¿Nimpe toklen tuʼn telxix qnikʼ tiʼj Tyol Dios?
Tej tok tqʼoʼn jun tal txin twitz tiʼj sibʼ in jatz kyoj tchimenea jun fábrica iktoq keʼyin ik tzeʼn muj, kubʼ t-ximen qa jun fábrica jatumel in bʼant muj. Jaku qo jaw tzeʼn aj tel tzpet jun tal kʼwaʼl tiʼj jun tiʼ nya nim toklen ik tzeʼn jlu. Noqtzun tuʼnj, at maj aj qel tzpet jaku tzaj nya bʼaʼn qiʼj toj qanqʼibʼil. Jun techel, qa mintiʼ in nelxix qnikʼ tiʼj jun tqanil tok tiʼj jun qʼanbʼil jaku tzaj nim nya bʼaʼn qiʼj tuʼn.
Qa ma qo el tzpet tiʼjju at toklen tukʼil Tyol Dios, mas nya bʼaʼn jaku tzaj qiʼj. Qo ximen tiʼj jun techel, e ten xjal mintiʼ elxix kynikʼ tiʼj junjun t-xnaqʼtzbʼil Jesús (Juan 6:48-68). Bʼisbʼajilxix, tuʼnju twitzju tuʼn tel kynikʼ tiʼj, el kyikʼun tkyaqilju xi t-xnaqʼtzaʼn Jesús kye.
¿In jaw tuʼjina Tyol Dios tuʼn tkanet onbʼil tuʼna toj? Tbʼanel qa ikju. Noqtzun tuʼnj, ¿bʼiʼn tuʼna qa ateʼ nim xjal junxitl in nok junjun taqikʼ Tyol Dios toj kywiʼ aj tjaw kyuʼjin? Qo xnaqʼtzan tiʼj oxe taqikʼ Tyol Dios aʼyeju junxitl in nok toj kywiʼ xjal.
-
Ateʼ junjun xjal mintiʼxix in nel kynikʼ tiʼj kawbʼil lu: «Xobʼa twitz Dios axix tok». Aju yol lu in najbʼen tzalu toj kastiy jaku tzʼel qnikʼ tiʼj qa il tiʼj tuʼn qtzaj xobʼ twitz Dios (Eclesiastés 12:13, TNM). Noqtzun tuʼnj, nya taj te Dios tuʼn tkubʼ kynaʼn xjal jlu aj kyajbʼen te. In tzaj tqʼamaʼn Dios jlu qe: «Miʼn che xobʼe porque lu qine atine kyukʼile, miʼn bʼaj kykʼuʼje, aqine Kydiose. Kxel nqʼoʼne kyipumale ex chin onile kyiʼje» (Isaías 41:10). Tuʼntzunju, nya taj te Dios tuʼn qtzaj xobʼ twitz, sino tajbʼil tuʼn qjaw labʼin tiʼj ex tuʼn tok qqʼoʼn nim toklen.
-
¿Okpe kbʼel najsaʼn Txʼotxʼ tuʼn qʼaqʼ?
Ateʼ junjuntl xjal junxitl in nok qe yol lu toj kywiʼ: «Tkyaqil bʼanimaj tqʼijlalil tzalu twitz txʼotxʼ [...]: At tqʼijlalil tuʼn qul itzʼj, ex at tqʼijlalil tuʼn qkyim» (Eclesiastés 3:1, 2). In kyqʼamaʼn qa o kubʼ t-ximen Dios alkye qʼij tuʼn tkyim jun xjal. Noqtzun tuʼnj, aju taqikʼ lu in yolin tiʼj tzeʼn tten qanqʼibʼil ex qa qkyaqilx ok qo kyimel. Ax ikx in tzaj t-xnaqʼtzaʼn Tyol Dios qa aju in jaw qskʼoʼn tuʼn tbʼant quʼn jaku ten toj tkyaqil qanqʼibʼil. Jun techel, in tzaj tqʼamaʼn qa ma qo xobʼ twitz Dios kxel laqʼeʼ mas qanqʼibʼil (Proverbios 10:27; Salmo 90:10; Isaías 55:3). ¿Toj alkye tten? Qa ma qo nimen te Dios kʼonil qiʼj tuʼn tel qikʼun tkyaqil bʼinchbʼen nya bʼaʼn, ik tzeʼn kʼaj qʼeʼn ex aju yaẍbʼil, moqa aj pajil (1 Corintios 6:9, 10).
-
Ateʼ junjun xjal in che ok lepeʼxix tiʼj Tyol Dios ik tzeʼn tzʼibʼin toj, aj ttzaj tqʼamaʼn qa aju kyaʼj ex Txʼotxʼ «kʼuʼn qe tuʼn kybʼaj tzʼeʼy tuʼn qʼaqʼ», tuʼntzunju in kubʼ kyximen qa kbʼel t-xitin Dios aju Txʼotxʼ (2 Pedro 3:7). Noqtzun tuʼnj, in tzaj ttziyen qa mlay tzaj tqʼoʼn ambʼil tuʼn tkubʼ xiten Txʼotxʼ. O kubʼ tqʼoʼn Dios «txʼotxʼ tibʼaj tqʼuqbʼil tuʼntzun miʼn tyukch tuj tlugar» (Salmo 104:5; Isaías 45:18). Nya a te Txʼotxʼ kbʼel najsaʼn te jumajx, sino tkyaqilju nya bʼaʼn at, ik tzeʼn kbʼel patin tuʼn qʼaqʼ. Ax ikx, aj tyolin tiʼj axix tok kyaʼj atz in yolin tiʼj kyaʼj in nok qqʼoʼn qwitz tiʼj, tiʼj tkyaqilju at twitz ex kyiʼj qe cheʼw, moqa atz in yolin tiʼj tnajbʼil Dios. Mi jun kyxol qe kyaʼj lu kbʼel najsaʼn.
¿TIQUʼN AT MAJ JUNXITL IN NOK TOJ QWIʼ AJU TKUʼX TOJ TYOL DIOS?
Ik tzeʼn in tzaj kyyekʼun qeju techel ma che kyaj, junxitl in nok junjun taqikʼ Tyol Dios toj kywiʼ xjal. ¿Tiquʼn in xi tqʼoʼn Dios ambʼil te jlu? Jaku kubʼ t-ximen jun xjal jlu: «Qa ojtzqiʼn tkyaqil tuʼn Dios ex atzun xjal mas at tnabʼil twitz alkyexku juntl, ¿tiquʼn mintiʼ kubʼ tbʼinchaʼn Xjan Uʼj tuʼn tel kynikʼ kykyaqil xjal tiʼj?». Qo xnaqʼtzan kyiʼj oxe tiquʼn aʼyeju in tzaj kyyekʼun tiquʼn junxitl in nok toj kywiʼ xjal aj kyuʼjin tiʼj uʼj lu.
-
O kubʼ bʼinchaʼn Tyol Dios tuʼn tel kynikʼ xjal mans tiʼj ex aʼyeju kyaj tuʼn tel kynikʼ tiʼj. Xi tqʼamaʼn Jesús jlu te Ttat: «Kxel nqʼone chjonte teya, Tat, aya Tajaw kyaʼj ex txʼotxʼ, tuʼnju ma kubʼ tewana Lucas 10:21). Kubʼ tzʼibʼin Tyol Dios kye xjal at jun tbʼanel kyximbʼetz tuʼntzun tel kynikʼ tiʼj. Aqeju «xjal at kynabʼl ex [...] bʼaʼnxix kyuʼn» in jaw kynimsaʼn kyibʼ ex junxitl in nok toj kywiʼ aj kyuʼjin tiʼj. Noqtzun tuʼnj, aʼyeju xjal mans in che uʼjin tiʼj ex kyaj tuʼn tel kynikʼ tiʼj —ik kyten ik tzeʼn «qe xjal chʼin kyoklen»— in xi qʼoʼn ambʼil kye tuʼn tel kynikʼ tiʼj tqanil tkuʼx toj Tyol Dios. Ax tok, kubʼ tbʼinchaʼn Dios Xjan Uʼj toj jun tbʼanelxix tten.
tkyaqil jlu kywitz qe xjal at kynabʼl ex kywitz qe xjal bʼaʼnxix kyuʼn, ex ma tzaj tyekʼuna kye qe xjal chʼin kyoklen» ( -
Kubʼ bʼinchaʼn Xjan Uʼj kye qeju kyaj tuʼn tonin Dios kyiʼj tuʼn tel kynikʼ tiʼj. Tqʼama Jesús qa kyajtoq xjal onbʼil tuʼn tel kynikʼ kyiʼj qe t-xnaqʼtzbʼil. Noqtzun tuʼnj, ¿alkye tten kxeltoq kykʼamoʼn? Tzaj tqʼamaʼn Jesús jlu: «Atzunju onil kyeye ex qʼuqbʼal kykʼuʼje, aju Xewbʼaj Xjan, aju ktzajel t-samaʼn Nmane te nxele, atzunju kqʼolte xnaqʼtzbʼil kyeye tiʼj tkyaqil» (Juan 14:26). In tzaj tqʼoʼn Dios xewbʼaj xjan qe —toj juntl yol aju tipumal— tuʼn tonin kyiʼj xjal tuʼn tel kynikʼ tiʼjju in tzaj tqʼamaʼn Xjan Uʼj. Noqtzun tuʼnj, mintiʼ in xi tqʼoʼn xewbʼaj xjan kye qeju xjal mintiʼ in xi kyqanin onbʼil te, ex tuʼntzunju kwest tuʼn tel kynikʼ tiʼj Xjan Uʼj. Ax ikx in bʼant tuʼn xewbʼaj xjan tuʼn kyajbʼen qe okslal mas at kyojtzqibʼil tuʼn kyonin kyiʼj qeju kyajxix tuʼn tel kynikʼ tiʼj (Hechos 8:26-35).
-
Ateʼ junjun taqikʼ Tyol Dios in nel nikʼbʼaj tiʼj oʼkx aj tpon ambʼil bʼantni tiʼj. Jun techel, xi qʼamaʼn te aj sanjel Daniel tuʼn tkubʼ ttzʼibʼin jun tqanil toj ambʼil tzul. Xi tqʼamaʼn jun anjel jlu te: «Aya Daniel, miʼn tzʼel tqanil jlu tuʼna, ex qʼonka jun sey tiʼj libro lu tuʼntzun miʼn tjaqet, maxi kjaqetel ok tjapun mankbʼil tqʼijlalil». Toj nimku abʼqʼi, nim xjal o kubʼ kyuʼjin aju uʼj te Daniel, noqtzun tuʼnj, mintiʼ o tzʼel kynikʼ tiʼj. Axpe ikx mintiʼ el tnikʼ Daniel tiʼj tkyaqilju kubʼ ttzʼibʼin, tuʼntzunju tqʼama jlu: «O nbʼiye aju o tma pero mintiʼ el nnikʼe tiʼj». Aj tpon ambʼil, kʼeleltoq kynikʼ xjal tiʼj tiʼ t-xilen yol otoq tzaj tqʼamaʼn Dios te, noqtzun tuʼnj, toj jun ambʼil aju otoq kubʼ t-ximen Dios. Xi tqʼamaʼn anjel jlu te: «Daniel, qʼonku bʼeya, porque tkyaqil jlu il tiʼj tuʼn tten tuj ewaj okxi tjapun bʼaj mankbʼil tqʼijlalil». ¿Alkyeqetoq kʼelel kynikʼ tiʼj? «Qe bʼinchal mya bʼaʼn, [...] mlay tzʼel kynikʼ tiʼj ju in bʼaj, atzun kye xjal at kynabʼl, kʼelel kynikʼ tiʼj tkyaqil» (Daniel 12:4, 8-10). Tuʼntzunju, mintiʼ in tzaj tchikʼbʼaʼn Dios junjun taqikʼ Tyol qa naʼmx tpon ambʼil te.
¿Ope bʼaj jun maj qiʼje aqoʼye testigos de Jehová junxitl ok toj qwiʼye aju in tzaj tqʼamaʼn Tyol Dios tuʼnju naʼmxtoq tpon ambʼil tuʼn tel nikʼbʼaj tiʼj? Oje. Noqtzun tuʼnj, tej tpon ambʼil tuʼn ttzaj tchikʼbʼaʼn Dios junjun xnaqʼtzbʼil, jun rat bʼaj qchʼexpuʼne aju otoq tzʼel qnikʼe tiʼj. In kubʼ qximane qa iktzun tten in nel qkanoʼne kyiʼj t-apóstol Jesús, aʼyeju kubʼ kyin kyibʼ ex kubʼ kychʼixpuʼn aju otoq tzʼel kynikʼ tiʼj tej t-xi tqʼamaʼn Jesús kye qa otoq che el tzpet (Hechos 1:6, 7).
Ax tok, tej tkubʼ t-ximen tal txin tiʼjju jatumel in tzaj muj, el tzpet tiʼj jun tiʼ nya nim toklen. Noqtzun tuʼnj, aju in tzaj t-xnaqʼtzaʼn Tyol Dios mas nim toklen te teyele junjun qe. Qa ma tzʼok tilil tuʼna tuʼn tuʼjina tiʼj Tyol Dios tjunalxa, jakulo mlay tzʼel tnikʼa tiʼj. ¿Nyape jun nya bʼaʼn jlu toj twitza? Tuʼntzunju, bʼaʼn tuʼn tjyona onbʼil tuʼn tel tnikʼa tiʼjju in kubʼ tuʼjina. Jaku jyona kyiʼj xjal mans in che xnaqʼtzan tiʼj Tyol Dios, in nok qeʼ kykʼuʼj tiʼj onbʼil in tzaj tqʼoʼn xewbʼaj xjan kye ex in nok qeʼ kykʼuʼj qa in qo anqʼin toj ambʼil jatumel taj Dios tuʼn tel kynikʼ xjal tiʼj Tyol. Qa taja, jaku yolina kyukʼil testigos de Jehová moqa jaku jaw tuʼjina aju xnaqʼtzbʼil o tzʼel kynikʼ tiʼj aju at toj tembʼil te Internet toj www.pr418.com/mam. In tzaj ttziyen Tyol Dios jlu: «Qa ma kubʼsana tuʼn ttzaj qʼoʼn tojtzqibʼla [...] kʼelel tnikʼa tiʼj tzaʼn tten tuʼn tojtzqinteya Dios» (Proverbios 2:3-5).