Aju Tyol Dios, nya noq alkyexku uʼj. Toj uʼj lu jaku kanet tbʼanel nabʼil quʼn tzajni tukʼil Bʼinchal tkyaqil (2 Timoteo 3:16). Aju tqanil tkuʼx toj, jaku tzʼonin tiʼja. Ax Xjan Uʼj in tzaj qʼamante: «Aju tyol Dios itzʼte ex at tipumal» (Hebreos 4:12). Aju uʼj lu at tipumal tuʼn tonin tiʼj tanqʼibʼila toj kabʼe tten: in tzaj tqʼoʼn tnabʼila te tkyaqil qʼij ex in nonin tiʼja tuʼn tok tojtzqiʼna Dios ex qeju ttziybʼil (1 Timoteo 4:8; Santiago 4:8).

In tzaj tqʼoʼn nabʼil qe toj qanqʼibʼil tkyaqil qʼij. In tzaj tqʼoʼn Tyol Dios nabʼil teyele junjun xjal ex junxichaq xnaqʼtzbʼil.

• Tuʼn tten tbʼanel qxol kyukʼil txqantl (Efesios 4:31, 32; 5:22, 25, 28, 33).

• Tuʼn tten tbʼanel qxmilal ex tbʼanel qximbʼetz (Salmo 37:8; Proverbios 17:22).

• Tuʼn tel qnikʼ tiʼj bʼaʼn ex tiʼj nya bʼaʼn (1 Corintios 6:9, 10).

•   Aju at toklen tukʼil pwaq (Proverbios 10:4; 28:19; Efesios 4:28). *

Jun mejebʼleʼn tzma kuʼxun te tnam Asia, el tnikʼ tiʼj qa tbʼanel qe nabʼil ateʼkux toj Tyol Dios. Ik tzeʼn in bʼaj kyiʼj qe tzma in che kubʼ mojeʼ, kwest ela tuʼn kynaqʼet kyxol ex tuʼn kyyolin. Pero kubʼ kyqʼoʼn toj xnaqʼtzbʼil aju jaw kyuʼjin toj Tyol Dios. ¿Tiʼ tzaj tuʼn jlu? Tzaj tqʼamaʼn chmilbʼaj, aju Vicent tbʼi: «Aju jaw wuʼjine toj Tyol Dios onin wiʼje tuʼn t-xi nbʼinchaʼne tiʼj nya bʼaʼn aju tzaj toj qmejebʼleʼne tukʼil kʼujlabʼil. In qo tzalaje tuʼnju e kubʼ qqʼoʼne nabʼil toj xnaqʼtzbʼil». Ax ikx tqʼama t-xuʼjil, aju Annalou tbʼi: «Nim onin qiʼje tej kyjaw quʼjine qe techel toj Tyol Dios. Jaʼlo in chin tzalaje toj nmejebʼleʼne ex in chin tzalaje tuʼnju junx qximbʼetze qkabʼile».

In nonin tuʼn tok qojtzqiʼn Dios. Nya oʼkx yolin Vicent tiʼj tmejebʼleʼn, ax ikx tqʼama jlu: «Tuʼnju in chin uʼjine tiʼj Tyol Dios, in kubʼ nnaʼne qa mas niqayin atine ttxlaj Jehová». Aju yol lu in tzaj tqʼamaʼn jun tiʼ nim toklen: jaku tzʼonin Tyol Dios tiʼja tuʼn tok tojtzqiʼna Dios. Aj tbʼant tuʼna, nya oʼkx che onil nabʼil in tzaj tqʼoʼn Tyol Dios toj tanqʼibʼila, ax ikx kʼokela te tamiw Dios. Ex kʼelel tnikʼa qa in yolin Tyol Dios tiʼj jun tbʼanel ambʼil tzul, jatumel qo tzalajel te jumajx tiʼj qanqʼibʼil axix tok (1 Timoteo 6:19). A jlu, mintiʼ juntl uʼj jaku tzaj qʼamante.

Qa ma txi tzyet tuʼn tuʼjina tiʼj Tyol Dios ex qa ma naqʼeta tiʼj, ax ikx teya jaku ten jun tbʼanel tanqʼibʼila jaʼlo ex tuʼn tok tojtzqiʼnxixa Dios. Ax tok, atlo junjun t-xjela ktel tiʼjju kjawil tuʼjina. Qa ikju, naʼntza aju tbʼanel techel tiʼj jun xjal te Etiopía aju anqʼin malo tzʼel mas te kabʼe mil abʼqʼi. Attoq nim t-xjel xjal lu tiʼj Tyol Dios. Tej t-xi tqanin Felipe te aju t-xnaqʼtzbʼen Jesús qa in neltoq tnikʼ tiʼjju in jaw tuʼjin, tzaj ttzaqʼweʼn jlu: «¿Tzaʼn tten tuʼn tel nnikʼe tiʼj qa mi aʼl jun chikʼbʼalte weye?». * Yajxitl xi tqʼoʼn ambʼil te Felipe aju xnaqʼtzal tuʼn ttzaj onin tuʼn (Hechos 8:30, 31, 34). Ax ikx teya qa taja tuʼn telxix tnikʼa tiʼj Tyol Dios, bʼaʼn tuʼn tkuʼx tnojsaʼna jun formulario toj Internet toj www.pr418.com/mam moqa jaku tzaj ttzʼibʼina qeye toj dirección tkuʼx toj uʼj lu. Ax ikx jaku yolina kyukʼil testigos de Jehová in che anqʼin jatumel najliya moqa jaku txiʼya toj jun Ja te Chmabʼil. In qo txokine tiʼja tuʼn tten jun Tyol Dios tukʼila bʼiʼx jaʼlo ex qʼonxa ambʼil te tuʼn tonin tiʼja tuʼn ten tanqʼibʼila mas tbʼanel.