbʼel kybʼyoʼn ex mlay tzaj qʼaqʼin kykʼuʼj tiʼj. Akux in qeʼ tanmi, in naʼn Dios. Tuʼn jlu, in kubʼ tnaʼn chewsabʼil toj tanmi ex in nok tqʼoʼn twitz tiʼj jun witzikʼ toj jun lugar najchaq.

Toj witzikʼ lu in nok tqʼoʼn twitz tiʼj jun txʼotxʼ junxitl twitzju jatumel in nanqʼin. Tbʼanel in nela toj twitz ik tzeʼn tbʼanel najbʼil te Edén, noqtzun tuʼnj, mintiʼ qe querubín in che xqʼuqin tuʼn miʼn kyokx xjal toj. In nok tqʼoʼn twitz kyiʼj nim xjal at jun tbʼanel kyanqʼibʼil ex at kyipumal. Kykyaqil in che anqʼin toj mujbʼabʼil. Mintiʼtl ikʼbʼil ex aju ikʼbʼil in nok bʼinchaʼn kyiʼj okslal ik tzeʼn ikʼx tuʼn Enoc. Noq tuʼn witzikʼ lu, jaʼlo qʼuqli tkʼuʼj Enoc tiʼj qa kʼujlaʼn tuʼn Jehová ex qa in tzalaj tiʼj. Bʼiʼn tuʼn qa a jlu atzun ttembʼilju, qa atztzun knajal. Akux in kubʼ tnaʼn mujbʼabʼil, in kubʼ tjupuʼn Enoc twitz ex in kyim.

Atxix toj ambʼil aju kukx in jtan toj kyimen, atz taʼ toj tnabʼil Jehová aju mintiʼ bʼajsbʼil te. Ik tzeʼn tzaj ttziyen Jesús yajxitl, kpol qʼij jatumel kʼokel kybʼin qeju ateʼ toj tnabʼil Dios tqʼajqʼojil twiʼ Jesús, che eletz toj muqbʼil ex che jawil anqʼin juntl maj toj jun tbʼanel najbʼil jatumel ktel txubʼtxaj (Juan 5:28, 29).

¿Tajbʼil teya tuʼn ttena atz? ¡Tbʼanelxix qa ma tzʼok qojtzqiʼn Enoc! Ximana tiʼj nim tiʼchaq tbʼanel jaku tzʼel qkanoʼn tiʼj. Ktzajel tqʼamaʼn qe qa ik bʼaj tiʼj tej chʼixtoq tkyim ik tzeʼn in kubʼ qximen. Noqtzun tuʼnj, at jun il tiʼj tuʼn tel qkanoʼn tiʼj Enoc toj ambʼil jaʼlo. Tej tyolin apóstol Pablo tiʼj Enoc, tqʼama «qa mintiʼ qokslabʼl mlayx tzalaj Dios qiʼj» (Hebreos 11:6). ¡Jun tiquʼn nim toklen tuʼn tel qkanoʼn tiʼj qʼuqbʼil tkʼuʼj Enoc tej mintiʼ tzaj xobʼ!