Qa tbʼanel moqa nya bʼaʼn in kubʼ tnaʼna aj tjaw tuʼjina Tyol Dios, a jlu at toklen tiʼjju alkye t-ximbʼetza tiʼj. Qo xnaqʼtzan kyiʼj junjun tumel aju kʼonil tiʼja tuʼn tokx tqʼon tibʼa toj txʼolbʼabʼil in kubʼ tuʼjina ex tuʼn tkubʼ tnaʼna bʼaʼn.

Jyoʼnktza jun Tyol Dios jaku tzʼok qeʼ qkʼuʼj tiʼj ex toj yol in najbʼen jaʼlo. Qa ma jaw tuʼjina jun Tyol Dios tkuʼx nim yol toj aju mintiʼ in nel tnikʼa tiʼj ex mintiʼtl in najbʼen, mlaylo tzalaja tiʼj. Tuʼntzunju, jyonktza jun Tyol Dios aju nya kwest tuʼn tel qnikʼ tiʼj ex in pon toj qanmi. Ax ikx, jun Tyol Dios aju tzʼaqli ex jaku tzʼok qeʼ qkʼuʼj tiʼj. *

Che ajbʼen kʼuxbʼil tuʼna aʼyeju ateʼ jaʼlo. Toj ambʼil jaʼlo, nya oʼkx at Tyol Dios twitz uʼj, sino ax ikx at toj kʼuxbʼil. Jaku kubʼ tuʼjina toj Internet moqa jaku kutz tiʼna toj computadora, toj tablet moqa toj yolbʼil. Ateʼ junjun Tyol Dios tkuʼx onbʼil toj aju jaku tzʼok qqʼoʼn qwitz tiʼj jun versículo kyoj junjuntl traducción tiʼj Tyol Dios moqa jaku kubʼ qmojbʼaʼn tukʼil junjuntl taqikʼ Tyol Dios. Qatzun mas bʼaʼn tuʼn tok tbʼiʼna twitzju tuʼn tkubʼ tuʼjina, ax ikx at toj audio. Ateʼ nim xjal kygan tuʼn tok kybʼiʼn toj kar aj kyxiʼ aqʼunal, aj kytxʼjoʼn xbʼalun moqa aj tbʼant junjuntl aqʼuntl kyuʼn aju mintiʼxix in nok kyqʼoʼn kywiʼ tiʼj. Qa at jun kyxol tumel lu tbʼanel in nela te teya, bʼaʼn tuʼn tkubʼ tbʼinchaʼna.

Jyona mas tqanil. Aʼyeju onbʼil ateʼ tiʼj Tyol Dios kʼonil tiʼja tuʼn tel mas tbʼanel aju in kubʼ tuʼjina. Jun  techel, ateʼ mapa tiʼj txʼotxʼ in yolin Tyol Dios tiʼj, jaku tzʼajbʼen tuʼna tuʼntzun tel tnikʼa tiʼj tembʼil in yolin txʼolbʼabʼil tiʼj ex tuʼn t-ximana tiʼjju bʼaj. Ax ikx, at junjun xnaqʼtzbʼil toj uʼj lu ex jatumel in tzaj tqʼamaʼn «Enseñanzas bíblicas» toj tembʼil te Internet jw.org jaku che onin tiʼja tuʼn tel tnikʼa tiʼj nim taqikʼ Tyol Dios.

Uʼjinktza te junxichaq tten. Qa kwest sela toj twitza tuʼn tkubʼ tuʼjina tkyaqil Tyol Dios, jaku ten tajbʼila tiʼj qa ma kubʼ tuʼjina jun plaj tbʼanel in nela te teya. Tuʼn tok tojtzqiʼna mas jun xjal in yolin Tyol Dios tiʼj, jaku jaw tuʼjina txʼolbʼabʼil tiʼj teyele junjun xjal. Aju recuadro « Ojtzqiʼnka mas Tyol Dios tuʼn tel tnikʼa kyiʼj xjal in yolin tiʼj», jaku tzʼonin tiʼja qa taja tuʼn tel tnikʼa tiʼj jun xjal. Ax ikx jaku jaw tuʼjina teyele junjun xnaqʼtzbʼil moqa tojju ttxolil tkubʼ. Bʼaʼn tuʼn tajbʼen qeju tten lu tuʼna.